Mi cilima 14

Abalama, bi badiba leni Melikisedeki

1Lanyogunu Sineari bado Amirafeli, Elasari bado Ariyoki, Elami bado Kedolaomeri leni Goyim bado Tideali, 2bikuli den taani ki tuogi bu toabu leni Sodomi bado Bela leni Gomori bado Bilisa, Adima bado Sineaba, Tiseboyimi bado Semebela leni Bela, yaa dogu n go yi Tisoari bado. 3Sodomi bado leni o lieba kuli den taani Sidima joaloangu nni, yaagu n tie mi ñincianyaama moala. 4Kedolaomeri den paadi ki diedi ba hali piiga n binalie banlu. Ama li piiga n bintaali, bi den fii ki yie o po. 5Li piiga n binnaali nni, Kedolaomeri leni yaa badiba n den ye leni o den fii ki cua ki paadi Refayimi yaaba, Asiteroti-Karinayimi dogu nni, ki go paadi Susima yaaba Hama dogu nni, ki go paadi Emiti yaaba Save-Kirijatayimi dogu nni. 6Ki go paadi Hori yaaba bi juali Seyiiri kani, ki deli ba ki gedini hali Paran seni tibu, yaabu n kuu leni mi fanpienma kani. 7Lanwani, bi den guani ki lebidi ki gedi Eyini Misipati, yuu n go yi Kadesi, ki paadi Amaleki yaaba bi diema nni kuli, ki go paadi Amoriti yaaba, yaaba n kaa Hatisatisoni-Tamari. 8Lanwani, Sodomi bado, Gomori, Adima, Tiseboyimi leni Bela, yuu n go yi Tisoari kuli yaa badiba den taani ki bogini bu toabu Sidima joaloangu nni, 9ki baa tuogi Elami bado Kedolaomeri, Goyim bado Tideali, Sineari bado Amirafeli leni Elasari bado Ariyoki. Badibinaa den tuogi badibimuu. 10Sidima joaloangu den pia ki tinga sinboanma caana boncianla, Sodomi bado leni Gomori bado den sani ki bua ki ciadi bu toabu po, ki den baa a caana yeni niinni. Yaaba n sieni den sani ki kua a juana nni. 11Yaaba n den paadi ba den fagi Sodomi leni Gomori piama leni bi bonjekaala kuli ki ban caa. 12Bi go den cuo Abalama waalo bijua Loti yua n den kaa Sodomi leni o piama kuli ki ban caa.

13Niyendo yua n den fidi ki sani ki cia den cua ki waani Hebilu yua Abalama yaala n den tieni kuli. Omo den kaa Manmire, seni tiidi kani. Manmire den tie Amoriti yua, ki tie Esikoli leni Aneri kpelo. Bani n den pia o ŋantaado leni Abalama. 14Abalama den gbadi ke bi cuo o kpiilo. O den taani o naacenba yaaba n den mali o diegu nni, kobitaa n piiga n nibinii yaaba yaa pala n pa. O den teni ba ti jatiadi, ki fii ki ŋoadi bi badiba hali Dan dogu nni. 15O den boagidi o toatieba, ki baa bi badiba ku yagisiigu. O den pua ki paadi ba, ki deli ki gedini ba hali Hoba dogu, yuu n ye Damasi dogu jienu po. 16O den taa ki guani mi piama kuli, ki go guani Loti o kpiilo, o piama, bi puoba leni ban den cuo yaa niba kuli.

17Abalama n den paadi Kedolaomeri leni yaa badiba n den ye leni o ki guani ki kuni, Sodomi bado den ñani ki baa tuogi o Save joaloangu nni, yaagu n tie o bado yaa joaloangu.

18Salem bado Melikisedeki den teni ke bi cuani dupen leni duven. O den tie tanpolijoma Tienu yaa kopadiciamo.

19O den gaali Abalama ki yedi:

«Tanpolijoma Tienu,

Yua n tie tanpoli leni ki tinga tagido,

Wan seligi Abalama.

20Tanpolijoma Tienu n baa ti pagidi,

Wani yua n den mubini a yibalinba a nuu nni.»

Abalama den puni o diim wan den baa yaala kuli siiga.#Heb 7.1-10.

21Sodomi bado den yedi Abalama: «Pa nni bi niba, ki taa mi piama kuli a yuli po.»

22Abalama den guani ki yedi Sodomi bado: «N yugidi n nuu ki poli o Diedo, tanpolijoma Tienu nintuali, wani yua n tie tanpoli leni ki tinga tagido, 23ke n kan gaa yaala n tie a yaa yaala kuli siiga ba gaalifanu, ki buali cacaagbansiama, ke ŋan da ti faa ki yedi ke fini n teni ke Abalama tua piado. N kan gaa puu n yuli po. 24Ama ŋan pa n jawaaba n den dini yaala leni yaa jaba n den yegi leni nni yaa biinu, Aneri, Esikoli leni Manmire yeni. Bani wani baa gaa bi biinu.»

Currently Selected:

Mi cilima 14: BGP

Highlight

Copy