Mi cilima 22

Abalahama tuo ki baa padi Isaaka

1Laa bonla n den pendi, U Tienu den biigi Abalahama, ki yini o ki yedi: «Abalahama!» O den guani ki yedi o: «Mini nne.»#Heb 11.17-19.

2U Tienu den yedi: «Ŋan taa a bijua, a bonjayenyenga, ŋan bua yua yeni, Isaaka, ki gedi hali Moriya diema nni, ki padi o li padijuukaali min baa waani a yaa juali po.»#2Baj 3.1. 3Abalahama den fii ku tiŋaapanpangu ki paani o ŋunbo li gaali, ki go taa naacenbilie leni o bijua Isaaka. O den yagidi ti daadi mi padifantama po, ki fii ki baa gedi U Tienu n den waani o yaa kaanu. 4Li dataali, Abalahama den yaadi ki noanli ki laa li kaanu hali foagima. 5O den yedi o naacenba: «Yin sedi mani nekanba leni o ŋunbo, mini leni o jawaalo, ti baa gedi hali naponba ki ban kpiagi U Tienu. Li yaa pendi, ti baa guani ki cua yi kani.»

6Abalahama den taa mi padifantama daadi ki tuni o bijua Isaaka, ki kubi u mu leni ki juga o nuu nni. Bani nibilie kuli den cuoni ki caa. 7Isaaka den yini o baa. O baa den yedi o: «Mini na, n bijua.» Lane Isaaka den guani ki yedi o: «Diidi u mu leni ti daadi nne, li padijuukaali pebiga mo nan ye le?»

8Abalahama den guani ki yedi o: «N bijua, U Tienu wani o ba n baa pa li padijuukaali pebiga.» Bani nibilie yeni kuli den suagi liiga. 9Ban den pundi U Tienu n den waani Abalahama yaa kaanu, o den maa li padibinbinli ki maani ti daadi li padibinbinli po. O den loli o bijua Isaaka ki maani o yaa daadi n den maa li padibinbinli po. #Jak 2.21. 10Li yaa puoli, Abalahama den tandi o nuu ki taa ki juga ki baa kodi o bijua. 11Lanyogunu o Diedo maleki den tiani tanpoli po, ki yini o ki yedi: «Abalahama! Abalahama!» O den guani ki yedi: «Mini nne.»

12Maleki den yedi o: «Ŋan da sii o jawaalo yeni, ŋan da tieni o bonbiadiliba kuli, kelima n bani moala ke a fangi U Tienu, ke ŋaa yie ki baa pa nni a bonjayenyenga.»

13Abalahama den gbegi ki noanli, ki laa li petonli o puoli po. Li petonli yeni den ye ku tuugu nni, ke li bonla muubi li yina. Abalahama den gedi ki cuo li petonli yeni, ki padi li li padijuukaali ki lebidi o bijua. 14Abalahama den yini laa kaanu «U Tienu baa pa ti tin luo yaala.» Lani n teni ke bi baa ki tua hali dinla: «O Diedo juali po, o baa pa ti tin luo yaala.»

15O Diedo maleki go den tiani tanpoli po mi taaliema ki yini Abalahama ki yedi o: 16«Mini o Diedo n yedi mine: ‹Nani ŋan tieni lani kuli, ki naa yie n po a bijua, a bonjayenyenga,#Heb 6.13-14. 17n baa seligi a, ki yaa pugidi a puoliŋuani ban yaa yabi nani mi ñincianma jaali tanbiima yeni. A yaabila baa diedi bi yibalinba buliñoana.#Heb 11.12. 18Ŋanduna nibuoli kuli baa baa li seli kelima a yaabila po, kelima a den tuo ki cengi n nialu.› »#JTT 3.25.

19Abalahama den guani o naacenba kani, ke bi fii ki taani ki kuni Beri-Seba po, kelima bi den kaa laa dogu nne.

20Lan den pendi, bi den yedi Abalahama: «Milika moko mali a bonjala a waalo Nahori po.» 21O bijakpelo n tie Utisi, o waalo Busi leni Arami yaa baa Kemueli, 22Kesedi, Haso, Pilidasi, Yidilafi leni Betueli. 23Betueli den mali bonpuoga, ki yini o Rebeka. Bani n tie Milika n den mali yaa bijaniidiba Abalahama waalo Nahori po.

24Nahori puotuado yua n yi Reuma moko den mali o po Teba, Gaham, Tahasi leni Maaka.

Currently Selected:

Mi cilima 22: BGP

Highlight

Copy