Mi cilima 39

Josefi ye Potifari diegu nni

1Bi den gedini Josefi Ejipiti po, ke o bado Faraon koanbali bi tandanba yudaano Potifari, Ejipiti yua, den daa o Isimayeli yaaba kani, yaaba n den gedini o Ejipiti. 2O Diedo den ye leni Josefi, ke li bonla kuli cuoni o po bonŋanla o canbaa Ejipiti yua diegu nni.#JTT 7.9. 3O canbaa den laa ke o Diedo den ye leni o, ke o Diedo den teni ke Josefi n moandi ki tiendi yaala kuli cuoni bonŋanla. 4Josefi canbaa pali den mangi leni o, ke o kuani o o deni ki teni ke o diedi o diegu nni yaa tuonli leni wan die yaala kuli. 5Potifari n den teni ke Josefi diedi o diegu leni o piama kuli, lanyogunu o Diedo den seligi Ejipiti yua diegu, kelima Josefi po. O Diedo seli den ye leni wan den pia yaala kuli, lan tie ku diegu nni bi i kuani po. 6O den piani wan pia yaala kuli Josefi nuu nni, kelima o den dugi Josefi po. Waa go den yagini o yama bonliba kuli po, se wan kua ki je bebe.

Josefi leni o canbaa pua

Josefi den ye leni mi jawaama hali bonŋanla.

7Li yaa puoli, Josefi canbaa pua den diidi o leni mi buama nuni ki yedi o: «Cua ki duani leni nni.» 8O den yie ki yedi o canbaa pua: «Diidi n canbaa dugi n po cain, ki piani nni wan pia yaala kuli o diegu nni. Waa go tiendi liba kuli o diegu nni. 9Nilo naa ye ku diegu nni kuli yua n cie nni. Waa yie n po bonliba kuli, se fini bebe, kelima a tie o pua. N baa gaa lede ki tieni laa biadicianma, ki tieni ti tuonbiadi U Tienu po.» 10Ba ke o pua den maadi leni Josefi daali kuli, o den yie ke o kan duani leni o, ke o kan duani ki kuli o mo. 11Dayenli, o den kua li dieli nni ki baa soani o tuonli. Ku diegu nni yaaba, ba niyendo naa den ye likani. 12O pua den cuo o liadili ki yedi o: «Cua ki duani leni nni.» O den ŋaa o liadili o nuu nni, ki sani ki ñani niinpo. 13O pua n den laa ke o ŋaa o liadili o kani o nuu nni ki sani ki ñani niinpo, 14o den yini ku diegu nni niba ki yedi ba: «Diidi, o den cuani Hebilu yua ti kani ke wan janbi ti. Laa joa bi cua n kani ki bua ki duani leni nni, ama n kpaani ki buudi. 15Wan bi sua ke n kpaani ki buudi, o ŋaa o liadili n kani, ki sani ki ñani niinpo.» 16O den bili Josefi liadili o kani hali ke o canbaa kpeni. 17Lanwani, o den yedi o yaa maama n tie ne: «Ŋan den cuani yaa yonbo Hebilu ki kuani o ti kani yeni, bi cua n kani ki baa janbi nni. 18Ama n den kpaani ki buudi ke o ŋaa o liadili n kani, ki sani ki ñani niinpo.» 19Wan den gbadi o pua maama ke o yedi o: «Diidi a yonbo n tieni nni yaala.» Josefi canbaa pali den beni hali boncianla.

Josefi ye li kpaadidieli nni

20O den cuo Josefi ki kuani o li kpaadidieli nni. Josefi den ye lankani li kpaadidieli nni, ban yen luondi o bado naacenba yaa kpaadidieli nni yeni.

21O Diedo den ye leni Josefi, ki puuni o o ŋanbili. O den teni ke li kpaadidieli guudo pali mani Josefi po.#JTT 7.9. 22Li kpaadidieli guudo den teni ke Josefi guu a kpaada kuli, yaaba n den ye li kpaadidieli nni ke tuonliba kuli kan den tieni ke waa bani. 23Li kpaadidieli guudo naa den buali ki bandi Josefi n tiendi maama, kelima o Diedo den ye leni o. O Diedo den teni ke Josefi n den tiendi yaala kuli cuoni bonŋanla.

Currently Selected:

Mi cilima 39: BGP

Highlight

Copy