Mi cilima 15
15
U Tienu kuani o ŋantaado leni Abalama
1Laa bonla kuli n den pendi, o Diedo den maadi leni Abalama li bonlekaala nni, ki yedi o: «Abalama, ŋan da jie, n tie a po a gbankoandigu, ŋan baa baa yaa panpaani baa yaa yabi hali boncianla.»
2-3Abalama den guani ki yedi: «O Diedo n Tienu, ŋan baa pa nni yaala pia n po mi laa fuome, ke n caa ki baa kpe kaa pia biga? Lanwani, n piama kuli faajielo tie n yonbo Elieseri ban mali yua n diegu nni, wani Damasi dogu yua yeni.»
4Lanwani, o Diedo go den maadi leni o ki yedi mine: «Laa tie wani ka baa tua a faajielo, ama li baa yaa tie a bimadiga yua n baa ña a tugu nni, wani n baa tua a faajielo.»
5O den teni ke o ñani o gbandieli nni ke o yedi o: «Diidi tanpoli ŋmabila ki coadi a, a yaa sua ke a baa fidi.» O go den yedi o: «A puoliŋuani baa yabidi yene.»#Lom 4.18; Heb 11.12.
6Abalama den daani o Diedo yedima, lani yaa po o Diedo den coadi o po la ke li tie teginma.#Lom 4.3; Gal 3.6; Jak 2.23. 7O Diedo go den yedi o: «N tie Li Miali Diedo U Tienu yua n den teni ke a ñani Uri po Kalide diema nni. N baa pa ŋa ŋan diedi mi naa diema.» 8Abalama den guani ki yedi o: «Li Miali Diedo U Tienu, n baa bandi ke n baa diedi ma lede?»
9O Diedo den guani ki yedi o: «Ŋan taa yaa naasalo n pia binataa, yaa ŋuasalo n pia binataa, yaa petonli n pia binataa leni kpaajefanyenga leni kpaajenawuunyengu.»
10Abalama den taa laa yandi kuli ki yagidi ti siiga ki bili boagidima kuli man teli miyama. Ama waa den yagidi ti bonyugiditi. 11I kaabi den cua ki jiidi ti nandi po, ama Abalama den deli ba.
12U yienu n den bua ki baa yaa yogunu, mi guacianma den cuo Abalama, li biigicianli den baa, ti jawaanciandi mo den cuo o.#Jb 4.13,14. 13O Diedo den yedi Abalama: «Ŋan bandi ke a puoliŋuani baa ti faa ki kali diemiba nni, ki yaa tie canba. Bi baa tua yonbi laa diema nni, ban waani ba fala hali bina kobinaa. #Ñam 1.1-14; JTT 7.6. 14Ama n baa faligi yaa nibuolu n baa teni ban tua yonbi yeni. Bi baa ti ña likani leni mi piama boncianla.#Ñam 12.40-41; JTT 7.7. 15Ama fini, a baa podi bonŋanla ke a yema mo mani. A yaa ti kpe yaa yogunu, a baa kuni a baanba kani leni mi yanduanma. Bi baa piini a, ŋan guani a danba kani. 16Nifiiminaa yaa yogunu, bi baa guani ki yaa ye nekanba, kelima li baa sua ke Amoriti yaaba biadima yabidi ki tuoni mi bianu.»
17U yienu n den baa ki gbeni yaa yogunu ke li bii cain, o den laa ki buaga ke ki ña i muñii, ki go laa i mukaani ke yi pendi ti yanyagidikaadi siiga. 18Landaali denge ke o Diedo den poli ki niani Abalama ki yedi o: «N puni a yaabila mi naa diema, ki cili Ejipiti kpenu, ki gedi hali u kpenciamu, lani n tie Efrati.#JTT 7.5. 19Laa diema kuli tie Kena, Keni, Kadoma, 20Hititi, Perisiti, Refayimi, 21Amoriti, Kanana, Giligasi leni Jebusi yaaba diema.»
Currently Selected:
Mi cilima 15: BGP
Highlight
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
