YOHANA 17

Yesu ghamwaash ghawooda aba badayda ginealangaaschi

1Iidu nea niihiit Yesu rukunoodeaba ng'asheesu, goong'weersa humng'eeda ak gwayi, “Bwaabwa, nigul damanda; aghaambiida Orjeedaang'u, ak abeeda eara Orjeeda ghoaghaambiinyi ang'iing'i, 2aba gideaba ghayi giidawi niny uurda aba badahuuka buuneassean ak abeeda ghoadaw eaweega manda muudeanooda fugiga sean ghayi iidawiin. 3Nea eaweega manda muudeanooda ea nih gil, gideaba ghwanalnyi ang'iing'eeda was ASEETA huumwa ea Yesu Gristoyda ghayi iijeagu. 4Aniini naaghaambiicheey aba badayda ng'eanyiida, ak ea naahiichi gadiyeeda ghayi igoonyean dasin; 5asi ghamneawa, aghaambiidaan Bwaabwa, aba madeadaang'u aba gheambalmeeda ghayi eandeawi sea ang'iing'i nea miyeesin ng'eanyiida.

6“Naanung' ghwanalnyi fuga ghayi igoonyean aba jeeda ng'eanyiida; ghayi fugaagu gil amadu gigoonyean aniini ghoah fugeasu, ak ghamneawa saawa ea niing'waay ng'asheandaang'u. 7Ak ghamneawa saawa ea ninal gideaba haleanjeeda sean igoonyean gwaleabu headaang'u; 8aniini naadawji ng'asheega ghayi igoonyean, ak saawa ea niing'waay ak ghwanal huumeanda gideaba aniini gealeabu headaang'u; ak ea nimwas gideaba ang'iing'i giijeaknean. 9Ghaamwaashchi ASEETA aba saawa; maamwaashi ASEETA aba ng'eanyiida ghaamwaashchi aba badahuuka fuga igoonyean, aba gideaba gaagu; 10geasu sean gaagu gil, nea gaagu ea geasu, ak geakghaambiidan aba jeenyaawa. 11Ak ghamneawa aniini ea mudu danda jeeda ng'eanyiida, amaduuku saawa gwanda jeeda ng'eanyiida nea ghaawunyi headaang'u. Bwaabeeda Ghaydit, ahaaghwana saawa aba gheawungaagu ghayi igoonyean, ahaaghwana ea ghoah agi nea gawuurji gissiwoosti aseasa gilagi. 12Ghayi nea gutandeawa saawa iissa ghaahaaghwi aba gheawungaagu ghayi igooni; aniini naahaaghwi saawa ak ghanyea manda nih niroat eara akaleala geaghus orjeeda ghayi was roodaneeda, gwasa ng'asheega rugu ng'ooruutka. 13Asi ghamneawa ghaawunyi headaang'u; ak ea nearukuti ng'asheesu aba jeeda ng'eanyiida, ak abeeda ghwanyas hooseaneegeasu muuchi aba jeesinga nyaawa. 14Aniini naadawji ng'asheandaang'u; amahit ghwasit ng'eanyiida aba gideaba saawa maba ng'eanyiida, gawuurji gidameabeaheatani aniini ng'eanyiida. 15Aniini maamwaashi gideaba geandeawana jeeda ng'eanyiida, geagasayi gideaba gayfura aba gidida muyiin. 16Saawa maba ng'eanyiida gawuurji gidameabeaheatani aniini ng'eanyiida. 17Amiini saawa aba huumeanda aba gideaba ng'asheandaang'u huumwa gil. 18Gawuurji gidaghayi iijeakteaydanean jeeda ng'eanyiida, gwasunu eara aniini neajeakti saawa gaweay jeeda ng'eanyiida. 19Amadu ea naamiidu geaw aniini aba badahuuka nyaawa, ak abeeda eara saawa geamiidu aba huumeanda.

20“Maamwaashi ASEETA aba suh ak ghwahit, ghamwaashi eara aba giika jea ghamwasan aba ng'asheanda nyaawaan; 21ak abeeda ghoah fiisu gilagi; gawuurji gidindeati jeedeanyu ang'iing'i Bwaabwa, nea geandi aniini jeadaang'u, eara saawa goobiida jeedeanya, ak abeeda ghamwas ng'eanyiida gideaba guwoosi siida ghayi ajeaknean. 22Aniini naadawji saawa giigheambiita ghayi igoonyeaniin ak abeeda ghoah gilagi gawuurji gissiwoosti aseasa gilagi, 23aniini gaydeabiida jeenyaawa nea giibiidi ang'iing'i jeedeanyu; gideabali geemajeek ak ghoah gilagi ak abeeda ghwanal ng'eanyiida gideaba ghayi giijeaknean ea gideaba gibwariinyi saawa gawuurji gida ibwariiydanaan aniini. 24Bwaabwa, suh ghayi igoonyeaniin geagasayi dandeawa galeagasean aba hiji eandi sean, ak abeeda ghwadaah giigheambiiteanyu ghayi igoonyean, aba bariinyeagaagu nea miyeebwat sindeeta ng'eanyiida. 25Ea Bwaabeeda doabiiwaat, ng'eanyiida mwanalnyi, duuku aniini ghaanaleay; eara suh ghwanal gideaba ghayi giijeaknean ang'iing'i. 26Ak ea naanung' ghwanal gheawungaagu, ak gaydanung' ghwanal, abeeda bariinyeega ghayi ibwariinyaan aniiniin goobiida jeesinga nyaawa, ak geabiidi aniini jeenyaawa.”

Currently Selected:

YOHANA 17: BG15

Highlight

Copy