YOHANA 11

Miyeeda Lasaro

1Ghayi gwanda siisi miyaan siguura Lasaro bea ng'eanyiida Betaniya, nea gharang'da geaba Mariya gil ea huda ghaamwat siguura Marta. 2Mariyaheani diita ghayi easha Ng'utamiida nagheeda ng'andit ama ng'ata goobuus geeshanga aba buudeagaaschiin gil, nea abeeda ghamnyaan orjeeda ghaamwat siguura Lasaro. 3Hean goojeaksa Haweega ghaamwat nea geeyeesha, “Ng'utamiida, siida ibwariinyi ghamnyaan.” 4Iiy Yesu ng'asheanji gwayeesha, “Geeyooni maygweadu miyeeda, gaba giigheambiita ASEETA, miyeanji geebaysiina gideaba abeeda gajeakghaambiit Orjeeda ASEETA.”

5Yesu abeeda ghabwariiy Marta ea huda ghaamwat ea Lasaro. 6Iidu nea ghwanyas Yesu iita gideaba ghamnyaan, goopteada aba hoowa ea ghang'ata eawooji iyeenya. 7Iimuchu nea ghang'ata ng'asheesu gwayeesha ginealangaaschi, “Eaniyean eebiikta eeweaya Yudeya.” 8Hean ghoanyaash giinealanga nea geeyeesha, “Rabi, miigageawiit damanda gasseewa fuga Yahudi gaftaneey lagheanga ak ghamneawa gigasayi biikta gicha hoowa?” 9Ghwasha Yesu nea gwayeesha, “Heapi roobuutka aseeta aba jeeda askwearda mii damaniyeenya? Asi siida iiweelweel askweari ea moamu ghwalas geeshta gil aba gideaba ghwadaah weeshinda ng'eanyiida. 10Duuku siida iiweelweel eawa ghoamu ghwalas geeshta gil aba gideaba manda jeadaanyi weeshinda.” 11Iidu nea ghoahiit Yesu rukunoodeaba ng'asheesu gwayeesha saawa, “Siida siduupcheewi was Lasaro nilil, ak gaydawa daheat.” 12Ghwalamda giinealanga ak gwayeesha, “Ng'utamiida iibeachi ruweanga, gayghahaap.” 13Nea Yesu gabaloola iita miyeadaanyi, ak ghaghay saawa gili baloola iita ruweanga. 14Hean gwarukusa Yesu nea ghoadaajiit, “Lasaro nimi; 15ak ghamneawa geahoosanyi aba badahuukeagwa ak ea nighaas heeta ea meandani hoowa ak abeeda ghoamwaschi. Asi eeweaya headaanyi.” 16Gwayeesha Domasoyda siguura Saleaygweanda giinealanga suurja, “Apkaani eeweaya ak geemeewuudayeewi niny.”

Yesu duunooda gil ea eaweega

17Eaweeda hitaawa Yesu hoowa abeeda Lasaro niibiida jeesigeeda eawooji ang'wan. 18Abeeda Betaniya ea neekeewa Yerusalemu maygwaduulu aseadeanagi hiteayda. 19Nea abeeda ea nupka fuga saang'a bea Yahudi heeda Marta ea Mariya eegeandeawa salgheang'da aba miyeeda orjeeda ghaamwat. 20Hean iiy Marta gideaba ghwaan Yesu gawa roonyeeda nea Mariya geanung'wa ghoah. 21Gwayeesha Marta Yesu, “Ng'utamiida inyeeda heeta gindi hiji ghwanyawa orjeeda giyeanya gajea miighami. 22Eara ghamneawa ghaanali gideaba iimusi ASEETA gida wassean gaygagoonyi.” 23Gwayeesha Yesu niny, “Orjeeda geamadu gaygwaduudu gicha.” 24Gwayeesha Marta niny, “Ghaanali gideaba gaygwaduudu gicha eaweeda jea gwaduutuuna buuneeda eaweeda huuydean.” 25Ghwalamda Yesu ak gwayeesha niny, “Aniini geawooschi duunooda ea eaweega; siida iimwasan eara ghami gajea majeek, 26nea siida majeek ak ghamwasan ea mayghami earahay. Ghamneawa gumwasi ng'asheanji?” 27Gwayeesha niny, “Huumwa gil Ng'utamiida; aniini ghaamwaashchi gideaba ang'iing'i guwoosi Gristo, Orjeeda ASEETA, jea ghwahidu jeeda ng'eanyiida.”

Yesu gooyeawda

28Iing'ata rukunoodeaba ng'asheanji, gawa ak gaguursa huda ghaamwat siguura Mariya, ak gameang'sheesa nea gwayeesha, “Nukwa Giinealshoocheanda gwanda hiji nea gaguuru.” 29Iiy ng'asheanji gootkweal ak gawa headaanyi. 30Abeeda Yesu mii ghwahidu gharang'dida, gudugwanda heeda ghwanyawa deepteaysa Marta. 31Hean dea fuga Yahudi ghwanyawa mideayi aba jeeda gheeda nea gageanda salgheang'da, gidang'eata ak gidalamwajaadayda Mariya nea gwarita jarooda, ghwaat geeshta, nea ghaghay gili weah heeda bung'eeda gooyeawda. 32Hita Mariya heeda mida Yesu ghwadaah ak gwatkuy aba madeadaanyi ak gwayeesha, “Ng'utamiida, heeta inyeeda gindi hiji orjeediyya gajea mii ghami.” 33Daah Yesu gidayeawudeayda nea eara fuga Yahudi ghwanyawa adeana earaga gooyeawda ghang'ut giiseaneega nea gwasawana gurooroadaanyi; 34ng'ata gwayeesha, “Ghoayiinyi yeenu siida?” Geeyeesha niny, “Ng'utamiida beeni daaha.” 35Gooyeawda Yesu. 36Hean gwayi fuga Yahudi, “Adaaha gidabwariiyda!” 37Amadu gwayi mwaatkwa aba jeenyaawa, “Asiisi ghayi jaat gheanyanga siida ng'oawiin ghwaraay ghwanung' ea mwami siisi?”

Lasaro geetuudu

38Iidu nea nigiisan Yesu aba jeadaanyi ghwahita heeda bung'eeda; abeeda bung'eeni gwaleeda nea geedukuteawa lagheaneeda. 39Gwayeesha Yesu, “Ageanda lagheaneeda.” Ghwasha Martayda was huda gheamata siida heeta meahiin ak gwayeesha niny, “Ng'utamiida, gajea niimealu aba gideaba nih eaweedeaba ang'wani aba miyeeda.” 40Hean gwayeesha Yesu niny, “Heapi miidarukuneeyi gideaba iimwasi gaydaaha giigheambiita ASEETA?” 41Hean geegeanda lagheaneedida. Ng'ata goong'weersa Yesu humng'eeda ak gwayi, “Geabadiischooweey Bwaabwa aba gideaba iissa giyiinyi gideargu. 42Ghaanali gideaba iissa giileeysean iit galeagasean. Ak ghamneawa gearukuni ng'asheanji badahukeaba fiisu miinaada aba hijiin, ak abeeda gayghamwas gideaba giijeaknean.” 43Ng'ata rukunoodeaba ng'asheesu gaguurda aba ghuuta haw, “Lasaro, Rini jarooda.” 44Gwardu jarooda siidida heeta meahiin, nea radaat geeshanga ea geatinga aba weageaka nea gheamamdaanyi ea sidukuta aba hang'da. Gwayeesha Yesu saawa, “Ootina, ak ghoanung'waadi gawa.”

Geamwaal gichea eenuusta Yesu

(Mat 26:1-9; Mar 14:1-2; Luk 22:1-2)

45Hean iidu fuga saang'a bea Yahudi heeta hidu heeda Mariya iidaah gidida siniin, ghamwas niny; 46gaweay fuga mwaatkwa heeda Farisaayajeega ak ghoadayda iita ng'asheanda sin Yesu. 47Gwasin Ashoohoodiga hees sea Farisaayajeega girgweageeda nea gwayi, “Gajeesina naaha? Anda siisi iissa gwasin gwadeagwajeega saang'a muuchi. 48Gajiidu Iisinung'waadi gwasunu gayghamwas buuneesean, ak gayghapka fuga Rumi gwanyarja hoorgeedeanya ghaydit ea eemeedeanya.” 49Ng'ata gwayeesha siyagi siguura Gayafa was ashoohoocheanda haw gweaydida, “Agooga moanali gil; 50agooga moanaali gideaba ghang'wana ghami siyagi aba jeedeang'wa aba badahuuka buuneeda, mwasamwa gideaba gajealas uhuuda eemeesean.” 51Siisi marukunana uhuudaanyi ng'asheesu, gwarukuna gideaba niny ashoohoocheanda haw gil aba gweaydida, niny gwaramoorsa gideaba Yesu gayghami aba badayda eemeeda, 52ak ea mii badaydeaba eemeeni gil ak ghwahit, ghabwada gideaba gagasa goonyeaschi diibiga ASEETA nigeawiit ghwadarda ak ghoah gilagi. 53Ghang'eada eaweedida gagasa gheata gichea gwanuusta.

54Hean eamudu gwaneayeewa Yesu bugusta fuga Yahudi nea ghabwadakta, ghabeawa hoowa ak gawa ng'eanyiida neekeewa dareapcheeda jeeda mujiineeda siguura Efraimu; ak goobiida hoowa sea ginealangaaschi. 55Abeeda ea nineekiit Basaakeeda fuga Yahudi, gaweay fuga saang'a beawa darooraka ak gaweay Yerusalemu ghoamiidu geat nea mii ghwahidu Basaaka. 56Hean iissa geegasa Yesu. Ak ghabwat geat aba gheeda sibata ASEETA ak goonyeari geat gideaba, “Gawuurjiin? Mayghoan jeedeaba ghweelmeeni?” 57Abeeda ea niidayda Ashoohoodiga hees ea Farisaayajeega iita gideaba siida deepa ghwanal heeda mida Yesu ea darukusiina ak abeeda geang'waay.

Currently Selected:

YOHANA 11: BG15

Highlight

Copy