YOHANA 10

Gida sigala haghweadoocheanda

1“Aba huumwa, aba huumwa, geayeeshiineegwa, siida wassean masiga gidaghuuta ak gawa jeeda gheeda gisilga amadu ghamwaasta ak ghwala nawa nuut, siisi mareanghweanda gil nea gooreedi fih haleanjeeda; 2duuku siida weah jeeda gheeda nea gwasik gidaghuuta, siisi haghweadoocheanda gisilga. 3Iissa gwajeassa furiischoocheanda gidaghuuta; ak iissa ghwayiiy gisilga ghuutaanyi, ak iissa gaguursa gisilgaaschi nea gaba nih guursiina gheawungaaschi ak gooruuta jarooda. 4Iing'ata giruteayda hean goosheedeawa ak ghwaat geeshta gisilga aba gideaba ghwanal ghuutaanyi; 5Mayghwaat geeshta rabascheanda gaygamng'aw aba gideaba mwanala ghuusiga rabasta.” 6Yesu gwarukuta ng'asheesu awaaghaniin, amadu eamajeeng'na saawa gidida rukusean.

Yesu haghweadoocheanda miy

7Gabiikta Yesu gicha ak gwayeesha, “Aba huumwa, aba huumwa, geayeeshiineegwa, aniini geawooschi gidaghuuta gisilga. 8Fuga suurja sean ghayi ashooynanean mareanghooga gil ea fuga areedi fih haleanjeeda; ak ea mealeeysiiniit gisilga. 9Aniini geawooschi gidaghuuta, siida iiweah gah nea gwasku heedeanyu gajeelealu, gaygawa gah nea gwardu ak abeeda gayghwanyas haghweeda. 10Mareanghweanda iissa ghwaan gwajagwadiischi nea gwanuus nea ghwadatas; aniini ghaawunyi ghwanyasa eaweega ea ghwanaawda. 11Aniini geawooschi haghweadoocheanda miy. Haghweadoocheanda miy iissa ghoaghaashta eaweagaaschi aba badayda gisilga. 12Siida siitaw gidageatinda mawoosa haghweadoocheanda biissa gisilga ea mii gaaschi, iidaah suuyeanda nea ghwaan, gwanung'usa heeda gisilga ak gamng'aw; ak ghoang'waay suuyeanda ak ghoadaarda. 13Niny gamng'aw aba gideaba maduupa ng'asheega gisilga aba gideaba niny siida mushaahara gil. 14Aniini geawooschi haghweadoocheanda miy; aniini ghaanali geasu ak eara geasu ghwanalan, 15gidanaldanaan Bwaabwa, ghaanali Bwaabwa; aniini ghaaghashti eaweegeasu aba badahuuka gisilga. 16Geabiisi dandeawa gisil suuk manda seamoodeaba gheawi; asi eara suh gammiisa gideaba gaydaaghuumu, ak gayghwayiiy ghuuteanyu. Ak abeeda ghoah hawanyeanda agi, ak haghweadoocheanda gajea agi. 17Aba sareani Bwaabwa ghabwariinyan, aba gideaba ghaaghashti eaweegeasu, ak geabiikti dageanu gicha. 18Manda siida geandeawanean, ghaaghashti aniini aba uhuudeanyu nea gabwageaw. Geandeawi uurda jea daghashtaawa ak geandeawi uurda jea dabiikta dageana; nih gidaghayi adeaganean Bwaabwa sinooda.”

19Hean gabiikta gicha ghwadarda fuga Yahudi aba badaydeaba ng'asheesu. 20Gwayi fuga saang'a aba jeenyaawa, “Siisi gabearji meangeenda, ak ghabwada nih gaba geas; ghwasaan anda gooleeysiit?” 21Gwayi mwaatkwa, “Ng'asheega sunu maba siida bearji meangeenda. Neada meangeenda ghoamu ghwajaat gheanyanga siida ng'oowi?”

Yesu geaheawa

22Abeeda aba hoowa bea Yerusalemuun gwanda ghweelmeeda simwanya gheeda sibata ASEETA; 23nea abeeda damandida ea damanda gooroogeeda, nea eara Yesu abeeda gwaneayeewa jeeda gheeda sibata ASEETA heeda was doodooda Sulemani. 24Hean gwaneaweesa fuga Yahudi ak gwayeesha, “Gaynung'waada eepiidana jeeda hirbabandeeda ea ghoah eeju? Iiwoosi Gristo nea huumwa gil girukuneasa nea giidaajiidi.” 25Ghwasha Yesu nea gwayeesha, “Nigeawiit darukuneegwa ak ea moamwasi. Gadiyoojiga easinyi aba gheawunga Bwaabwa gamuuwunean aniini; 26iidu ea moamwasi agooga aba gideaba moowoosi gisilgeasu. 27Gisilgeasu ghwayiiy ghuuteanyu ak ghaanali saawa ak gweadu geeshteanyu; 28aniini iissa ghaadawji eaweega manda muudeanooda, ak eara saawa ghanyea maygwarooda earahay ea ghoah eaweega manda muudeanooda, nea ghanyea manda siida ammu gageandeawa geatindeanyu. 29Bwaabeedeanyu, goonan ea haweewa sean, ak ghanyea manda siida ammu gageanda saawa aba geatinga Bwaabwa. 30Aniini sea Bwaabwa geawooschi gilagi.”

31Hean gageanu fuga Yahudi lagheanga nea gajeefta. 32Ghwasha Yesu nea gwayeesha, “Aniini naahiimneegwa gadiyoojiga saang'a miyaasiin leabu heeda Bwaabwa; abeeda ea aneeda gil aba jeedeaba ng'asheesu jea ghwanung' aftean aba lagheangean?” 33Ghwasha fuga Yahudi nea gwayeesha niny, “Majeefteey aba gadiyoojiga miyaasiin isinayi, gaygweagu ng'asheagaagu munyas irukusi ASEETA; aba gideaba gisini geaw ASEETA nea guwoosi siida.” 34Ghwasha Yesu nea gwayeesha, “Miyeeng'waari aba jeeda deaweedeedeang'wa gideaba, ‘Geayeenyi goowooschi aseecheeka’? 35Abeeda iiguura aseecheeka fugiga ghayi hina ng'asheanda ASEETEAN (nea ng'ooruutka ea mayghwayamwa), 36goobalooli siidida ghayi amiidu Bwaabwa ak goojeagu ghwaan badayda ng'eanyiidean ak gooyeeshi, ‘Girukuni badayda ASEETA ng'asheega munyas,’ aba gideaba geayeenyi, ‘Aniini geawooschi Orjeeda ASEETA’? 37Abeeda iimeasini gadiyoojiga Bwaabwa, ea adoamwaschaan; 38ama easinyi earapeadi moamwasaan ghang'wana ghoamwaschi gadiyoojiga ak abeeda goojeeng'u nea ghoanali gideaba Bwaabwa gwanda jeedeanyu nea geandi aniini jeeda Bwaabwa.”

39Gabiikta Saawa gagasa ghoang'waay amadu gamul aba geatinga nyaawa. 40Gabiikta Yesu gawa giigheawda Yordani heeda ghayi abaatiisaniisa Yohana buuneeda aba mwadi ak goobiida hoowa. 41Gaweay fuga saang'a headaanyi ak geeyeesha, “Yohana miigwasin gwadeagooda, duuku ng'asheega sean ghayi rugu aba badaydeaba siisi ea huumwa gil.” 42Iidu ghamwas fuga saang'a mida hoowa.

Currently Selected:

YOHANA 10: BG15

Highlight

Copy