Mi cilima 40

1Lan den pendi, Ejipiti bado naacenba nibilie den tudi o po. Laa naacenba siiga nni yendo den tugi yaaba n den tendi o bado o bonñokaala kuli yaa yuli. Olielo mo den tugi yaaba n den die o bado bonjekaala kuli yuli. 2Faraon pali den beni bi naacenliediba yeni po, 3ke o den teni ke bi ban luoni ba li kpaadidieli nni bi tandanba yudaano diegu nni, ban den luoni Josefi naankani yeni. 4Li kpaadidieli yudaano den taa ba ki piani Josefi, ke wane n yaa guu ba. Bi den lo lankani, ki tieni yogunuba.

Josefi bundi kpaadalie dangidi

5Ñiayengu bi naacenliediba den dangi ti dangidi. Yuakuli dangidi den pia lan bundi yaala. 6Ku tiŋaagu, Josefi n den cua bi kani, o den sua ke bi nunmu biidi. 7O den buali Faraon naacenba yaaba n den lo leni o o canbaa diegu nni, ki yedi ba: «Be n teni ke yi nunmu biidi dinla?» 8Bi den guani ki yedi o: «Ti dangi ti dangidi, ki naa pia yua n baa bundi ti po ti dangidi n bua ki yedi yaala.» Josefi den guani ki yedi ba: «U Tienu ka bani bonla kuli n bua ki yedi yaala? Togidi nni mani yi dangidi.»

9O bado naacemo yua n den tugi yaaba n den tendi o bado bonñokaala kuli yaa yuli den togidi o wan den dangi yaa dangidi, ki yedi: «N dangidi nni, n den laa duven tibu. 10Laa tibu den pia benitaa, a ŋuada n den cili, bu puuma den fibidi ki loni li bonluonkaala ke li beni. 11Faraon den kubi wan ñu leni yaa tiagu o nuu nni. N den taa li bonluonkaala ki nugi ki ñani li ñima, ki kuodi ma Faraon n den kubi yaa tadiñokaaga o nuu nni yeni.» 12Josefi den yedi o: «Ti dangidi yeni bundima nne: i bentaadi yeni tie danataa yo. 13Ne leni danataa, bi baa ñani a nekanba, ŋan guani badidiegu a tuonli nni, ki go yaa tendi o bado o bonñokaala nani ŋan den kpa tiendi maama yeni. 14A yaa ñani ki ban ti ye u manu nni, ŋan da sundi n po, ki maadi n maama Faraon kani, wan teni min ña yaa diegu n tie ne niinni. 15Bi suni nne Hebilu yaaba diema nni, ba nekanba moko, mii bii liba kuli ka ke bi luoni nni.»

16Yua tugi yaaba n die o bado bonjekaala kuli yuli n den sua ke o lielo dangidi bundima mani, omo den yedi Josefi: «Nmoko yaa dangidi nni, n den tugi baabuoditaa ke dupen bonpieno kpie lienni. 17Yaa baabuogu n den kpedi ki cie tikuli yaa niinni den pia Faraon bonjekaala buoli kuli, i nuani den kpendi ki di min tugi yaala yeni.» 18Josefi den guani ki yedi o: «A dangidi bundima nne: ti baabuotaaditi yeni tie danataa yo. 19Ne leni danataa, Faraon baa ñani a nekanba ki ban soadi a ku daagu po, i nuani n cua ki je a gbanandi.» 20Li dataali, yaa daali n tie Faraon maadaali tiadima badu, o den tieni u badu o naacenba kuli po. Landaali, 21O den teni ke bi ñani yua n tugi yaaba n tendi o o bonñokaala kuli yaa yuli leni yua n tugi yaaba n die o bonjekaala kuli yuli, li kpaadidieli nni. O den teni ke yua n tugi yaaba n tendi o o bonñokaala kuli yuli guani ki cili o tuonli, ki mubini o o tadiñokaaga. 22Ama o den teni ke bi soadi yua n tugi yaaba n die o bonjekaala kuli yuli yeni, nani Josefi n den bundi bi dangidi maama yeni. 23Yua n tugi yaaba n tendi o bado o bonñokaala kuli yuli yeni naa den tiadi Josefi po. O den sundi o po cain.

Currently Selected:

Mi cilima 40: BGP

Highlight

Copy