Mi cilima 44

Josefi biigi o kpeliba leni o waalo

1Josefi den maadi leni o diegu nni tuonsoanyudaano ki yedi: «Gbieni bi niba yeni kpalipadi mi jiema hali ban baa fidi ki tugi yaa banlu, ki ŋuuni yuakuli ligi o kpalipiagu ñoabu nni. 2Go taa n tadibuoga, yaaga n tie ŋanjilifa ki ŋuuni ku waajuogu yaa kpalipiagu nni ki taani leni o ŋalikama ligi.» O tuonsoanyudaano den tieni Josefi n den yedi o yaala kuli.

3Ku tiŋaagu, lan den yendi yaa yogunu, bi den cabi laa niba leni bi ŋunbi. 4Ban den ñani u dogu nni ki daa gedi foagima, Josefi den yedi o tuonsoanyudaano: «Fii ki ŋoadi bi niba yeni. A yaa pundi bi kani yaa yogunu, ŋan yedi ba: ‹Be n teni ke yi tieni mi ŋanwaama? 5Li gaa lede ke yi suni n canbaa tadibuoga, wan yen kubi yaaga ki bu ku baagu yeni. Yin tieni yaala yeni, laa ŋani ba waamu.› » 6O tuonsoanyudaano den pundi bi kani ki maadi ba laa maama. 7Bi den guani ki yedi o: «Be yaa po ke n canbaa maadi laa maama buolu? U Tienu n kubi a naacenba ke ban da soani laa tuonli buolu. 8Diidi tin den laa yaa ligi ti kpalipadi nni, ti den ñani yi hali Kanana diema nni, ki guani. Ti baa gaa lede ki su ŋanjilifa bi wula ti yonbidaano diegu nni? 9Ŋan laa ki tadibuoga yua yaa kani a naacenba siiga, wan kpe, timo n tua n yonbidaano yonbi.» 10O den yedi ba: «To, lan tua nani yin maadi maama yeni. Min laa ki tadibuoga yua yaa kani, o baa tua n yonbo, yinba, yi baa faabi ki naa pia tagili.» 11Lanwani, tontoni yuakuli den jiini o kpalipiagu, ke bi lodi ti kpalipadi. 12O tuonsoanyudaano den diidi ti kpalipadi kuli niinni, ki cili leni o nikpelo, ki ban juodi leni ku waajuogu. O den laa ki tadibuoga Benjamen yaa kpalipiagu nni. 13Bikuli den padi bi tiadi. Yuakuli go den tuni o ŋunbo ki lebidi ki guani u dogu po.

Juda maadi ki baa gaa Benjamen

14Juda, o kpeliba leni o waamu den pundi Josefi diegu nni, ki sua ke o da ye likani ke bi gbaani ki pugi o. 15Josefi den yedi ba: «Yi soani be yaa tuonli n yeni? Naani yii bani ke n tie yua n baa fidi ki bandi yaala n tieni, ba bi yàá waani nni?» 16Juda den guani ki yedi o: «Ti baa yedi n yonbidaano be? Ti baa maadi lede? Ti baa fidi ki saa ti yula po i moamoani lede? U Tienu den laa a naacenba biadima. A nua ti, ti tie n yonbidaano yonbi, tinba leni ban bi laa ki tadibuoga yua yaa kani kuli.» 17Josefi den yedi: «U Tienu n kubi nni, min da tieni yeni. Ban bi laa ki tadibuoga yaa joa yaa kani, wani n baa tua n yonbo, ama yinba, yin guani yi baa kani leni mi yanduanma.»

18Lanwani, Juda den nagini Josefi kani ki yedi o: «N yonbidaano, tieni n po sugili ke a naacemo n fidi ki maadi a kani mayenma. A pali n da be a yonbo po. A tie nani Faraon yene. 19N yonbidaano den buali o naacenba ki yedi ba: ‹Naani yi pia baa, bi waalo?› 20Ti den guani ki waani a ke ti pia baa, ke o tie jakpelo leni ti waalo yua n tie ti baa jakpebiga. Laa biga den pia o kpelo yua n taa leni o naa, ama o kpe. Wani o bebe n sieni, ke o baa mo bua o hali boncianla. 21Lanwani, a den yedi a naacenba: ‹Teni wan cua n kani ke min le o leni n nuni.› 22Ti den guani ki yedi n yonbidaano: ‹Ki biga kan fidi ki ŋaa o baa, o yaa ŋaa o, o baa baa kpe.› 23A den yedi a naacenba: ‹Yi waalo yàá yegi leni yi ki cua, yi kan go le n nunga.› 24Tin den guani ki pundi a naacemo ti baa kani, ki waani o ŋan yedi yaala kuli. 25Ti baa den yedi ti: ‹Guani mani ki ban daa ti po mi jiema waamu.› 26Ti den guani ki yedi o: ‹Ti kan fidi ki gedi, ama li yaa tie ke ti waajuogu yegi leni ti, ti baa gedi. Ti waalo yàá ye leni ti, ti kan fidi ki le laa joa nunga.› 27A naacemo ti baa den yedi ti: ‹Yi bani ke n pua den mali n po jabilie. 28Yendo den ñani n kani, n tama ke bonbiiguba n toadi toadi o, kelima n naa go laa o hali moala. 29Yi yaa go taa o ne yua n sieni ke bonbiadila cuo o, yi baa teni n yukobipiendi n jiidi bi tinkpiba diema nni leni li paboanli.› 30Moala n yaa guani a naacemo n baa kani ke ki biga naa ye leni ti, wan bua o hali boncianla maama po, o baa kpe. 31O yàá laa ki biga, yeni mo, a naacenba baa teni a naacemo ti baa yukobipiendi n jiidi bi tinkpiba diema nni leni li paboancianli. 32Mini a naacemo n pia i panpaani ki biga po. N den yedi n baa: ‹N yàá guani o a kani, n baa yaa ye leni i tagili n baa kani hali yaa yogunu kuli.›

33Lanwani n mia ŋa, ŋan cedi a naacemo n gaa ki biga kaanu ki sedi ki tua n yonbidaano yonbo, ki biga n yegi leni o kpeliba ki kuni. 34N baa tieni lede ki guani n baa kani, ki biga yàá yegi leni nni. Ŋain. Mii bua ki le n baa paboanli.»

Currently Selected:

Mi cilima 44: BGP

Highlight

Copy