Mi cilima 21

Isaaka madi

1O Diedo den seligi Sala nani wan den niani o maama. 2Sala den punbi ki mali Abalahama po bonjaga o nikpedi nni, U Tienu n den maadi ki bili o po yaa yogunu.#Heb 11.11. 3Abalahama den cili wan den baa yaa bonjaga yeli Isaaka, Sala n den mali o po yaa biga yeni. 4Abalahama den kuani o biga Isaaka ku koanciagu, ke o pia dananii, nani U Tienu n den bili o po li ñoamabonli maama. 5Abalahama den pia bina kobiga, o bijua Isaaka n den mali yaa yogunu. 6Sala den yedi: «U Tienu teni ke n baa ti pamandanlaadi. Yua n gbadi kuli baa laa n po.»

7O go den yedi: «Ŋme go den baa yedi Abalahama ke Sala baa ŋaani ki biga? Ama ba yeni, n den mali o po bonjaga o podi nni.»

Abalahama deli Agari leni Isimayeli

8Isaaka den yabidi, ke bi den babidi o li biili. Abalahama den tieni mi jaanjecianma, ban den babidi Isaaka li biili yaa daali.

9Sala den laa ke Ejipiti yua Agari n den mali yaa bonjaga Abalahama po laa ti laadi. 10O den yedi Abalahama: «Deli o puotuado ne leni o bijua, kelima laa puotuado yaa bijua kan taani ki je li faali leni n bijua Isaaka.»

11Laa maama den biidi Abalahama pali boncianla, kelima o bijua po.#Gal 4.29-30. 12Ama U Tienu den yedi Abalahama: «Laa bonla n da biidi a pali, kelima ki biga leni a puotuado po. Ŋan tuo Sala po wan mia ŋa yaala, kelima li tie Isaaka yaa kane ke a baa baa yaa puoliŋuani n baa yaa tie a buolu. #Lom 9.7; Heb 11.18. 13N go baa teni a puotuado yaa bila n tua u nibuolu, kelima o tie a yaa biga.»

14Abalahama den fii ku tiŋaapanpangu. O den taa mi jiema leni li ñinbagili, ki puni Agari, ki ŋuani o o biga, ki cabi o. O den gedi ki kua Beri-Seba fanpienma nni, ki yaadi. 15Li ñinbagili n den gbeni yaa yogunu, o den ŋaa ki biga ku fatuugu soangu nni, 16ki foagidi ki pundi li dabanli toama foaginu, ki nan kali ki tiegi o ki yedi: «Mii bua ki le n biga kuuma.» O den kali yeni ki tegini o ki buudi. 17U Tienu den gbadi ki biga nialu. U Tienu maleki den tiani tanpoli po ki yini Agari, ki yedi o: «Be pia ŋa Agari, ŋan da jie, kelima U Tienu gbadi ki biga nialu wan ye naankani. 18Fii ki taa ki biga ki yaa muubi o, kelima n baa teni wan tua yaa nibuolu n yabi.»

19U Tienu den ŋubidi o nuni ke o laa li caali. O den gedi ki gbieni li bagili mi ñima, ki puni ki biga ke ki ñuni.

20U Tienu den ye leni ki biga, ke ki fandi ki ye mi fanpienma nni, ki tua tuado. 21O den ye Paran fanpienma nni, ke o naa den taa o po o pua Ejipiti diema nni.

Abalahama danli leni Abimeleki

22Lanyogunu, Abimeleki den yegi leni o guudikaaba yudaano Pikoli, ki gedi ki maadi leni Abalahama yaa maama n tie ne: «U Tienu ye leni a, ŋan tiendi yaala kuli nni.#Cil 26.26. 23Lanwani, poli nekanba U Tienu po, ke a kan janbi nni, mini leni n bila, n yaabila leni n puoliŋuani leni ŋan ye yaa diema nni, ke a baa guani mi ŋanma nani min tieni a yaa ŋanma yeni.» 24Abalahama den guani ki yedi o: «N baa poli yeni.»

25Ama Abalahama den funi leni Abimeleki li caali maama po, Abimeleki naacenba n den fie yaali leni u paalu. 26Abimeleki den guani ki yedi o: «Mii bani yua n den tieni laa bonla. A naa den kpa waani nni. Nmo daa den gbadi ma, se dinla bebe.»

27Abalahama den taa i pe leni i ne ki puni Abimeleki, ke bi danli leni biyaba. 28Abalahama den taa pesalilele ki piadi ki sieni ba. 29Abimeleki den yedi Abalahama: «Be yaa po yo ke a piadi ki sieni laa pesaleleedi?»

30O den guani ki yedi: «A baa gaa n kani laa pesaleleedi, ke lan tua siedi, ke mini n gbini laa caali.»

31Li tie lani yaa po ke bi yi laa kaanu Beri-Seba, kelima li den tie lankane ke bi den poli leni biyaba.

32Bi den danli yeni Beri-Seba kaanu kani. Li yaa puoli, Abimeleki den fii, wani leni o guudikaaba yudaano Pikoli, ki guani Filisiti yaaba diema nni.

33Abalahama den ŋuu yaa tiidi n yi tamarisi Beri-Seba kani, ki jaandi Li Miali Diedo U Tienu yua n ye yaa yogunu kuli lankani. 34Abalahama den kali Filisiti yaaba diema nni, ki waagi.

Currently Selected:

Mi cilima 21: BGP

Highlight

Copy