YOHANA 19

1Hit ghoadayda Bilato Yesu eabwara mughoowooda. 2Gageanu Shirikara ak gwasin shiipka halaghweenga, amahit ghwayiin uhuudaanyi, ak geeshuup hang'da oomu; 3hean geeweay madeadaanyi ak geeyeesha, “Seayu, Sugoocheanda Yahudi!” Ng'ata geabwar aba baneaguuka. 4Gabiikta Bilato jarooda ak gwayeesha saawa, “Adaaha gearuudu siisi jarooda aba gideaba aniini mwaadaahi giidiinyeandaanyi.” 5Gwarita Yesu jarooda nea gwanda uhuuda shiipka halaghweenga nea gookwa hang'doom. Gwayeesha Bilato saawa, “Ang'ula siida!” 6Daah ashoohoodiga hees sea furiischoodiga goojuur nea gwayi, “Angoora niny, Angoora niny!” Gwayeesha Bilato saawa, “Ageanda agooga nea goobea geat amang'ata goongoorji, aba gideaba aniini mwaadaahi giidiinyeandeaba siisi.” 7Ghwasha fuga Yahudi nea gwayeesha, “Aseasa geandeawi deaweeda amadu aba deaweedeeni ea gideaba gammiisa miyeeda gil, aba gideaba niny gwahinda geaw Orjeeda ASEETA.” 8Iiy Bilato ng'asheesu, hean ghabeal muuchi; 9gabiikta jeeda gheeda sugoocheanduumeeda ak ghoanyaash Yesu nea gwayeesha, “Ang'iing'i gileabu yeenu?” Amwaasha Yesu ng'asheanji. 10Hean gwayeesha Bilato niny, “Mayrukunean eara gili? Minali gideaba geandeawi uurda jea deatinaneey ea dea jea deangooraneey?” 11Ghwasha Yesu nea gwayeesha, “Gwachi miimuusi mideawana uurda aba badaydeanyu iimeegoonyi aba humng'eeda; amadu siidida iinan geatingaaguun gwandeawa riing'eeda haw muuchi.”

12Ghang'eada damandida gagasa Bilato gheata gichea gwasiksiinda niny, goojuur fuga Yahudi nea gwayeesha, “Iisiksi siisi ea muwoosi siida duupchi Gaysari, aba gideaba siida wassean gasa ghoah sugoocheanda gwanda washta Gaysari.” 13Hean iiy Bilato ng'asheesu gooruuta Yesu jarooda amahit goopteada aba uhuuda hoorgeeda silacha girgweaguutka mida heesuguura Lagheaneeda bwarak, nea aba iita Ebraniya geeguura Gabata. 14Abeeda damandida gaba aseeta lah nea eaweecheanji geetiing'diing'da aba Basaaka; gwayeesha fuga Yahudi, “Ang'ula sugoocheandeang'wa!” 15Goojuur Saawa muuchi nea gwayeesha, “Ang'aamwana hiji, Ang'aamwana hiji, Angoora!” Gwayeesha Bilato saawa, “Gaydeangoor sugoocheandeang'wa?” Ghwasha ashoohoodiga hees nea gwayeesha, “Aseasa meendeawani sugoocheanda geaghus Gaysari.” 16Ng'ata gageanu Bilato ak ghwayiin geatinga nyaawa ak geengoor.

Yesu geengoor

(Mat 27:32-44; Mar 15:21-32; Luk 23:26-43)

17Geegeanu Yesu eeruuta jarooda nea ghwasar beehiidaanyi ea ghwahita heesuguura geapkeeda huda nea aba iita Ebraniya geeguura Golgota. 18Geengoorsa uhuuda beehiida sea fih suuk iyeenya dea manda meatkweeda geatinda dugwa niirja gwanda meatkweeda geatinda ghaadaam, nea Yesu gwanda dageascheeda nyaawa. 19Gang'oorsa Bilato uhuuda beehiida; ng'asheega siyi, “Yesuheeda Nasareti Sugoocheanda Yahudi.” 20Hean iissa ghoasoamwa fuga saang'a bea Yahudi ng'asheegiga sing'oorsa uhuuda beehiidean, aba gideaba hoowa singoorsa Yesuun ea neekeewa mujiini; nea geang'waara iita Ebraniya ea iita Latini ea iita Yunani. 21Ng'ata gwayeesha ashoohoodiga hees Bilato, “Ading'waari ‘Sugoocheanda Yahudi,’ Ng'oara gideaba, ‘Siisi gwayi, Aniini geawooschi Sugoocheanda Yahudi.’” 22Ghwasha Bilato nea gwayeesha, “Gidaang'waarji ning'ata ng'oorda.” 23Iing'ata giingoorda Yesu gageanu Shirikara hang'weakaaschi ak geesin gharmucheew ang'wan, ak gaba siisi siitaw gharmucheandaanyi; ghabwada gageanda eara hang'da geaw gul ng'eanyi. Nea abeeda hang'dida geanap nea agi ghang'eada uhuuda ea gagul ng'eanyi; 24hean gabaloola saawa gideaba, “Adoabwaashchi ghang'wana geeng'alealeesi ak geadaayi siichea gageanda.” Ng'asheanji geesin ak gwasa gida ghayi nyaah Ng'ooruutka bea gideaba,

“Ghoadabwaarda hang'weakeasu aba jeenyaawa,

Ak gang'alealeesa hang'deanyu.”

25Hean gwasindunu shirikara. Abeeda murdeeda beehiida Yesu ghamiinaada ghaamwat ea huda ghamaghaamwat, ea Mariyayda was gatmooda Gleopa, ea Mariya Magdalena. 26Daah Yesu nea ghamiinaada ghaamwat nea gwanda murdeeda giinealaneedida bwariiyiin, gwayeesha Yesu ghaamwat, “Iya, ng'ula orjeedang'u!” 27Hit gwayeesha giinealaneedida, “Ng'ula geamadu!” Ghang'eada damandida ghwaat giinealaneedida gwandeawa aba gheanyi.

Miyeeda Yesu

(Mat 27:45-56; Mar 15:33-41; Luk 23:44-49)

28Iing'ata nea ninal Yesu gideaba niisha ng'asheega sean, gwayi, (iijeagwasa ng'ooruutka), “Ghwaagan muwoash.” 29Nea abeeda gwanda hoowa gweeriida nyiit beega ng'weani bea haghweega geeta. Hean geegeanu gidawas gheabuuscheanda ak geapuuta jeeda beega ng'weani ak geahaaktaawa diigheecheanda ak geayiin ghuutaanyi. 30Ng'ata nea ninukghuta Yesu beegiga ng'weaniin gwayi, “Niisha”; ak ghwahiing'u uhuuda ak ghoabita guroorooda.

Yesu geang'ut gisheajeega

31Abeeda eaweeda giidiing'diing'deayda, ea mamiisiina gideaba gaygoobiida muscheeka iheenga beehajeega eaweeda Sabaato (aba gideaba eaweeda Sabaato eaweeda haw gil), gaweay gamus fuga Yahudi Bilato eehirjeaweada geeshanga ak geegeanda. 32Gaweay Shirikara ak gwahirja geeshanga siida madeeda, ea geaba siidida bea iyeenya; ghwanyawa siingooruudayi sea ninyiin; 33iidu nea ghwahita heeda Yesu ghwadaah gideaba nigeawiit ghami, ak ea mudu gwahirjeaweada geeshangaaschi. 34Hean gageanu Siyagi ak ghang'ut gisheajeega Yesu aba ng'uta, deagheata gwardu foojeanda ea beega. 35Nea siidida dea ng'asheesuun gamuuwu aba gideaba ng'asheega rugu gaba huumwa. Nea ghwanal gideaba gwaruku huumeanda ak abeeda ghoamwaschi. 36Ng'asheesu geesin gwasa ng'ooruutka, “Manda eara geapkeadaanyi jea eehirja. 37Gabiikta gwayi ng'ooruutka suuk, “Gaygang'ula fugiga heeta ng'udiin.”

Bunyita Yesu

(Mat 27:57-61; Mar 15:42-47; Luk 23:50-56)

38Iing'ata ng'asheesu gawa Yosefuheeda ng'eanyiida Arimataya was giinealaneeda Yesu aba makcheameeda, aba gheawalmeeda fuga Yahudi, gamus Bilato musta Yesu ghwaat, ak ghoadaw Bilato gheata. Hean ghwaan ak gageanda mustaanyi. 39Deagheata ghwahidu Nikodemeeda ghayi weah headaanyi eawa, ghwaan nea gweadu gharmucheanda siikuuyi weapkeanda ea hideeda ng'andit nea ghwanyiit deebajeanda ea dea agweena iyeenya. 40Geegeanda musta Yesu ak geekwealsa hang'weaka bumbuni sea haleanjeedida ng'andidiin aba seareedida bea fuga Yahudi bea eaweeda bunyiischoodean. 41Hoowa singoorsean abeeda gwanda madamnyeanji mwanang' nea jeedeaba madamnyeanji gwanda bung'eeni ris eaghurghur miyeebung'sa siida jeeda. 42Iidu aba ng'asheega Yahudi bea eaweeda giidiing'diing'deayda, ea gideaba eaneeki bung'eeda muuchi geeyiin Yesu jeedida.

Currently Selected:

YOHANA 19: BG15

Highlight

Copy