Mi cilima 20
20
Abalahama leni Abimeleki
1 Abalahama den fii lankani, ki kua ganu po yaa diema nni. O den kali Kadesi leni Suri siiga, ki go kali Gerari waamu. 2Abalahama den yedi ke o pua Sala tie o waalo. Gerari yaa bado Abimeleki den teni ke bi taa o po Sala.#Cil 12.13; 26.7. 3Lanwani, U Tienu den doagidi Abimeleki kani ti dangidi nni ku ñiagu ki yedi o: «A baa kpe, kelima ŋan taa yaa pua yeni yaa po. O pia o joa.»
4Abimeleki yua n daa den kua o kani, den guani ki yedi: «N Diedo, naani a baa teni ke yaa nibuolu n tiegi n bodi bi? 5Naani Abalahama wani o ba kaa yedi nni ke o tie o waalo? Omoko den yedi ke o tie o kpelo yo. N den tieni likuli leni li papienli leni yaa nii n ki pia tagiliba kuli.»
6U Tienu den yedi o o dangidi nni: «N bani ke a tieni likuli leni li papienli, lani n teni ke n den yie a po ke ŋan da tieni n po ti tuonbiadi. Li tie lani yaa po ke mii den tuo ke a sii o. 7Moala ŋan guani o joa yeni o pua, kelima o tie saawalipualo. O baa jaandi a po, lani n tie ŋan yaa ye. Ama a yàá guani o, ŋan bandi ke a baa kpe, fini leni a niba kuli.»
8Abimeleki den fii ku tiŋaapanpangu, ki yini o naacenba ki waani ba laa bonla kuli, ke ti jawaanciandi den cuo bikuli. 9Abimeleki go den yini Abalahama ki yedi o: «A tieni ti po be n yeni? N den bii ŋa be yo, ke a teni ke laa tuonbiaciandi cua mini leni n diema kuli po? A den tieni n po yaala ke laa ŋani o nilo n tieni oyua la.» 10Abimeleki den yedi Abalahama: «Be n den ye a yama nni, ke a tieni laa bonbuolu?»
11Abalahama den guani ki yedi o: «N den yedi n pali nni ke mi naa diema n ki fangi U Tienu ba waamu yeni, bi baa kpa nni kelima n pua po. 12Die i moamoani po, o tie n waalo, kelima o tie n baa bisalo. Li tie ke tii taa naa yo, lan teni ke o tua n pua. 13U Tienu n den teni ke n goadi ki foagidi leni n baadiegu yaa yogunu, n den yedi Sala: ‹Diidi ŋan baa tieni n po yaa ŋanbili, tin baa gedi yaa kaani kuli nni.› N den mia wan yedi ke n tie o kpelo yo.»
14Abimeleki den taa i pe leni i ne, ki go taa a jatuada leni a puotuada ki puni likuli Abalahama, ki go guani o o pua Sala. 15Abimeleki den yedi: «Diidi n diema ye a nintuali, ŋan ban kali ŋan bua naani kuli.»
16O go den yedi Sala: «N puni a kpelo kujapiena tudili. Lani n baa tua yaa maalima n doagidi a kpiiba kuli nintuali, ke ŋaa pia tagiliba laa bonla yaa niinni.»
17Abalahama den mia U Tienu ke o paagi Abimeleki leni o pua leni o puotuada kuli, ke bi den fidi ki punbi ki mali. 18O Diedo den teni ke Abimeleki diegu nni puoba kuli den tua ŋoalimu, kelima Abalahama pua Sala po.
Currently Selected:
Mi cilima 20: BGP
Highlight
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
