Jesu Tondiba Tuona 10

Korneyi yini Pieli o denpo

1O joa den ye Sesare dogu nni ke bi yi o Korneyi. O den tie toatieba kobiga cagili yudaano. Laa toatieba den tie Itali#10.1 Itali: Yeni tie diema ke mi docianmoanu den tie Loma. O badiciamo den tie Sesari. Korneyi den tie Loma diema yua, kaa tie Jufi, kaa kua koanciagu. diema yaaba. 2O joa yeni den ŋua U Tienu, ki fangi o, wani leni o diegu nni yaaba kuli.#10.2 Loma yaaba den ŋua yaa buli n yabi. Ba ke bi daa den gbadi Jesu Laabaaliŋamo, bi siiga tianba, nani Korneyi yeni, den lebidi ki cedi i buli ŋoadima ki jaandi U Tienu nani Jufinba yeni. O den puuni Jufinba boncianla mi todima ki go jaandi U Tienu yogunu kuli.

3Dayenli, li yenlebidili yogunu, o den laa li bonlekaala nni, ke U Tienu maleki kua o kani ki yedi o: «Korneyi!»

4O den noanli maleki ke ti jawaandi cuo o ke o yedi o: «N Daano, a yedi be?» Maleki den guani ki yedi o: «A jaandi leni a ŋanma a luoda po pundi U Tienu kani. Waa sundi li po. 5Moala ŋan soani bi jaba ban gedi Jope ki ban yini Simon, ban go yi yua Pieli, wan cua a kani. 6O cani o jabido Simon, yua yaa diegu n baali mi ñincianma.» 7Maleki n den ñani o kani, o den yini o naacenba siiga nibilie leni yaa toatieba n kuu o siiga yendo, yua n fangi U Tienu ki ŋua o. 8O den togidi ba yaala n tieni kuli, ki soani ba Jope.

9Lan den fii ki faa, ki bua ki pundi u yensiinu, bi jaba yeni den ye u sanu nni, ki kuu Jope. Pieli mo den doni ku doangu yuli po ki baa jaandi. 10Mi koma den cuo o ke o bua ki je. Ban den ŋanbidi o po mi jiema yaa yogunu, o den laa li bonlekaala. 11O den laa ke tanpoli luodi, ke yaa bonla n tie nani bu kpalicianbu yeni ñani tanpoli po, ke bi muubi bu ñoakunnaadi kuli ki jiini hali tiipo, 12ke ki tinga yandi, li bonbalinkaala leni ti bonyugiditi buoli kuli ye bu kpalicianbu yeni niinni. 13U nialu den yedi o: «Pieli, fii ki kpa, ki ŋmani.» 14Pieli den yedi: «O Diedo, n kan tieni lani, kelima n daa ŋmani yaala n tie kuali leni yaala n joagini ba yenma.» 15U nialu yeni go den maadi miliema ki yedi o: «U Tienu yaa yedi ke yaala n ŋani, ŋan da nua la ke li joagini.» 16Li den tieni yeni taalimitaa, ki guani ki doni tanpoli. 17Pieli n da den kpaagi ki bua ki bandi wan bi laa yaa bonlekaala yeni n bua ki yedi yaala, Korneyi n soani yaa jaba den buali ki bandi Simon diegu n ye naankani, ki sedi bu buliñoajabu kani. 18Bi den kpaani ki buali Simon ban go yi yua Pieli yaa cani lankane.

19Pieli n den baa ki bungi li bonlekaala yeni n bua ki yedi yaala, U Tienu Fuoma Yua den yedi o: «Cengi, nibitaa#10.19 I kaantiami, bi yedi nibilie, kaantiami mo, bi yedi bi niba. cua ki lingi a. 20Fii ki jiidi, ki yegi leni ba ki da bangi liba, kelima mini n soani ba.» 21Pieli den jiidi, ki yedi bi jaba yeni: «Mini n tie yin lingi yua. Be n cuani yi ne?» 22Bi den yedi o: «Toatieba kobiga yudaano Korneyi n soani ti a kani. O tie niteginka, ki go fangi U Tienu. Jufinba buolu kuli tiendi o po yaa siedo n ŋani. U Tienu soani maleki o kani ki waani o ke wan yini a ŋan cua o denpo, wan gbadi ŋan baa yedi yaala.» 23Pieli den kuani ba li dieli nni, ki gaa bi cangu. Lan den fii ki faa, o den fii ki yegi leni ba. Bi kpiiba yaaba n ye Jope siiga bi tianba den ciani o.

24Li dalieli, bi den pundi Sesare. Li sua ke Korneyi den yini o kpiiba leni o buakaaba, ke bi taani ki guu ba. 25Pieli n den kua yaa yogunu, Korneyi den tuogi o ki biali o ki gbaani o taana kani. 26Pieli den fiini o ki yedi o: «Fii, nmoko tie nisaale.» 27Pieli leni Korneyi n den boe ki koa o diegu nni, Pieli den laa ke bi niba taani boncianla. 28O den yedi ba: «Yi bani ke li kua ke Jufi n taani leni o nilamo, yaa ka ki kua o diegu nni. Ama U Tienu doagidi n po ke min da go nua oba kuli ke o joagini U Tienu po. 29Lani n teni ke yin den soani ke bi yini nni yaa yogunu, n den fii ki cua kaa bangi liba. Lanwani, be yaa po ke yi soani ke bi yini nni?»

30Korneyi den guani ki yedi: «Dinla danataa, li yenlebidili yogunu, n den ye n dieli nni ki jaandi. Yaa joa n la yaa tiadi n ñuliti den ludi ki doagidi n kani, ki yedi nni: 31‹Korneyi, U Tienu gbadi a jaandi, ki go tiani a todima a luoda po. 32Ŋan soani Jope po, ban ban yini Simon ban go yi yua Pieli. O cani o jabido Simon, yua yaa diegu n kuu leni mi ñincianma.› 33Lanyogunu lige, ke n den soani ban yini a. A ŋanbi leni ŋan cua. Moala, tikuli ye U Tienu nintuali ki bua ki gbadi wani o Diedo n yedi a yaala kuli.»

Pieli n waani Korneyi leni o deni yaaba yaala

34Pieli den yaadi ki yedi: «Moamoani, n bandi moala ke U Tienu ki gagidi bi niba leni biyaba. #Tia 10.17. 35Yua n fangi o ki tiendi yaala n tiegi, wan tie yaa nibuolu kuli, baa fidi ki cua o kani. 36U Tienu den soani u tondu Isidayeli yaaba po, ki waani ba mi yanduanma Laabaaliŋamo, kelima Jesu Kilisiti yaa po. Wani n tie bi niba kuli Diedo. 37Yi bani ke Jan den wangi bi niba ke ban lebidi bi pala, wan batisi ba. Li yaa puoli, yi go bani yaala n den cili ki tieni Galile diema nni, ki yuandi ki tieni Jude diema nni kuli. 38Yi go bani U Tienu n den teni ke o Fuoma Yua jiidi Jesu Nasareti yua po, ki gbie o niinni, ki puni o u paalu maama. Yi go bani ke o den caa i kaani kuli ki ŋanbidi bi niba po, ki faabidi Sutaani n den miabi yaaba kuli, ki paagidi ba kelima U Tienu den ye leni o.

39Ti tie siedinba wan den tieni yaala Jufinba diema nni leni Jerusalemi nni kuli. Bi den joani o ku daagu po, ki kpa o. 40Ama li dataali daali, U Tienu den fiini o bi tinkpiba siiga, ki teni ke o doagidi o yuli ti po. 41Waa den doagidi o yuli Jufinba kuli po ka, kali U Tienu n den tuodi ki gandi yaa siedinba po, tinba yaaba n den taani ki di ki go ñu leni o, wan den fii bi tinkpiba siiga yaa yogu. 42Wani Jesu den puogi ti ke tin yaa wangi bi niba o Laabaaliŋamo, ki yaa tiendi siedi ke U Tienu dini o li bali, ke wan yaa tie o bujialo yaa niba n fo leni yaaba n kpe kuli po. 43Bi saawalipuaba kuli maadi o maama, ki yedi ke yua n tuo ki daani o kuli baa baa sugili o tuonbiadi po, kelima o yaa yeli po.»

Bi nilanba baa U Tienu Fuoma Yua

44Pieli n da den maadi yaa yogunu, U Tienu Fuoma Yua den jiidi yaaba n cengi o maama kuli po. 45Li den paki yaaba n den daani ki tie Jufinba ki yegi leni Pieli kuli, ban laa ke U Tienu puni bi nilanba o paabu, yaabu n tie U Tienu Fuoma Yua, ke o jiidi bi po.#10.45 Jufinba yaaba n kua Jufinba koanciagu. 46Bi den bandi ke U Tienu puni ba o paabu, kelima bi den gba ke bi maadi mi malanma ki kpiagidi U Tienu.

47Lani, Pieli den yedi: «Yaa niba n tie ne baa U Tienu Fuoma Yua nani timoko n den baa maama. Ŋme n baa fidi ki yie bi po ke tin da batisi ba mi ñima nni?» 48O den teni li ñoamabonli ke ban batisi ba Jesu Kilisiti yeli nni. Bi den mia o wan sedi leni ba danaba.

Currently Selected:

Jesu Tondiba Tuona 10: BGP

Highlight

Copy