YOHANA 18

Ging'ooyda Yesu

(Mat 26:47-56; Mar 14:43-50; Luk 22:47-53)

1Hean iyahiit Yesu rukunoodeaba ng'asheesu gawa giigheawda moangoachiyda Gidironi sea ginealangaaschi, abeeda hoowa gwanda madamnyeanji mwanang', hean gawa Yesu jeeda sea ginealangaaschi. 2Nea abeeda Yudayda jea ghwalabwadaw ninyiin, abeeda ghwanal hoowa; aba gideaba eawoojisu iissa gabadiini hoowa Yesu sea ginealangaaschi. 3Ng'ata gageanu Yuda gharmucheanda shirikara ea furiischoodiga leabu heeda ashoohoodiga hees ea heeda Farisaayajeega, ak goodeana nea gwandeawa gheaboonyanga ea dabita ng'ucheeda. 4Hean jeeng'u Yesu ng'asheanda jea ghwahidu, ng'ata ghoahiimda geaw ak ghoanyaash nea gwayeesha, “Googaseadayi ng'eaha?” 5Ghwasha Saawa nea gwayeesha, “Yesuheeda Nasareti.” Gwayeesha Yesu saawa, “Ada aniini.” Nea abeeda Yudayda jea ghwalabwadaw ghamiinaada aba hoowa sea saawa. 6Hean nea gwayeesha saawa, “Aniini gil,” gabiikta bwadaw ak goobeedeaysa ng'eanyi 7Gabiikta ghoanyaash, “Googaseadayi ng'eaha?” Gwayeesha saawa, “Yesuheeda Nasareti.” 8Ghwasha Yesu nea gwayeesha, “Neada ea mearukuneegwa gideaba aniini gil; asi iyoogassean aniini abeeda ghoanung'waadi fiisu gaweay.” 9Gwarukuta ng'asheesu ak abeeda gwasa ng'asheega ghayi rugu bea gideaba, “Fuga ghayi igoonyean mii dahuta eara akaleala.” 10Abeeda gwandeawa Simon Betaro ng'uta, gooseelu ak ghwalach iita geatinda dugwa bea giing'oonyaneeda ashoohoocheanda haw. Nea giing'oonyaneedida geeguura gheawungaaschi Malko. 11Gwayeesha Yesu Betaro, “Adealda ng'utaang'u jeeda labaldaanyi; heapi, gajea mwaaleaydani gikoombeeyda ghayi goonan Bwaabwa?”

Yesu aba madeeda Anasi

12Ng'ata ghoang'waay Yesu gharmucheandida bea Shirikaraan sea shirikarajeanda haw sea furiischoodiga Yahudi ak geerada. 13Ak geesheeda eayaat heeda Anasi; abeeda gweargweeda agweaji Gayafa gil nea abeeda Gayafa ea ashoohoocheanda haw gil gweaydida. 14Nea Gayafeeni ea siida ghayi rukusa fugiga bea Yahudi gideaba ghang'wana ghami siyagi aba badahuuka buuneedean.

Betaro ghwashaang' Yesu

(Mat 26:69-70; Mar 14:66-68; Luk 22:55-57)

15Iidu ghwaat Simon Betaro geeshta Yesu sea giinealan nuut. Nea abeeda giinealaneeni ghwanal muuchi ashoohoocheanda Haw, hean gawa jeeda doodooda gheeda ashoohoocheanda Haw nea goodeayi Yesu, 16nea Betaro niny abeeda ghamiinaada aba jarooda nea neekeewa gidaghuuta. Iidu gwardu jarooda giinealaneedida nal ashoohoocheanda Hawiin ak goobalool huda fur gidaghuuta, ak ghwaat Betaro gah. 17Hean ghoanyaash Hudida ghwanyawa fur gidaghuudiin Betaro nea gwayeesha, “Muwoosi siyagi aba jeeda giinealangeaba siisi?” Gwayeesha, “Meawoosi.” 18Aba damandida ea nighwar beasta ghuurga soomjooga sea furiischoodiga aba gideaba ghwaraanya gooroogeeda, hean ghamiinaada nea gwaju beasta; aba damandida eara Betaro ghamiinaada aba hoowa nea gwajoohuudayi beasta saawa.

Ashoohoocheanda Haw goonyeari Yesu ng'asheega

(Mat 26:59-66; Mar 14:55-64; Luk 22:66-71)

19Ng'ata ghoanyaash ashoohoocheanda Haw Yesu iita ginealangaaschi ea iita giinealshoadaanyi. 20Ghwasha Yesu nea gwayeesha, “Aniini eawoojisu iissa geabalooli ng'eanyiida aba eeshpwara; nea iissa geanealshi aba jeeda ghoorajeega siinealshacheewa ea jeeda gheeda sibata ASEETA galeagasean, heeda roondooscheesa fuga Yahudi sean; nea moang'wa darukuta ng'asheanda wassean aba makcheameeda. 21Ghwasaan anda giinyaashchaan aniini? Anyaasha fugiga ghayi iiy ng'asheega earukusiin; saawa ghwanal ng'asheega ghayi earukusi.” 22Iing'ata rukunoodeaba ng'asheesu ghwalas madeang'da Yesu furiischoocheanji ghwanyawa miinaada aba hoowa nea gwayeesha, “Nih gidirukusiindi ashoohoocheanda hawi?” 23Ghwasha Yesu nea gwayeesha, “Iineargu ng'asheanda muy abeeda gimuuwu munyindaanyi ea ng'asheanda was, ama ghwanyawa eargu ng'asheanda nea ghwadoabiiw, abeeda gilaksean naaha?” 24Hean ghwanung' Anasi eerada ak geayaat heeda Ashoohoocheanda Haw was Gayafa.

Betaro gabiikta ghwashaang' Yesu

(Mat 26:71-75; Mar 14:69-72; Luk 22:58-62)

25Aba damandida Simon Betaro gudughamiinaada nea gwaju beasta. Hean geanyaash nea geeyeesha, “Heapi eara ang'iing'i muwoosi siyagi bea jeeda ginealangaaschi?” Ghwashaang' niny nea gwayeesha, “Meawoosi.” 26Abeeda gwanda siisi was soomjeanda aba gheeda ashoohoocheanda haw, nea siisi gaba gheawagi sea siidida lach Betaro iitean, ghoanyaash, “Heapi aniini mii dadeakseeyi jeeda madamnyeanda mwanang' sea niny?” 27Gabiikta ghwashaang' Betaro gicha ea mii ghoah gil googuul nghaghooda.

Yesu aba madeeda Bilato

(Mat 27:1-2,11-14; Mar 15:1-5; Luk 23:1-5)

28Ng'ata geegeanda Yesu aba gheeh Gayafa ak geayaat gheeda abiita sugoocheanda nea gudea beashata gil ak ea maweayi saawa jeedeaba gheedida aba gideaba ea mwang'udana geat ririnnyeanda ak abeeda ghwaak hamita Basaaka. 29Hean gawa Bilato ghwanyasa saawa jarooda ak gwayeesha, “Goondeawi girgweageemba naaha aba badaydeaba siisi?” 30Ghwasha Saawa ak gwayeesha, “Siisi inyeeda ghwanyawa ea masina ng'asheega munyas ea majeeyeana headaang'u.” 31Gwayeesha Bilato saawa, “Asi ada abeeda ghoayaachi agooga ak goorgweaksi aba deaweedeedeang'wa.” Gwayeesha fuga Yahudi niny, “Mamiiseasa aseasa gideaba gajeenuusa siida.” 32Ak abeeda gwasa ng'asheanda ghayi rugu Yesu nea ghoahiimu miyeeda jea ghami giduurji.

33Gabiikta Bilato jeeda gheeda sugoocheanduumeeda ak gaguursa Yesu ak ghoanyaash, “Ang'iing'i guwoosi sugoocheanda Yahudi?” 34Ghwasha Yesu nea gwayeesha, “Ng'asheesu girgu ang'iing'i ghana rukuneey buuneeda iiteanyu?” 35Ghwasha Bilato nea gwayeesha, “Neada aniini geawooschi siida Yahudi? Ang'iing'i gweaneey heedeanyu fuga eemeedeang'wa sea ashoohoodiga hees. Neada ea nisini naaha?” 36Ghwasha Yesu nea gwayeesha, “Sugoocheanduumeedeanyu maba badaydeaba ng'eanyiini; ama inyeeda sugoocheanduumeedeanyu gaba badaydeaba ng'eanyiini, ghwanyawa gaygang'uchi soomjoogeasu aba meatkweedeanyu ea meeyiinan geatinga fuga Yahudi; amaduuku ghamneawa sugoocheanduumeedeanyu ea maba ng'eanyiini.” 37Hean gwayeesha Bilato niny, “Asi ghamneawa ang'iing'i guwoosi sugoocheanda?” Ghwasha Yesu nea gwayeesha, “Girgu ang'iing'i gideaba aniini geawooschi sugoocheanda. Aniini geejiilan aba badaydeaba nih, nea aba badaydeaba nih ghaawunyi jeeda ng'eanyiida, gideaba gaydamuuwu huumeanda. Siida wassean mida jeeda huumeanda iissa gooleeysiit ghuuteanyu.” 38Gwayeesha Bilato niny, “Huumeanda naaha gil?”

Yesu geergweaksiina miyeeda

(Mat 27:15-31; Mar 15:6-20; Luk 23:13-25)

Iing'ata rukunoodeaba ng'asheesu gabiikta gicha heeda fuga Yahudi mida jarooda ak gwayeesha, “Aniini mwaadaahi giidiinyeandeaba siisi. 39Iidu goondeawi agooga seareeda ghaheang'wa iissa googasayi deatineegwa siyagi mida ghealooniga damanda ghweelmeeda Basaaka; asi googasayi deatineegwa sugoocheanda Yahudi?” 40Gabiikta goojuur nea gwayeesha, “Mii siisi, geegasayi Baraba!” Nea Baraba abeeda gooreedi buuneeda haleanjeeda.

Currently Selected:

YOHANA 18: BG15

Highlight

Copy