Jesu Tondiba Tuona 12

Jufinba yudanba kpa Jaki, ki cuo Pieli ki luoni

1Lanyogunu, o bado Herodi#12.1 Herodi: Herodi yeni tie ban maadi yua yaa maama Luki 1.5 yaa yaabili yaa maama. den cili ki wangi Kilisiti Nitaanli siiga, nitianba fala. 2O den teni ke bi kpa Jan kpelo Jaki leni ki jugisiega. 3Wan den laa ke li mangi Jufinba, o go den cuo Pieli. Li den tie yaa dupen n ki pia dabinli jaanma dana. 4Wan den cuo Pieli, o den kuani o li kpaadidieli nni ki puogi bi toatieba caganaa, ban yaa guu o. Cagiyenli kuli den pia nibinaa ke bi guudi ki lebidi. Herodi den jagi ke mi Pendima jaanma n yaa pendi, o baa jia Pieli buudi bi niba kuli nintuali. #Ñam 12.1-27. 5Lani, bi den guu Pieli li kpaadidieli nni. Ama Kilisiti Nitaanli den miadi o po U Tienu, kaa cedi.

U Tienu faabi Pieli

6Herodi n baa faa ki jia Pieli buudi bi niba nintuali yaa ñiagu, Pieli den luo leni kuseselilie, ki dua ki goa toatiebilie siiga. Yaa toatieba n se ki guu mo den ye li kpaadidieli buliñoajabu kani. 7O Diedo maleki den ludi ki cua Pieli kani, ke mi yenma yendi li kpaadidieli nni. Maleki den maa Pieli kalu, ki fundi o ki yedi: «Fii tontoni.» Lanyogunu i kuseseli den pidi o nii kani ki baa. 8Maleki go den yedi o: «Ñagini a gbanñagidigu, ki pili a cacaadi.» Pieli den tieni yeni. Maleki go den yedi o: «Goli a kpalibu, ki ŋoadi nni.» 9Pieli den ŋua o ki ñani li kpaadidieli nni, kaa bani maleki n tieni yaala yaa tie moamoani. O den tama ke li tua o po nani ti dangidi, ke o laa li bonlekaala yeni. 10Bi den pendi o jiidikpialo leni yua n ŋua, ki pundi yaa buliñoajabu n lo ti kuboandi bonluodigu, ki tiegi u dociamu. Bu den luodi bi po buba, ke bi ñani ki tagi u sanu. Lanyogunu maleki den ŋaa Pieli.

11O yama n den guani, o den yedi: «N bandi moala bonŋanla, ke moamoani o Diedo soani o maleki, ki gaa nni Herodi nuu nni leni Jufinba n bua ki tieni nni yaala kuli po.» 12Wan den bungi yaala n tieni yeni, o den gedi Jan ban go yi yua Marki yaa naa Mariyama denpo. Li den sua ke bi niba boncianla taani likani, ki miadi U Tienu. 13Pieli n den pua bu buliñoajabu kani, yaa jafaano n tuuni ku diegu nni ke bi yi o Rodi, den nagini ki cengi. 14O den bandi Pieli nialu, ama o pali n den mangi maama po, waa luodi bu buliñoajabu. O den sani ki ban waani yaaba n ye ku diegu tugu nni, ke Pieli se bu buliñoajabu kani. 15Bi den yedi o: «A gaadi!» Ama o den ñii ke wan yedi yaala tie moamoane. Lani, bi den yedi: «Li baa yaa tie o maleki yo.» 16Ama Pieli n den baa ki pua bu buliñoajabu kani, bi den luodi ki laa o, ke li paki ba. 17Pieli den tia ba o nuu ke ban suo, ki togidi ba o Diedo n ñani o li kpaadidieli nni maama. O go den yedi ba: «Yin waani mani Jaki leni ti kpiiba yaala n tieni.» Lani, o den ñani ki gedi poto.

18Lan den fii ki faa, bi toatieba yama den yagi boncianla, ke bi bungi ki bua ki bandi yaala n den tieni Pieli. 19Herodi n den teni ke bi lingi kaa laa o, o den buni ti buudi leni li kpaadidieli jiidikaaba, ki jia ke ban ñani ba ki kpa ba. Lani n pendi, Herodi den ñani Jude nni, ki gedi Sesare ki ban ye.

Herodi kuuma

20Herodi pali den beni leni Tiiri leni Sidon yaaba. Bi den taani ki cua o kani. Ban den kuani o ŋantaado leni Herodi badibaanlo, yua n yi Balatusi, bi den mia Herodi ke wan guani ki mangi leni ba kelima bi diema jiema den ña Herodi diema nne.

21Herodi n den bili yaa daali li taanli po n den pundi, o den bobi o baditiadi ki kali o bali kalikaanu, ki maadi ke li waagi. 22Ku niligu den cengi o ki kpaani: «Laa tie nisaalo ka maadi, li tie yua n tie nani U Tienu n maadi.» 23Lanyogunu o Diedo maleki den pua o, kelima waa kpiagi U Tienu. A sidibila den kua o ke o kpe.

24U Tienu maama den pugidi, ki yadi i kaani kuli.

25Barnabasi leni Soli n den caa Jerusalemi yaaba Antiosi yaaba tondu, bi den taa Jan, ban go yi yua Marki, ke o yegi leni ba ki fii ke bi guani ki kuni.

Currently Selected:

Jesu Tondiba Tuona 12: BGP

Highlight

Copy