Jesu Tondiba Tuona 11

Pieli n togidi Jerusalemi yaaba yaala

1Jesu tondiba leni bi kpiiba yaaba n sieni ki ye Jude nni den gbadi ke bi nilanba tuo ki ŋoadi U Tienu maama. 2Pieli n den guani Jerusalemi po, yaaba n den daani siiga, yaaba n ñii ku koanciagu maama den funi leni o 3ki yedi o: «A den cani a jifola ki go dini leni ba.»

4Pieli den doagidi bi po yaala n tieni kuli, 5ki yedi: «N den ye Jope ki jaandi, ke li ti tua n po nani ti dangidi yeni, ke n laa li bonlekaala nni, ke yaala n tie nani bu kpalicianbu yeni ñani tanpoli po, ke bi muubi bu ñoakunnaadi kuli, ki jiini hali n kani. 6N den diidi bu niinni bonŋanla, ki laa ŋanduna yandi, ti fuayandi, yaala n balini leni ti bonyugiditi kuli. 7N den gbadi u nialu ke u yedi nni: ‹Pieli, fii ki kpa, ki ŋmani!› 8Ama n den guani ki yedi: ‹N Diedo, n kan tieni yeni, kelima yaala n tie kuali bi yaala n joagini kuli daa kua n ñoabu nni, ba yenma.› 9U nialu go den maadi tanpoli po miliema ki yedi: ‹U Tienu n yedi ke yaala n ŋani, ŋan da nua la ke li joagini.› 10Li den tieni yeni hali taalimitaa. Li yaa puoli, likuli den guani ki doni tanpoli po.

11Lanyogunu, nibitaa den cua min ye yaa diegu nni. Bi den soani ba ke bi ñani Sesare ki cua n kani. 12Mi Fuoma den waani nni, ke min yegi leni ba ki da bangi liba. Ti kpiiba yaa niluobidiba n tie ne, den yegi leni nni, ke ti pundi ki kua Korneyi diegu nni. 13O den togidi ti wani mo n laa yaala. Maleki den doagidi o kani o dieli nni, ki yedi o: ‹Soani Jope po, ban ban yini Simon, ban yi yua Pieli ke wan cua a kani. 14O baa waani a yaa maama n baa tua yi po mi tindima fini leni a deni yaaba kuli.› 15Min den cili ki maadi yaa yogunu, U Tienu Fuoma Yua den jiidi bi po, nani wan den kpa jiidi ti po maama yeni. 16Lani n den tiadi ti Diedo maama yaama n tie ne: ‹Jan den batisi yi leni mi ñima, ama U Tienu baa batisi yi leni U Tienu Fuoma Yua.› #JTT 1.5. 17U Tienu yaa den puni bani moko yaa paabu n da leni wan den puni ti yaabu, tin den daani o Diedo Jesu Kilisiti yaa yogunu, nmo tie ŋme ki baa yie U Tienu po?»

18Yaaba n den funi leni o yeni n den gbadi li maama fuuli, bi den cedi, ki kpiagi U Tienu ki yedi: «Lanwani, U Tienu puni bi nilanba moko ke bi baa u sanu ki lebidi bi pala, ki baa li miali.»

Kilisiti Nitaanli cilima Antiosi dogu nni

19Etienni kuuma yogunu, yaaba n den yadi kelima o falabiado po, den gedi hali Fenisi diema, Sipiri kpendegili leni Antiosi nni kuli. Baa den wangi nitoaba kuli U Tienu maama, kali Jufinba bebe.#JTT 8.1-4.

20Ama bi siiga bi tianba, yaaba n tie Sipiri leni Sireni diema yaaba, den gedi Antiosi, ki maadi leni yaaba n kaa tie Jufinba moko, ki wangi ba o Diedo Jesu Laabaaliŋamo. 21O Diedo paalu den ye leni ba ke bi niba boncianla tuo ki lebidi ki daani o Diedo.

22Li laabaalo den pundi Kilisiti Nitaanli kani Jerusalemi, ke bi soani Barnabasi Antiosi. 23Wan den pundi ki laa U Tienu ŋanbili, o pali den mangi. O den tundi bikuli ke ban yaa ŋua o Diedo leni payenli. 24O den tie niŋamo, ki gbie leni U Tienu Fuoma Yua leni li dandanli moko. Bi niba boncianla den lebidi ki tuo ki ŋoadi o Diedo.

25Lani n pendi, Barnabasi den fii ki gedi Tarsi, ki baa n lingi Soli. 26Wan den laa o, o den cuani o Antiosi. Hali binmunli bi den taagi leni likani Kilisiti Nitaanli, ki bangi bi niba boncianla. Li den tie Antiosi ke bi cili ki yini bi ŋoadikaaba Kilisiti yaaba.

27Lanyogunu bi saawalipuaba, den ñani Jerusalemi ki cua Antiosi. 28Bi siiga nni yendo ke bi yi o Agabusi, den fii ki pua saawali kelima U Tienu Fuoma Yua paalu po, ki yedi ke mi koncianma baa baa ŋanduna kuli.#JTT 21.10.

Mi den baa Kilodi#11.28 Kilodi: Kilodi den tie Loma yaa badiciamo yo. Tin go tiadi ke lanyogunu po, Loma n den die ŋanduna. n den tie badiciamo yaa yogunu. 29Jesu ŋoadikaaba den jagi ki bili, ke bi siiga yuakuli baa todi wan fidi maama, ban taani ki soani bi kpiiba yaaba n ye Jude nni po. 30Bi den tieni yeni ki soani Barnabasi leni Soli, ke bi gedini mi todima yeni ki ban teni Jude nikpela.

Currently Selected:

Jesu Tondiba Tuona 11: BGP

Highlight

Copy