YOHANA 9

Yesu ghoahaap siida siji nea ng'oaw

1Eaweecha ghang'ata ak ghwadaah siisi ghayi siji nea ng'oaw. 2Iidu ghoanyaash ginealangaaschi niny nea gwayeesha, “Rabi, gwasin ng'eaha riing'eeda, gwasin siisi ghana sin ghwaan ea ghaamwat inyas geeji nea ng'oawiini?” 3Ghwasha Yesu nea gwayeesha, “Mii gideaba nisin siisi riing'eeda gil, ghana ghwaan ea ghaamwat, geebaysiina ghwadaajiit gadiyoojiga ASEETA aba niny. 4Gammiisa eesina gadiyoojiga siida ajeaknean, iidu ea askweari; ghwahidu eaweeda, ak ea mayghoamu siida gagadiiy. 5Hiji duu dandeewa jeeda ng'eanyiidean, aniini geawooschi weeshinda ng'eanyiida.” 6Ahiit baloaldaanyi gwasin sheang'weeda aba ng'usheega ak ghwayeasha gheanyangeaba siidida ng'oawiin, 7ak gwayeesha niny, “Una ak giihuuni gheanyangaagu aba jeeda dabascheanda Siloamu” (nea gideaba dea siicheakta). Ng'ata gawa Siidida giihuushi ama ng'ata gabiigu nea niing'wearda. 8Gwayi fuga ascheayi sea fuga eawoojisu nidaah siidida aba mwadi nea gamusiisachiini, gwayi, “Neada siisi ea mii siidida apteadayi nea gamusiisachiini?” 9Gwayi mwaatkwa, “Ninyi”; nea mwaatkwa gwayi, “Manda, geaghus gideaba gawuurji sea niny.” Gwayeesha, “Siida aniini gil.” 10Geeyeesha, “Ghwajaadataan gheanyangaagu?” 11Ghwasha niny nea gwayeesha, “Gwasin siidida siguura Yesuhiin sheang'weeda ak ghwayeasha gheanyangeasu amahit gwayeeshiinean, ‘Una akgiihuushi aba Siloamu’; ng'ata geawi ak geahuunyi gheanyangeasu amahit ghaang'weardi.” 12Geeyeesha, “Niny ghamneawa gwanda yeenu?” Hean gwayeesha siidida, “Aniini mwaanali.”

Farisaayajeega gwasikteawa gissihaapta siida

13Ng'ata geayaat siidida ghayi ng'oawiin heeda Farisaayajeega. 14Nea abeeda eaweecheandida sina Yesu sheang'weeda ak ghwayeasha gheanyanga siida ak ghwajaada nea eaweeda Sabaatohi. 15Hean ghoanyaash Farisaayajeega gicha siidida ginyasta giing'weerdeayda?” Ghwalamda niny ak gwayeesha saawa, “Ghwayeasha gheanyangeasu sheang'weeda ama ng'ata geahuunyi ak ghaang'weardi.” 16Gwayi Farisaayajeega mwaatkwa, “Siisi maleapna heeda ASEETA aba gideaba moang'waanya Sabaato.” Nea mwaatkwa gwayi, “Gayghoamuustaan siida riing'eeda gwasin gwadeagooda sunu?” Hean ghwadarda buuneeda. 17Geebiikta gicha eenyaash siidida ng'oawiin, “Asi ghamneawa siisi iinijaat gheanyangaagu giyeaniin ang'iing'i aba badaydeaba siisi?” Gwayeesha, “Siisi sibaneeda gil.”

18Ea mamwasa fuga Yahudi gideaba siidida ghayi ea ng'oaw ak ghamneawa ea niing'wearda, ea eeyi bwak ea gaguursa ghwaan ea ghaamwat. 19Hean geanyaash ghwaan nea geeyeesha, “Nih baleandeang'wa ooyeenyi ghayi geeji nea ng'oawi? Ak ghamneawa ghwanyastaan giing'weerdeayda?” 20Ghwasha Ghwaan ea ghaamwat ak gwayeesha, “Aseasa geanali gideaba nih baleandeanya gil, ea gideaba geeji nea ng'oaw; 21ak ginyasta giing'weerdeayda aseasa ea meanali, ak geabwadi nih eara siidida jaat gheanyangaaschiin ea meanali. Oanyaasha niny aba gideaba siida niheedu gil ghoamu gwarugu niny.” 22Gwarukuteaydunu ghwaan ea ghaamwat aba gheawalmeeda fuga Yahudi aba gideaba fuga Yahudi niheeleesa gideaba siida wassean jea gwarugu aba ghuutaanyi gideaba Yesu niny Gristohi gajeeruuteawa jeeda ghooriida siinealshacheewa. 23Ak ghoah gidarukuteawa ghwaan ea ghaamwat gideaba, “Niny siida niheedu gil oanyaasha.”

24Gabiikta deaba iyeenya gaguursa siidida ghayi ng'oawiin ak gwayeesha, “Duumsheesiina ASEETA; aseasa geanali gideaba siisi gaba riing'a.” 25Ghwasha nea gwayeesha, “Siisi iibea riing'a aniini ea mwaanali, ak ghaanali aniini ng'asheanjagi nea gideaba ghayi geawooschi ng'oaw ak ghamneawa ea naang'weardi.” 26Geeyeesha niny, “Gwahindaneeyiin? Ghwajaataan gheanyangaagu?” 27Ghwasha nea gwayeesha saawa, “Nigeawiit darukuneegwa ak ea mooleeysiini iit, ghwasaan anda googasayi ayiinya gicha? Eara agooga googasayi ahuwa ginealangaaschi?” 28Geeng'eawi nea geeyeesha, “Ang'iing'i guwoosi giinealaneadaanyi ak aseasa geawooschi giinealanga Musa. 29Aseasa geanali gideaba ASEETA ghayi goobalool Musa amaduuku siisi ghanyea meanali eara heeleabu.” 30Ghwasha siidida, “Ng'asheanji ghwanung' ghaham fih ng'eanyi! Agooga moanali heeleabu ak ea nijaat gheanyangeasu. 31Geanali gideaba ASEETA mooleeysiina iit fuga riing'eega, nea siida ii dea gadoowani ASEETA nea gwasin gidida bwariiy ninyiin, gaygooleeysiit ASEETA. 32Ghang'eada dea sibwada ng'eanyiida miyeeyiinya siida jaat gheanyanga siida ghayi siji nea ng'oaw. 33Siisi iimaleapna heeda ASEETA ea mayghoamu gwasin eara gil.” 34Ghwasha Saawa ak gwayeesha, “Ang'iing'i geejiilseey jeeda riing'eeda haw ak gajanaaleasa?” Hean geeruuta jarooda.

Ng'oowunda guroorooda

35Ghwayiiy Yesu gideaba siiruuta jarooda niny, hean iidu nea ghwadaah gwayeesha, “Ang'iing'i gimwasi Orjeeda Siida?” 36Ghwasha ak gwayeesha, “Siida Mureeda, ng'eaha gil, ak abeeda gaydamwas niny?” 37Gwayeesha Yesu niny, “Nidaahi niny, ak ea siisi abaloolnyiin.” 38Hean gwayeesha, “Ng'utamiida, Naamwaschi”; ak ghaghadoawan niny. 39Gwayeesha Yesu, “Aniini ghaawunyi badayda ng'eanyiida aba girgweaksiinda ak abeeda fuga moang'wearda gayghoang'wearda nea gang'oowiidi fuga ghamneawa ang'wearda.” 40Gwayiing'shi fuga mwaatkwa bea Farisaayajeega ghwanyawa neeki ng'asheegiga ak ghoanyaash gideaba, “Eara aseasa geawooschi ng'oowi?” 41Gwayeesha Yesu saawa, “Ghwanyawa iyoowooschi ng'oowi ea majandeawana giidiinyeanda, ak ghamneawa gooyeenyi agooga, ‘Aseasa geang'weardi,’ abeeda giidiinyeanyeekeagwa gudugwanda heeda.

Currently Selected:

YOHANA 9: BG15

Highlight

Copy