Mi cilima 41

Faraon dangi ti dangidi

1Binalie n den pendi, Faraon den dangi ti dangidi. O den se u kpenciamu Nili kani. 2O den laa ke naañuanalele ya gbengi ki pia mi kpama, ki go ŋani bonŋanla den ñani u kpenu nni, ki se li boanjaali po, ki ŋmani ti muadi. 3Li yaa puoli, naañuamulele, yaamu n gundi ki go kuodi mo den ñani u kpenu nni, ki cua ki balini ba ki se li boanjaali po. 4Yaa naañuamu n kuodi ki go gundi yeni den ŋmani yaa naañuana n ŋani ki go pia mi kpama yeni. Lani, Faraon den fundi. 5Faraon den guani ki go dangi mi taaliema. 6O den laa disiandilele ke ti gbengi ki go ŋani ki se kankagiyenli po. Li yaa puoli, o go den laa disianmulele, ke mu jugi ke puoli faalu figi ke mu kuodi. 7Mu disiankuonmu yeni den nali ti disiangbeeleleediti yeni. Faraon go den fundi. Lani n den tie o dangidi.

8Lan fii ki faa, Faraon yama den yagi. O den teni ke bi yini Ejipiti ñoagidanba leni bi yanfuodanba kuli. Faraon den togidi ba o dangidi. Oba kuli naa den fidi ki waani Faraon li bundima.#Dan 2.2. 9Lanwani, yua n den tugi yaaba n tendi o bado o bonñokaala kuli yaa yuli yeni den yedi: «Faraon, ŋan sinja n po ke dinla n baa tiadi n tagili, min den bii yaa biili yaa maama. 10Faraon pali den biidi o naacenba po, ke o teni ke bi luoni mini leni yua n den tugi yaaba die a bonjekaala kuli yuli, li kpaadidieli yudaano deni. 11Mini leni wani, ñiayengu ti den dangi yaa dangidi n pia mi bundima. 12Laa kpaadidieli den pia Hebilu yaaba siiga jawaayendo ke o den lo leni ti, ki tie li kpaadidieli yudaano yaa yonbo. Ti den togidi o ti dangidi. O den waani ti yuakuli dangidi n bundi yaala. 13Li bonla kuli den tieni nani wan den bundi ti po ti dangidi maama yeni. Faraon den guani ki kuani nni n tuonli nni, ki teni ke bi soadi o lielo mo.»

Josefi bundi Faraon po o dangidi

14Faraon den teni ke bi yini Josefi. Bi den jaligi ki ñani o li kpaadidieli nni. O den kuo o yuli leni o langbiadi, ki lebidi o tiadi, ki gedi Faraon kani. 15Faraon den yedi Josefi: «N dangi ti dangidi. Oba kuli ki fidi ki baa waani nni tin bundi yaala. Ama n gbadi ke fini wani baa fidi ki bundi ban togidi a yaa dangidi.» 16Josefi den guani ki yedi Faraon: «Mini ka baa fidi ki bundi ti dangidi. U Tienu n baa doagidi a po ti dangidi yeni n bua ki yedi yaala.»

17Lanwani, Faraon den yedi Josefi: «N dangidi nni, n den se u kpenciamu boanjaali po. 18Naañuanalele ya gbengi ki pia mi kpama, ki go ŋani den ñani u kpenciamu nni ki se li boanjaali po, ki ŋmani ti muadi. 19Lani n pendi, naañuakuonmulele yaamu yaa noanlima n gundi, hali ke n daa kpa laa laa gundima buolu Ejipiti nni, mo den yuandi ki ñani. 20Mu naañuakuonmu yaamu n gundi yeni den ŋmani a naañualeleeda ya gbengi ki pia mi kpama yeni. 21Ba ke mu den nali ba, mu den baa ki se ki tie bonkuonmu nani mi kpiama yeni leni mu gundima. Li yaa puoli, n den fundi. 22Lani n pendi, n go den dangi ti naa dangidi: disiandilele ke ti gbengi ki go ŋani den ye kankagiyenli po. 23Disianjugimulele yaamu ke puoli faalu figi mu ke mu kuodi den yuandi ki pudi ti disiangbeedi kani. 24Mu disianjugimu yeni den nali ti disiangbeedi yeni. N togidi n ñoagidanba laa dangidi, ama baa fidi ki bundi n po. Waani nni lan bua ki yedi yaala.»

25Josefi den yedi Faraon: «Faraon, a dangiliediti kuli bundi bonyenla yo. U Tienu waani Faraon wan bua tieni yaale. 26A naañualeleediŋama yeni tie binalele yo, ti disiangbeeleleediti yaadi n ŋani yeni moko tie binalele goge. Likuli tie dangiyende. 27Yaa naañuamu n den kuodi ki go gundi yeni ki den ŋoadi bi kpiaba puoli yeni, muni moko tie binalele yo, muni leni yaa disianmu n den faani ki jugi ke puoli faalu cua ki waadi mu yeni kuli tie binalele kome. 28Lanwani, nani min yedi Faraon maama, U Tienu waani Faraon wan baa tieni yaale. 29Diidi li guokandikaali baa tugini binalele. Li baa yaa tie guocianle Ejipiti diema nni kuli. 30Laa bina yaa pendi, mi konbiadima baa cua Ejipiti diema nni kuli, ki waagi binalele. 31Mi baa jugi mi diema hali bi niba n ban sundi yaa guoli n den tieni Ejipiti diema nni. 32Laa dangidi n tieni figilimilie Faraon po yeni, li bua ki yedi ke U Tienu bili ke laa bonla baa tieni tilade. O baa teni lan jaligi ki tieni mo. 33Moala, yaama n ye n tie mine: Se Faraon n moandi ki baa yaa joa n pia mi yama, ki go tie yanfuodaano, ki teni wan diedi Ejipiti diema. 34Faraon n moandi ki gandi bi niba ki puogi ba, ban gaa li lubili yuakuli n baa ko yaa kpaandi yaa niinni. Bi yaa boagidi ti kpaandi yeni kaanimuu, kaanyendu n tua li lubili. Ti kpaandi kuli yaa kaanmuulu yeni ban yaa piadi ki biliti u, hali li guoli yaa binleleeda n ban pendi. 35A binleleeda yaa kpaandi kuli, ban taani ti ki dogini likuli ban gandi yaa kaanu, ki teni Faraon o ba n bandi ke li bonla kuli cuoni nani lan pundi maama, ki baa yaaba n baa yaa guu ti. 36Bi baa paadi ki bili laa kpaandi mi diema nni, ki bogini ki guudi mi koma binleleeda ya n kpendi Ejipiti diema nni yeni yaa po. Lani yaa ka, mi koma baa jugi mi diema.»

Josefi tua Faraon koanbali

37Laa maama den mangi ki go dagidi Faraon leni o naacenba kuli po. 38Faraon den yedi ba: «Naani ti baa fidi ki go baa yua n tie nani o naa joa, ki pia U Tienu Fuoma o niinni?» 39Faraon den yedi Josefi: «Yaala n teni ke U Tienu waani a line kuli yeni, yua go pia banma, bi yanfuoma nani fini yeni ki ye. 40Fini n baa yaa tugi n diema yuli, n niba po mo, ŋan yedi yaama, mani n baa yaa ye. Ti gbandi, min kaa yaadi yaa po bebe n baa yaa tie mini leni fini siiga mi paadima.»#JTT 7.10. 41Faraon den yedi Josefi: «Moala n puni a u sanu ŋan diedi Ejipiti diema kuli.» 42Faraon den pidi o ñoagibima ki pilini Josefi. O den lani o yaa tiadi n ŋani ki pia ti kpiagidi, ki go den lani o wula laanu.#Dan 5.29. 43O den teni ke bi kaani o o teligu yaagu n ŋua Faraon yaagu puoli, ki teni ke bi niba ye liiga ki kpaani ki tua: «Gafala mani daa! Yi faami mani daa!» Faraon den tieni yeni ki teni ke o diedi Ejipiti diema. 44Faraon go den yedi Josefi: «Mini n tie o bado. Oba kuli kan fidi ki tieni bonla Ejipiti diema nni ke ŋaa puni o li sanu.» 45Faraon den puni Josefi li yeli. Laa yeli n den tie Tisafinati-Panea. O den puni o o pua ke o yi Asinati, Poti-Fera, Oni kopadiciamo bisalo. Lanwani, Josefi den ñani ki baa diidi Ejipiti diema kuli. 46Josefi den pia bina piitaa wan den cua ki sedi yaa daali Ejipiti bado Faraon nintuali. Li yaa puoli, o den gaani i dogi nni kuli, ki baa bandi Ejipiti diema.

47Li guoli yaa binleleeda nni, bi niba den soani hali bonŋanla. 48Josefi den taani laa binleleeda yaa kpaandi Ejipiti diema nni. O den teni ke bi taani ti kpaandi kuli i dociami nni. A dobila nni mo yaa kpaandi, bi den taa ti ki cuani i dogbengi nni. 49Josefi den dogini ŋalikama nani mi ñincianma jaali tanbiili yeni, hali ke baa go den coadi lan den yabi ki da maama, kelima bi kan go den fidi ki coadi.

50Hali ke mi koma binkpiali daa den cili, Josefi pua Asinati yua n den tie Oni kopadiciamo, ban yi yua Poti-Fera bisalo den mali o po bonjalalie. 51Josefi den yini o bijakpelo Manase,#41.51 Manase bundima tie: Yua n teni ke n sundi. kelima o den yedi U Tienu teni ke n sundi n fala leni n baadiegu kuli. 52Wan den yuandi ki mali yua mo, o den yini o Efrayimi,#41.52 Efrayimi bundima tie: O teni ke n baali pugini. kelima o den yedi, U Tienu puni nni li baali min laa fala yaa diema nni.

53Ejipiti nni, li guoli binleleeda den pendi. 54Nani Josefi n den yedi maama, a binleleeda koma den cili. Yaa diema n sieni kuli yaa niinni, mi koma den ye, ama Ejipiti diema nni wani, li bonjekaala den ye. #JTT 7.11. 55Mi diema nni yaaba kuli n den luo mi jiema yaa yogunu, bi den cua ki kpaani ki mia Faraon li bonjekaala. O den yedi ba: «Gedi mani Josefi po ki ban tieni wan baa yedi yi yaala.»#Jan 2.5. 56Mi koma den ye Ejipiti diema nni kuli, ki kubi bi niba boncianla. Josefi den teni ke bi luodi a buabuana i dogi nni kuli, ki kuadi Ejipiti yaaba po ŋalikama. Mi koma den baa ki biagidi ki pugidi Ejipiti nni. 57Yaa diema n sieni kuli yaa niba den kpendi Ejipiti nni ki baa magi ŋalikama Josefi kani, kelima mi koma den biagi boncianla ki tinga nni kuli.

Currently Selected:

Mi cilima 41: BGP

Highlight

Copy