Mitanie ya varumi 8

1Na Saulo kasenywa ni iwalwa lyamwi. Nkonu to akava ma-tuṛulwa manini a siṛi ilya ikee Yerusalemu. Woose vakanyanyaka ngyurukeń ta Yuda na Samaria. Vandu vandesaa ifo Yerusalemu vvarumi da. 2Kake vandu veekusuriee Iṛuva vakaṛika Stefano vakallilia kiiyo kinini. 3Saulo kaburua siṛi eeakaa numba kwa numba eesuṛuaa womi na vaka na ivarwaa kifingioń.

4Kake valya vandetaṛakana vakaenda ifo na ifo veekwanisaa kirero kilya. 5Kyasia na Filipo kainama kafika muṛiń umwi wa Samaria kavakwanisia kya Kristo. 6Na isyamu likaaranya firero filya farerwa mFilipo kwa nrima umwi, ili vandeita na ilolia maṛiikiso alya eekee itanwa yye. 7Amu veengi vatoṛokombie na fisaya vakakiṛwa. Na vandu veengi veeworwaa mmimuyo mikasha ikavauka iishiṛaa na ununga unini. 8Likava ifura inini muṛiń ulya.

9Eeifoo nndu umwi irina lyamwi nSimon eekee nsavi kuuka mbele muṛiń ito eeunganisaa vandu va Samaria, eenumbuaa sheeli ye ni nndu nnini. 10Na woose vannya na vanini vakamwaranya veereraa: Nndu uu yye finya ya Iṛuva ilya nini. 11Na kiteveto vakamwaranya mfulya eewaṛiikisaa keengi na usavi lwamwi. 12Kake ili vandeirikia Filipo eevakwanisiaa mboni shinuru ta umangi lwa Iṛuva na ta irina lya Yesu Kristo, vakakubatisio̱ womi na vaka. 13Nae Simon muni akusura kabatiswa kalungana na Filipo. Ili andelolia firingisio na maṛiikiso manini fitanikaa kaṛiika. 14Na varumi valya veekee Yerusalemu ili vandeita sheeli Samaria yamiirikia kirero kya Iṛuva vakavarikia Petiro na Yohane. 15Vakainama vakavaterevia vawarie Mumuyo Nsongori. 16Amu nta umwi wawo eemmusheaa, kake veembatisio̱o̱ irina lya Nndumi Yesu da. 17Llyo vavaekeṛia maako nawo vakawaria Mumuyo Nsongori. 18Neeli Simon andelolia sheeli vandu vaniingwa Mumuyo Nsongori veekeṛio̱o̱ maako a varumi kavaendee fesa kanumbua: 19Shiniingeń imakii li nań, amu nndu woose mmwekeṛiaa maako akwa awarie Mumuyo Nsongori. 20Petiro kamwia: Fesa tafo fireke andu emwi nawe, fulya kwakusaṛa sheeli miniingie ya Iṛuva ikooikaa kwa fesa. 21Kuwore wavi ana fuva ya kindo iki ndi, fulya nrima wafo utasumanikie kisanguń kya Iṛuva. 22Kyasia kurre ukasha lu lwafo kutereve Nndumi akwaa kivaa kulilio̱ ikusaṛo li lya nrima wafo. 23Amu nkulolie kuwore kivawwo sha udwa na lingi kukee kifingioń kya ukasha. 24Simon kaaṛua kanumbua: Shiterevień ini kwa Nndumi kaaṛa ifi mwarera kitashifikie nta kimwi. 25Ili vandemaa irambua na ikwanisa kirero kya Nndumi vakauya Yerusalemu veekwanisaa nrumi ya ifura fimiṛiń fiingi fa Vasamaria.

26Malaika wa Nndumi karera na Filipo kamwia: Kwimboo inama kufike shia ilya yukie Yerusalemu ikafika urukeń lwa Gasa ilya itakiiriwa vvandu. 27Kakwimboo kaenda. Lia eni kalolia nndu Mwabashi. Nndu ito eekee nshili wa mangi nka Kandake wa kulya Wabashi eeringaa masaa woose a mangi ilya. Nae eemeendaa Yerusalemu andeterevia-fo Iṛuva. 28Neeli eeuyaa na kyeń kakaa rembo igariń lyamwi kasoma kitabu kya mwauya fisuku Yesaya. 29Mumuyo wa Iṛuva kaia Filipo: Kwimboo saṛikia igari lia! 30Llyo Filipo alisaṛikia kaita nndu ulya eesomaa kitabu kya mwauya fisuku Yesaya. Kamwuṛa: Kwammanya misendie ya firero fo kukee isoma? 31Nae kamwia: Mmakii imanya are ntaare nndu ashilosha? Katereva Filipo aaṛukie igariń akaa andu emwi nae. 32Na firero eekee isoma ifo kitabuń mfo ifi: ”Ankurikwa andu a isikywa sha yaanri. Lingi kavakana na yaanri likee isemwa mafuli mmuni fikasia do. Mfo kuro nae asisiria nta itaṛambua kana kamwi. 33Ili nndekunyiisa kavinga kakia uumisio lwamwi. Ana ni i ataalaa ufwari lwamwi? Fulya muu wamwi uutwaa kunu isangeń utakiifo.“ 34Na nshili kauṛa Filipo kamwia: Nakutereva kushiie, kilya mwauya fisuku ulya arera nkya i? Akurera ye muni ana arera kya nndu ungi? 35Na Filipo kataṛambua kana kamwi kalosha nndu ulya mboni ta Yesu eebookiaa mboniń tilya ta mwauya fisuku ulya. 36Ili vandeenda-enda vakafika mureń. Nshili ulya kaia Filipo: A uuń mura. Kiifo kindo kishiimaa niibatiswaa? 37Filipo kamwia: Kwakooya kukusuraa Nndumi na ngoo yafo yoose kimakii iva. Kamwaṛua kamwia: Nkusurie sheeli Yesu Kristo yye Mwana wa Iṛuva. 38Kasalafisa igari vakaoloka mureń vali vavili Filipo na nshili. Na Filipo kambatisia-fo. 39Ili vandemaa yuka mureń, Mumuyo wa Iṛuva kaveṛuta Filipo nshili ulya nta ikillolia. Kawara shia yamwi kaenda na ifura. 40Kake Filipo kalolika Asidodi. Neeli eeiraa kakwanisa nrumi shisha miṛiń yoose andeira kumande afika Kaisaria.

Currently Selected:

Mitanie ya varumi 8: RWK72

Highlight

Copy