Mi cilima 24

Isaaka puotaali

1 Abalahama den kpeligi ki podi boncianla. O Diedo den seligi o li bonla kuli nni. 2Abalahama den maadi leni o naacemo yua n kpeligi ki cie bikuli o diegu nni, yua n den kubi o piama kuli ki yedi o: «N mia ŋa, ŋan soali a nuu n panli tiipo, 3n baa teni ŋan poli o Diedo nintuali yua n tie tanpoli leni ki tinga Tienu, ke a kan taa n bijua po o pua Kanana yaaba bisiaba siiga, min kaa yaaba yaa siiga. 4Ama a baa gedi n baadogu leni n diema nni, ki taa o pua n bijua Isaaka po.»

5O naacemo den yedi o: «Daalinba o jafaano kan tuo ki ŋoadi nni mi naa diema nni. Naani li pundi ke min guani a bijua ŋan den ñani yaa diema nni?» 6Abalahama den yedi: «Fangi a yuli ki da guani n bijua lipo. 7O Diedo tanpoli Tienu yua n den teni ke n ñani n baadiegu nni leni n diema nni, o den maadi leni nni ki bili n po li poli ki yedi nni: ‹N baa pa mi naa diema a puoliŋuani.› Wani n baa soani o maleki a nintuali ke a baa taa o pua n bijua po laa dogu nni. 8O jafaano yaa yie ke o kan yegi leni a, a baa faabi leni min teni ke a poli yaa poli yeni. Ama ŋan da guani n bijua lipo abada.»

9O naacemo den soali o nuu o yonbidaano Abalahama panli tiipo, ki poli ke o baa kubi laa bonla kuli. 10O naacemo den taa yuoyuodi piiga o yonbidaano yuoyuodi siiga leni wan bua yaala kuli o yonbidaano piama siiga, ki fii ki taa u sanu. O den fii ki gedi Mesopotami diema nni, ki pundi Nahori dogu.

11O den teni ke ti yuoyuodi gbaani ki fuodi u dogu niinpo, ki kuu leni li caali. Li den tie ku yenjuagu, bi puoba n ña ki baa luuni mi ñima yaa yogunu. 12O den yedi: «O Diedo, n yonbidaano Abalahama Tienu, n mia ŋan tieni li ŋanbili n yonbidaano Abalahama po. 13Diidi, n se ki kuu leni li ñinbunli, u dogu yaaba bisiaba baa cua ki luuni mi ñima. 14N mia ŋa bu naa miabu. Min baa mia yaa jafaano ki yedi o: ‹N mia ŋa ŋan kpegini a cuali min ño› ke o baa guani ki yedi: ‹Ño ke n go baa pa a yuoyuodi mo n ño.› N mia ŋa ke laa jafaano n yaa tie ŋan gandi yua ki bili a naacemo Isaaka po. Yene ke n baa bandi ke a tieni li ŋanbili n yonbidaano po.»

15Hali ke o daa maadi ki gbeni, Rebeka den ñani u dogu nni ki bugi o cuali. O den tie Abalahama waalo Nahori pua Milika bijua Betueli bisalo. 16O den tie yaa jafaano n pia ti jafandi bonŋanla, ki go ŋani mo, ki tie puowandiali, joa kuli naa den bani o. O den jiidi li ñinbunli kani ki baa gbieni o cuali. O den gbieni o cili ki ban cuoni. 17Abalahama naacemo den fii ki tuogi o ki yedi: «N mia ŋa, pa nni a cuali nni ñima waamu min ño.» 18O den guani ki yedi o: «N daano, ño.» O den jaligi ki ñuani ki jiini o cuali, ki tebini li, ki puni o ke o ñuni. 19Wan den puni o mi ñima ke o ñuni ki gbeni, o den yedi o: «N go baa luuni a yuoyuodi po, bani mo n ño hali ki guo.»

20O den bidi o cuali ñima tontoni u yangalu nni, ki go sani ki guani li caali po ki luuni ti yuoyuodi kuli po. 21O joa den se ki nua leni li pakili, ki naa yedi liba ki baa le o Diedo yaa baa teni o sancenli n juodi ki ŋani, bi li yaa kan ŋanbi. 22Ti yuoyuodi n den ñuni ki gbeni, o joa den taa wula yaa ñoagima ke mi kpiagi ki pundi kujapienli boagidima leni bianalie, ke a tie wula ki kpiagi ki pundi kujapiena piiga, ki puni o jafaano yeni. 23O den buali o: «Ŋan sinja n po, a tie ŋme yaa bisalo yo? Naani a baadiegu pia u kaanu ke n baa fidi ki duani ku ñiagu ne?»

24O den guani ki yedi o: «N tie Betueli bisalo, Milika n mali Nahori po yua.»

25O go den yedi o: «Ti deni pia ti muadi leni ti yandi jiema boncianla. U kaanu go ye ke a baa fidi ki duani ku ñiagu.»

26Lani yaa po, o joa den gbaani ki pugi o Diedo ki yedi: 27«O Diedo, n Diedo Abalahama Tienu n baa ti pagidi, wani yua n doagidi o ŋanbicianli leni o dugidi n yonbidaano po. O Diedo gobidi nni ke n pundi n yonbidaano waamu diegu nni.»

28O jafaano den sani ki kuni o denpo, ki waani o naa laa bonla kuli. 29Rebeka den pia o kpelo ke o yi Laban. Laban den ñani ki sani ki gedi o joa po li caali kani. 30Wan den li laa mi ñoagima leni a biana o waalo nuu nni, ki go gbadi ke o waalo Rebeka yedi o: «O joa ne den maadi nni nanda leni nanda.» O den pundi laa joa kani ke o se leni o yuoyuodi li caali kani ki yedi o: 31«Cua ne, fini o Diedo n seligi yua! Be yaa po ke a se nekanba niinpo? N ŋanbi li dieli, ki go ŋanbi u kaanu ti yuoyuodi po.»

32O joa den kua ku diegu nni. Laban den teni ke bi tugidi ti yuoyuodi ki puni ti ti muadi leni mi jiema. O go den cuani mi ñima ke o joa leni yaa niba n ye leni o n nigidi bi taana. 33Li yaa puoli, o den teni o mi jiema ke wan je. Ama laa joa den yedi: «N da kan je, se n waani n cenli.» Laban den yedi o: «Maadi.»

34Lanwani, o den yedi: «N tie Abalahama yaa naacemo yo. 35O Diedo den seligi n yonbidaano boncianla, ke o tua niciamo. O den puni o ti yanbidi leni a yangbenga, ŋanjilifa, wula, a jatuada, a puotuada, ti yuoyuodi leni i ŋunbi. 36N yonbidaano pua Sala den mali o po bonjaga o nikpedi yogunu. O den puni o wan pia yaala kuli. 37N yonbidaano den teni ke n poli ke o yedi: ‹A kan taa n bijua po o pua Kanana yaaba bisiaba siiga, min kaa yaaba yaa diema nni. 38Ama a baa gedi n baadiegu nni leni n buolu yaaba siiga, ki ban taa o pua n bijua po.› 39N den yedi n yonbidaano: ‹Daalinba o jafaano kan bua ki yegi leni nni.› 40O den guani ki yedi nni: ‹O Diedo, min cuoni ki ŋua yua n baa soani o maleki wan yegi leni a, ki teni a sancenli n juodi ki ŋani, ke a baa taa n bijua po o pua, yua n tie n baa buolu leni o diegu nni yua. 41A yaa pundi n buolu kani, a baa faabi leni ŋan den poli n po yaa poli. Bi yaa yie ke a kan taa o, a baa faabi leni ŋan den poli n po yaa poli.› 42Dinla, n bi pundi li caali kani ki yedi: ‹O Diedo, n yonbidaano Abalahama Tienu, a yaa baa teni n sancenli n juodi ki ŋani, 43diidi, n se ki kuu leni li ñinbunli. Yaa jafaano n ñani ki baa luuni ke n yedi o: N mia ŋa, pa nni a cuali nni ñima waamu min ño. 44Li yaa tie ke o yedi nni: Ño fini a ba, ke n go baa luuni a yuoyuodi po. N mia ŋa ke laa jafaano n tua o Diedo n gandi ki bili yaa pua n yonbidaano bijua po.›

45Lanwani, hali ke n daa bi maadi n pali nni ki gbeni, Rebeka bi ñani ki bugi o cuali. O bi jiidi li ñinbunli nni ki luuni mi ñima. N bi yedi o: ‹Pa nni min ño.› 46O bi jiini o cuali o boacabili po tontoni ki yedi nni: ‹Ño, ke n go baa pa a yuoyuodi mo n ño.› N bi ñuni, ke o go teni ke n yuoyuodi mo ñuni. 47N bi buali o: ‹A tie ŋme yaa bisalo yo?› O bi guani ki yedi: ‹N tie Nahori leni Milika bijua bisalo.› N bi tuuni mi ñoagima o miani, ki pilini o a biana. 48Lanwani, n bi ñuani ki labini o Diedo nintuali ki pagi o Diedo, n yonbidaano Abalahama Tienu, yua n den gobidi nni leni ti dugidi ke min taa n yonbidaano waalo bisalo o bijua po. 49Moala, yi yaa dugi n yonbidaano po, ki baa ŋanbi o po, yin waani nni. Li yàá tie yeni mo, yin waani nni, ke n baa lebidi ki teli jienu bi ganu po.»

50Laban leni Betueli den guani ki yedi: «Li naa bonla kuli ñani o Diedo kani, ti kan fidi ki maadi yaala n bia bi yaala n ŋani li po. 51Rebeka ye ne a nintuali, taa o ki gedi wan tua a yonbidaano bijua pua, nani o Diedo n yedi maama yeni.»

52Abalahama naacemo n den gbadi laa maama, o den labini hali tiipo o Diedo nintuali. 53O den puni Rebeka ŋanjilifa, wula leni ti tiayiekaadi. O go den puni o kpelo leni o naa yaa paabu n ŋani boncianla. 54Lan den pendi, wani leni yaa niba n den yegi leni o den dini ki go ñuni, ki duani ku ñiagu likani. Ku tiŋaagu, ban fii yaa yogunu, o naacemo den yedi: «Pa nni mani u sanu min guani n yonbidaano po.» 55O jafaano kpelo leni o naa den guani ki yedi: «O jafaano n go yaa ye leni ti yogunuba nani dana piiga banlu, li yaa pendi, o baa fidi ki yegi leni yi ki kuni.»

56O den guani ki yedi ba: «Yin da teni min go waagi, kelima o Diedo teni ke n sanu pendi. Pa nni mani u sanu, min guani n yonbidaano kani.» 57Lanwani, bi den guani ki yedi o: «Tin yini o jafaano ki buali o.»

58Bi den yini Rebeka ki yedi o: «Naani a bua ki yegi leni o naa joa?» O den guani ki yedi: «N baa yegi leni o.»

59Bi den cedi ke bi waalo Rebeka leni o yualo yegi leni Abalahama naacemo leni o niba. 60Bi den gaali Rebeka ki yedi o:

«Fini ti waalo,

Ŋan tua tuda tuda bam.

A puoliŋuani n diedi bi yibalinba buliñoana.»

61Rebeka den fii leni o puotuada ki jagini ti yuoyuodi ki ŋua o joa puoli. O naacemo den taa Rebeka ki fii ki kuni leni o.

62Lanyogunu Isaaka den guani Lahayi-Royi caali kani, ki kali ganu po yaa diema nni. 63Dayenli, ku yenjuagu Isaaka den ñani ki goadi i kuani nni, ki kpaagi. O den yaadi ki diidi ki laa ke ti yuoyuodi kpendi. 64Rebeka moko den yaadi ki diidi ki laa Isaaka, ki jiidi ku yuoyuogu po. 65O den yedi o naacemo: «O naa joa tie ŋme yo, wani yua n kpendi i kuani nni ki togidi ti yeni?» O naacemo den yedi: «Li tie n yonbidaano.» Lanyogunu Rebeka den taa bu kpalibu ki libini. 66O naacemo den waani Isaaka wan den tieni yaala kuli. 67Isaaka den kuani Rebeka o naa Sala gbandieli nni. O den taa Rebeka ke o tua o pua. O den bua o boncianla. Lani n den baagi Isaaka o naa kuuma po.

Currently Selected:

Mi cilima 24: BGP

Highlight

Copy