LUKA 19

Yesu ea Sakayo

1Ghwahita mujiineeda Yeriko, ghang'ata nea ghwalach bugusta. 2Abeeda gwanda jeedeaba mujiineani siisi siguura Sakayo, siisi ea haweewa fuga ang'oonyi gwaadi ak ea meanang'ocheanda. 3Siisi abeeda goola gagaseadayi deakta Yesu gideaba siida uurjiini, ak ghwaraay ghwadaah aba seang'ayda eemeeda, aba gideaba niny ea nuwaas. 4Ak iidu ghafwach gawa mwadi, ak gwading'da uhuuda meagheayeanda ghwadaah, aba gideaba gaygwasku naweedida. 5Hita Yesu deascheeda mida goong'weersa uhuuda geeta ak gwayeesha, “Sakayo lamwaja rarang'aana, aba gideaba gamiisean deabiida gheang'u askweareani.” 6Ghwalamwach ghwararang'aan ak ghwadeapta nea gahoosan. 7Iidu nea ghwadaah ng'asheanji ghoaniikgh sean nea gwayi, “Nuwa ghoah rabascheanda aba gheeda siida riing'eeda.” 8Ghang'eat Sakayo ghamiinaada ak gwayeesha, “Ng'ula, Ng'utamiida, gaydalach bugusta haleanjeedeanyu ak ghaadawji fuga barbari, ak iimida siida naareachi gida aba fughareeda, gaydeadeelsa niba aang'waan.” 9Gwayeesha Yesu niny, “Askweareani lealeanooda nihidu gheawi aba gideaba eara niny orjeeda Abrahamu. 10Aba gideaba Orjeeda siida ghwahidu gagasa nea gwalealu diita roadiin.”

Gida sigala shiliingajeanda sisna dahaabu

(Mat 25:14-30)

11Iidu nea ghwayiiy ng'asheesu, hean gwarukuta aba galeega, aba gideaba nineekiisa Yerusalemu, aba gideaba saawa ghaghay gil sugoocheanduumeeda ASEETA gaygabean ghwadaajiit. 12Gwayeesha, “Ghayi gwanda siisi haw siiwal gheang'da, weah bareanyeeka ng'eanyiida sheagi eataw uurda sugoocheanduumeeda, ak gabiigu. 13Hean gaguursa fih damanamughuush aba jeeda soomjoagaaschi, gaba nih adaw lapiyaji bughala ak gwayeesha, ‘Agadiyeata ea dabiigu.’ 14Ak siisi ghwasit fuga ng'eang'da nyaawa ak geecheaksa buuneeda eeyeesha, ‘Aseasa meegasi siisi ghoahaaghwaneasa.’ 15Iidu nea gabiigu siidida nea ninyas uurda sugoocheanduumeadaanyi ghwanung' eeguursa soomjoogiga ghayi adaw lapiyaan ghoanaal niba siisi nyas gea deanaan aba gadiyeadaanyi. 16Ghwahidu dea madeeda headaanyi ak gwayeesha, ‘Ng'utamiida, lapiyeadaang'u apughala niji suuk bughala.’ 17Gwayeesha niny, ‘Ghoahiit guwoosi soomjeanda miy! Aba gideaba guwoosi doabiiwaat aba ng'asheanda mwanang' gajambala mujiinaji damanamughuush.’ 18Ghwahidu Soomjeandeaba iyeenya ak gwayeesha, ‘Ng'utamiida, lapiyeadaang'u aharadam ea damanamughuush niji suuk haradam ea damanamughuush.’ 19Gwayeesha nih, ‘Ang'iing'i ambala mujiinaji muut.’ 20Ng'ata ghwahidu nuut ak gwayeesha, ‘Ng'utamiida, sukwaanji lapiyeadaang'u atamanamughuush ghayi igooni, geadiiwsi jeeda weasta; 21ghaawaleey, aba gideaba guwoosi siida ng'waan iissa gigeandi gida miidaang'u ak gilaji gea mihistani.’ 22Gwayeesha niny, ‘Gaydeargweaksiinaneey ng'asheanda ghuutaang'u, soomjeanda muy! Ginali gideaba geawooschi hang'waay geageandi gida mii deanyu, ak ghaalaji gea meahistani? 23Ak ghwasaan anda miigadiyeata lapiyeedeanyu gwaji suuk, ama aahidu geageandi sean ea gea ahaada?’ 24Hean gwayeesha fugiga miinaada aba hooweaniin, ‘Oareada lapiyeeni mideawean ak ghoatawji siidida mideawa bughalaan.’ 25(Geeyeesha niny, ‘Ng'utamiida, gwandeawa lapiyaji bughala!’) 26‘Geayeeshiineegwa, Aba gideaba siisi agar gil gajeeheasa, nea siidida meagara giliin, eara gidida mwanang' mideawean gajeareat. 27Ak fugiga was weajoodigeasu magassa gideaba gaydaahaaghwa saawaan, ayeani hiji ak goonuuseadi aba madeedeanyu.’”

Hiteayda Yerusalemu ak geadeaptaawa hooseaneega

(Mat 21:1-11; Mar 11:1-11; Yoh 12:12-19)

28Iidu nea ghoahiit ng'asheesu, goosheedeawa saawa, ak ghwascheang'da gawa Yerusalemu. 29Hean neekiisa Betfage ea Betaniya, nea neeki Giijeeda Saytuunajeega, goojeakta fih iyeenya aba jeeda ginealangaaschi, 30nea gwayeesha, “Aweayeena gharang'dida mida mwadiin iyoahiti gajanyasana hoowa gureenda digeeda nea radaat nea eara giinealda ea miyeanaal, gootinyi ak gooyeadu hiji. 31Iideepa ghoanyaasheagwa sih gideaba, ‘Ghwasaan anda gootinyi?’ Gooyeeshi, ‘Gagasa Ng'utamiida.’” 32Gaweay fugiga siicheaktean, amahita hoowa ghwadaakta gidagwachi rukusiinda saawa. 33Damandida siitina gureendean, gwayeesha fiibwa, “Ghwasaan anda gootiinyi gureenda?” 34Geeyeesha, “Gagasa Ng'utamiida.” 35Gearjaanda ea ghwahita heeda Yesu, geegeanu hang'weaka eayiin badayda gureenda amahit geanung' gwading'da Yesu badayda ak goopteadawa. 36Damandida beawaan, gageanu buuneeda ak ghoabwarghaan hang'weaka nyaawa aba naweeda. 37Iidu nea gwaneekiisa rarang'eadayda Giijeeda Saytuunajeega, gang'weela fuga saang'a was ginealangaaschi nea gwaduumsheesa ASEETA aba ghuuta haw aba gadiyoojiga hees sean sidaah, 38nea geeyi, “Ning'usha ASEETA sugoocheanda wuna gheawunga Ng'utamiida! Niiw hoyyoo aba humng'eeda ea giigheambiita aba hoowa bea humng'eedean.” 39Gwayeesha Farisaayajeesu ng'ay mida jeedeaba eemeedida, “Giinealshoocheanda, reekusiina giinealangaagu.” 40Ghwasha nea gwayeesha, “Geayeeshiineegwa, inyas ghwasiinda saawa, gaygoojuur lagheanga.”

Yesu gagutu heareega aba badayda Yerusalemu

41Iidu nea gwaneekiit mujiini ak ghwadaah gooyeawusa, 42nea gwayi, “Gideabali gwachi eara ang'iing'i ginali eaweecheanji miisa hoyyoohiin! Ak ghamneawa ea siiwiimwa gheanyangaagu. 43Aba gideaba gayghwahidu eaweeda jea gooneaweeseey weajoodigaagu, gajeeneaweeseey ak geebeasheesinaneey meatkwajeega sean, 44ak gaygwajakseeyi ang'iing'i ea diibigaagu ng'eanyi nea ea mwajeanung'usa lagheana uhuumba nuut aba jeedeang'wa aba gideaba mii jeeng'ni damanda jea eebareasiinaneegwa.”

Yesu gawa jeeda gheeda sibata ASEETA

(Mat 21:12-17; Mar 11:15-19; Yoh 2:13-22)

45Hean gawa jeeda gheeda sibata ASEETA ak gooruuta fugiga shaayda haleanjeedean, 46ak gwayeesha saawa, “Geang'waar gideaba, ‘Gheawi iteanyuun gayghoah heechea gamoora buuneeda ASEETA ghawooda’; ak ghoanung' ghoah gwaleeda jea gafunya geat mareanghooga.” 47Inyeesa goonealshi galeagasean aba jeeda gheeda sibata ASEETA. Nea ashoohoodiga hees ea ng'oorshoodiga ea fuga hees was ashoohoodiga buuneeda ghamwaal gichea gwanuusta niny; 48ak ea meanyasa gichea eesin aba gideaba geeleeysiit buuneesean.

Currently Selected:

LUKA 19: BG15

Highlight

Copy