Mi cilima 23
23
Sala kuuma
1Sala miali bina den pundi kobiga n piilie n binalele. Lani n tie Sala miali dana banlu. 2Sala den kpe Kiriyati-Arba dogu nni, yuu n go yi Hebiron, Kanana diema nni. Abalahama den gedi ki ban ŋanbi Sala kuuma, ki mua o po. 3Abalahama den fii ki ŋaa o kpiemo Sala, ki maadi leni Hititi bijaba ki yedi ba: 4«N tie caano ki ye yi siiga. Pa nni mani u kaanu yi siiga a takula po, ke min diedi u, ki doagini n pua yua n kaa ye yeni.»#Heb 11.9,13; JTT 7.16.
5Hititi bijaba den guani ki yedi Abalahama: 6«Ti daano, cengi ti maama! A tie U Tienu badijoa ti siiga. Doagini a pua ti yaa takula kani, ŋan bua naani kuli. Ba niyendo ti siiga kan yie a po ŋan piini a pua o kuli nni.»
7Abalahama den fii ki labini mi diema niba nintuali, Hititi bijaba nintuali, 8ki yedi ba: «Yi yaa baa tuo ke min doagini n pua yua n kpe yeni, yin cengi nni mani. Mia mani n po Tisoari bijua Efiron, 9ke wan pa nni Makipela tanlongu wan die yaagu ke ku ye o kuanu juodima po yeni. Wan pa nni ke min pa o yaa ligi n dagidi ke min yaa pia a takula kaanu yi siiga ki yaa die.»
10Efiron den kaa Hititi bijaba siiga. Efiron Hititi yua den guani ki maadi Abalahama Hititi bijaba leni yaaba n kua o dogu buliñoabu nintuali, 11ki yedi: «Yeni ka n daano, cengi nni. N puni a u kuanu, ki go puni a yaa tanlongu n ye u niinni. N puni a u n buolu yaaba kuli nintuali, ŋan piini a pua.»
12Abalahama den labini mi diema niba nintuali. 13O den maadi leni Efiron ki yedi o mi diema niba kuli nintuali: «N mia ŋan cengi nni. N baa daa u kuanu yene. Gaa n po u ligi, n baa piini n pua likani.»
14Efiron den guani ki yedi Abalahama: 15«N daano, go cengi nni. Ba yaa tinga n pundi kujapiena kobinaa tie be mini leni fini siiga? Piini a pua.»
16Abalahama den gbadi Efiron maama, ki biigi Efiron po wan den maadi yaa ligi bianu Hititi bijaba nintuali, ke li tie kujapiena kobinaa nani ki daaga yaa dunga n tie maama. 17Efiron kuanu Makipela kaanu yuu n tiegi leni Manmire u kuanu leni yaa tanlongu n ye likani leni yaa tiidi n ye u kuanu po kuli ki go ye u lindima kuli, 18lani kuli den tua Abalahama yaa yaala. Li den tieni Hititi bijaba leni yaaba n koa o yaa dogu yaa buliñoabu kuli nintuali.
19Lan pendi, Abalahama den doagini o pua Sala Makipela tanlongu nni, yaagu n tiegi leni Manmire yuu n go yi Hebiron, Kanana diema nni. 20U kuanu leni yaa tanlongu n ye likani den tie Abalahama yaa yaala, a takula kaanu po, wan den daa yuu Hititi bijaba kani.
Currently Selected:
Mi cilima 23: BGP
Highlight
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
