LUKA 21

Gidasabwa geadi gatmooni was masinung'weanda

(Mar 12:41-44)

1Ng'ata gang'ula ak ghwadaah gida iinda meanang'oodiga haleanjeeda sisapa geadi bea ghadooweeda jeeda gheaseeda. 2Ghwadaa eara masinung'weanji bwarbwar nea ghwayiin jeeda gida heelaji iyeenya ak ghwahit. 3Ak gwayeesha, “Geayeeshiineegwa aba huumwa masiinung'weanji bwarbwariin ghoadayda gidahaw ea ghwalaabwa hoowa buuneesean; 4Aba gideaba suurja ghoadayda gidabina jeeda baruureega nyaawa, sinung' niny aba jeeda barbarandaanyi niidayda gidamideawa sean.”

Yesu gabaloola nyarjeawda gheeda sibata ASEETA

(Mat 24:1-2; Mar 13:1-2)

5Iidu nea gabaloola mwaatkwa gheeda sibata ASEETA, gida siitaamdaamda aba lagheanga miyaasiin ea haleanjeeda sisapa geadi bea ghadooweeda gwayeesha, 6“Aba haleanjeeni oong'ulayiin, gayghwahidu damanda jea ea mayghoabit lagheana aba uhuumba nuut jea ea majeeng'adeasa ng'eanyi.”

Sawanadeeda ea ghabasta

(Mat 24:3-14; Mar 13:3-13)

7Hean geanyaash niny nea geeyeesha, “Giinealshoocheanda, ng'asheesu gayghoah eeju, ak gwadeagoodeaba ng'asheesu ea naaha jea ghoahiimu gideaba hinnoodeaba ng'asheesu nineekiit?” 8Hean gwayeesha, “Ashageada adagahutaneegwa siida; gwanda fuga saang'a jea ghapkaana gheawungeasu, nea gwayeena, ‘Siida aniini gil!’ nea ‘Damanda nineekiit!’ Adoayaachi geeshta. 9Inyeesa gajayiinya iita ng'ucheeda ea jaleadinga, ea adoabeali; aba gideaba ng'asheesu gaygoosheeda ghwahidu, nea muudeanooda ea maygabay ghwahidu.”

10Ng'ata gwayeesha saawa, “Gaygaba daroori ng'uchi daroar nuut, ea sugoocheanduumeeni ng'uchi sugoocheanduumeeda nuut; 11gaygwanda sawooda haw bea ng'eanyiida, ak gaygang'eeda geejeadinga aba darooraka sean ea geeyoonung'weaka; ng'asheega jea ghwanung' eahamng'eanyi, ea gwadeagwajeega hees leabu humng'eeda. 12Ak damanda mii gapnu ng'asheesu seaniin gajeang'waanyeagwa ak geesawaneegwa, nea geayaadeagwa gealga siinealshacheewa ak gajeejakseegwa ghealooniga ak gajeayadeagwa madeeda sugoodiga hees ea madeeda fuga hees ambaliischi aba gheawungeasu. 13Ak abeeda gili gayghoah muuwuunooda aba heedeang'wa. 14Asi oong'ooysiina jeesingeagwa ak ea adooteemshi aba gichea ashaayda ng'asheega; 15aba gideaba gaydagooneegwa ng'asheega ea weaghuumeeda jea inyeesa eara weajoodigeagwa ghwaraay ng'alealeeda ghana gichea ghwashaang'da. 16Ak gayghaghaseagwa ghweanigeagwa ea gheamadigeagwa ea orjooga geamadu, ea buweadeegeagwa ea fuga ooduupcheewi nea mwaatkwa gaygwanuuseegwa; 17ak agooga gajeesteagwa aba gheawungeasu. 18Ea mayghwaroat eara buudeanjagi bea iheengeagwa. 19Ak agooga aba milikghteaydeang'wa gajookghuuha eaweegeagwa.

Yesu gabaloola nyarjeawda Yerusalemu

(Mat 24:15-21; Mar 13:14-19)

20“Asi iyoadaayi mujiineeda Yerusalemu nea nineaweesa lugooda, abeeda anala gideaba nineekiit nyaroadaanyi. 21Nea fuga mida Yudeya ea dasalsiina iheenga giijeega, nea gea mida mujiini ea dariteaysiina nea gea mida gharang'da ea adiidu ghapka jeeni; 22aba gideaba eawoojigiga gajea gea sawanadeeda ak ghoah gida nyaashta ng'ooruutka. 23Dashageada gadeemga mideawa diibiga ea gea areerji diibiga aba askwearjoojigiga! Aba gideaba gayghwadaah ng'asheanda ng'waan, aba gideaba gaygwanda sawanadeeda haw jeeda ng'eanyiida ea nyarasta aba badaydeaba fiisu; 24Ak gajeenuuseadawa ng'uta nea suuk geetabwaardaawa jeeda eemoojiga sean nea Yerusalemu gayghoala eemoojiga ea ghwahidu damanda fuga eemoojiga.

Hinooda Orjeeda Siida

(Mat 24:29-31; Mar 13:24-27)

25“Gajadaaha gwadeagwajeega aba gheang'da aseeta ea sheeda ea miinga, gayghwanyas eemoojiga jeeda ng'eanyiida sawanadeeda nea ghahamng'eanyi aba nyeashta laweajajeega basooda, 26buuneeda gaygoohiili aba muuwda aba giimuukghunooda gichea gwahissa ng'eanyiida, aba gideaba uurda mida humng'eeda gajeetuumduum. 27Ak gajeadaah Orjeeda Siida nea ghoana jeeda shamooghooda nea gwandeawa uurda ea giigheambiita haw. 28Asi ghamneawa ng'asheesu iihidu ghoahali geat, amiinaada ak goong'ulay humng'eeda, aba gideaba nineekiit lealnoodeang'wa.”

Gida anaal fih shaboogheecheanda

(Mat 24:32-35; Mar 13:28-31)

29Hean iidu gwarukusa saawa galeega nea gwayeesha, “Ang'ula shaboogheecheanda ea geediga suurja sean; 30Iyoadaayi nea ghafiirfiir seenga nyawiiri, abeeda goojeeng'u gideaba doomeelda nineekiit. 31Asi eara agooga iyoadaayi ng'asheesu nea gapnu, anala gideaba sugoocheanduumeeda ASEETA nineekiit. 32Aba huumwa geayeeshiineegwa jeacheeng'su bea ghamneawean mayghwanaawda nea mii adaaha ng'asheesu. 33Humng'eeda ea ng'eanyiida gaygamuudean. Duuku ng'asheesu ea maygamudean earahay.

Gammiisa giing'weernooda

34“Asi afura geat adagoobal gurooruunatkeagwa beeshkweeda ea booktuumeeda ea eaweesu bea ghamneawean, ea gwashameegwa eaweedida; gawuurji gida ang'oonyiida ghuduumbwaada haleanjeeda; 35aba gideaba nih gichea gwahissiinda fuga sean abiita badayda ng'eanyiisean. 36Asi agooga afura geat galeagasean, nea ghoamwaashchi ASEETA gagooneegwa uurda jea oataraamwa ng'asheesu sean jea gapnuun, ea aminaada aba madeeda Orjeeda Siida.” 37Inyeesa goonealshi askweari aba jeeda gheeda sibata ASEETA, nea eawa gwariteawa jeeda mujiini ak gawa goobiida uhuuda Giijeeda Saytuunajeega. 38Hean inyeesa sakteayda duw gaweay buuneesean headaanyi eeleeysiit aba jeeda gheeda sibata ASEETA.

Currently Selected:

LUKA 21: BG15

Highlight

Copy