LUKA 20

Geanyaash Yesu heeda nyasa gheambalmeadaanyi

(Mat 21:23-27; Mar 11:27-33)

1Eaweecha nea ghoanaal buuneeda aba jeeda gheeda sibata ASEETEAN, nea gwarukwiida giijaasta miy, gaweay headaanyi ashoohoodiga hees ea ng'oorshoodiga ea gweargwa 2ak geeyeesha niny, “Rukuneasa gisini ng'asheesu aba gheambalmeedeabeang'a, ea ng'eaha gil siida goonyi gheambalmeani.” 3Ghwasha saawa nea gwayeesha, “Eara aniini gaydaanyaasheagwa ng'asheanjagi, asi arukunean, 4Ghayi giibaatiisanda Yohana gwaleabu humng'eeda ghana leabu heeda buuneeda?” 5Hean gabiissa gwasheang'nyi nea gwayi, “Ghamneawa iisiyeeshi, ‘Gwaleabu humng'eeda,’ gaygwayi, ‘Ghwasaan anda ghayi ak ea moamwasi niny?’ 6Ama siyeeshi, ‘Gwaleabu heeda buuneeda,’ ada gaygafuteasa buuneesean aba lagheanga aba gideaba ghamwas sean gideaba Yohana sibaneeda.” 7Hean ghwasha Saawa nea gwayeesha aseasa meanali heeleabu. 8Gwayeesha Yesu saawa, “Eara aniini ea maydarukuneegwa heeda leabu giimbaliischooni iteanyu easini ng'asheesuun.”

Gida sigala fuga aragan madamnyeanda sabiibu

(Mat 21:33-46; Mar 12:1-12)

9Hean ghoang'eat giibaloolda buuneeda nea gwarukusa galeesu, “Ghayi sih gang'eapsa sabiibu jeeda madamnyeandaanyi, hean gwanung'usa madamnyeandaanyi fuga jea gooragan, ak gawa darooraka sheagi, goobiida hoowa ea gageawiit. 10Goodeendeen ama gul damandida, goojeakta soomjeanda heeda fuga aragan madamnyeandean eataw haghweega mwaatkwa bea sabiibu; ng'ata ghabwar fugiga aragan madamnyeandean ak geanung' gawa nea mwaada gil. 11Iidu goojeakta siidida soomjeanda nuut; hita earada geabwar ea eesawan ak geenung' gawa nea ghabwaspwasaada nea mwaada gil. 12Iidu goojeakta siideaba samwagu; ada geabwar ea gwasawana ak geahoan gawa jarooda. 13Gwayi siidida bea madamnyeanda misabiibuun, ‘Gay dasin naaha? Gaydeajeakta orjeedeanyu aabwariinyi; gwadeepa eesisa mureeda.’ 14Daah fugiga aragan madamnyeandean, gwayeesha geat saawa, ‘Siisi dea jea gwahearaniischi, anung' eabwara ghami ak gabwaaheasa hearaniischooda.’ 15Hean geang'waay orjeedida bea siidean ak geeruuteawa jeeda madamnyeanda sabiibu ak geenuus. Asi heapi siisi bea madamnyeandean iihidu gaygwahindaan fiisu? 16Adaaha gayghoan ama hidu gaygwanuuseada fugiga aragan madamnyeandanyiin ama hit gaygagasa fih suuk jea gwanung'usa madamnyeandaanyi.” Siyiiy ng'asheesu geeyi, “Gagasa ghoashiiy ASEETA!” 17Hean ghoaduup ghaang' saawa, ak gwayeesha, “Abeeda ng'asheesu sing'waardunu naaha bea gideaba:

‘Lagheaneeni aneawa ghaang' fuga deekshi nea meanung' ghoah giliin

niiw lagheaneeda haw washiin’?

18Nea siida jea goobeedeaysa lagheaneeni gaygagiishachi, nea siida was sean ng'adeesa lagheaneeni gay ghang'aal.”

Giinyeashteayda giruteayda gwaadi

(Mat 22:15-22; Mar 12:13-17)

19Muchu gagasa ng'oorshoodiga ea ashoohoodiga hees gichea ghoang'waayda aba damandida, ak ghoawal buuneeda; aba gideaba saawa nijeeng'u gideaba ng'asheesu sigala geadiin geerukuna badahuuka nyaawa. 20Inyeesa geasaach niny nea geegasa gheata miy ak geecheakta fuga hinda geat fuga doobiiweadi, eanyas gheata gichea eaghasta aba ng'asheesu ikaaschiin, ak geayiin geatinga sugoocheanda haw ahaaghwa ng'eanyiida. 21Geanyaash niny nea geeyeesha, “Giinealshoocheanda, geanali gideaba giruku ng'asheega nea giidoabiiwi, nea miduupi siisi haw, ang'iing'i giinaali buuneeda naweeda ASEETA doabiiwaat. 22Heapi, ghwadoabiiwi gideaba geataw Gaysari gwaadi, ghana manda?” 23Gwajeeng'u milmilanda nyaawa ak gwayeesha, 24“Oahiimnaan shiliingajeanda. Uhuuni ea gheawung'su gabeang'a?” Geeyeesha, “Gaba Gaysari.” 25Gwayeesha saawa, “Asaha ghoatawji Gaysari gea Gaysari, ak ghoatawji ASEETA gea was gea ASEETA.” 26Hean gearaay gichea eang'waayda aba ng'asheagaaschi aba madeeda buuneeda; ghahamng'eanyi buuneeda aba gida shaayda ng'asheega ak ghwasiinda sean.

Giinyaashteayda duunooda miyeeda

(Mat 22:23-33; Mar 12:18-27)

27Iidu ghapka headaanyi fiisu ng'ay was Sadukayajeega eena manda duunooda, 28Hean geanyaash nea geeyeesha, “Giinealshoocheanda, Musa ghayi gang'oorneasa gideaba siida iimea orjeeda ghaamwat, nea gwandeawa gatmooda mandeawana diibiga, gaygageanda orjeeda ghaamwat gatmoodida ak gwanyaksa diibiga orjeeda ghaamwat. 29Ghayi gwanda orju ispwa bea ghaamwadagi, gageeshi orjeeda haw, amadu ghami nea ghwanung'wa hiji gatmooda mandeawana diibiga; 30ea deaba iyeenya 31gea deaba samwagu, iidu gwahearan orjoogiga seaniin asispwaan nea gameewa agi ea goosha sean nea gatmoodida ea mandeawana diibiga. 32Iidu eara gatmoodida ghami. 33Heapi eaweeda siituuna buuneeda gatmooni gaygaba ng'eaha? Aba gideaba nighi buuneeda ea ghwahita ispwa.”

34Gwayeesha Yesu saawa, “Orjoogeaba ng'eanyiini gageeshachi, nea geegeena; 35nea fugiga sinung' ghoah gili miisa ng'eanyiita bea hooweaniin nea duunoodida bea miyeedean mageeshachi nea meegeena, 36ea maygabiikta gameewa aba gideaba gaygawuurji malaykajeega, ak saawa ea orjooga ASEETA gil ea gideaba saawa orjooga siituutu. 37Aba iita gideaba gwaduutu buuneeda, eara Musa ghoahiimu aba jeeda ng'ooruutka iita geeta mughuush damanda guursiina Ng'utamiida was ASEETA Abrahamu ea ASEETA Isaka ea ASEETA Yakobo. 38Asi ghamneawa niny mii ASEETA fuga nimeewa gil, aba gideaba ghwanyas sean eaweega aba niny.”

39Ghwasha ng'oorshoodiga mwaatkwa nea geeyeesha, “Giinealshoocheanda, aba hiji girgu huumwa.” 40Ea mudu gwanda siida ammu gabadaksa ghoanyaash ng'asheanda.

Giinyeashteayda iita Gristo

(Mat 22:41-46; Mar 12:35-37)

41Ng'ata gwayeesha saawa, “Gaygwayeendaan saawa gideaba Gristo orjeeda Dawdihi?. 42Aba gideaba gwayi Dawdi aba jeeda gitaabooda nyiigheega,

‘Ng'utamiida gwayeesha Ng'utamiideanyu,

Apteada aba geatindeanyu bea dugwa,

43ea danung' ghoah weajoodigaagu hoorgeeda jea iina geeshangaagu.’

44Abeeda Dawdi iiguura niny Ng'utamiida ghoawdaan orjeedaanyi?”

Yesu gwayeesha buuneeda ashageada ng'oorshoodiga deaweeda

(Mat 23:1-3; Mar 12:38-40)

45Hean nea gwayiing'shi buuneesean gwayeesha ginealangaaschi, 46“Ashageada ng'oorshoodiga, fuga bwariiy gwaleamideawa hang'weaka geawi bwariiy eeyeeniisa seayu aba naadajeega, ea hoorgajeega miyaasiin aba gealga siinealshacheewa, nea eara iiweay gealga ghweelmeeda ghwanyoahaada hoorgajeega madeeda, 47fuga inyeesa gweagiisachi aba gealga masiinung'weega nea aba giimiinoodeaba geat inyeesa ghamwaash ASEETA nea googeawiit. Asi gayghwanyas girgweaksiinda haw.”

Currently Selected:

LUKA 20: BG15

Highlight

Copy