Mitanie ya varumi 7

1Nkohani ulya nnini kanumbua: A le mfo kuro mboni to tikai? 2Nae kanumbua: Muṛe vanavama na vavaava vakwa shaaranyiń! Iṛuva muni unini akworasa vaava weru Abraamu ilyo akee kulya Mesopotamia kitaare eensamiaa Haran. 3Kamwia: Uka urakeń lwafo na ufwariń lwafo kusamie urukeń ilo nkworusaa. 4Llyo asama urukeń lua lwa Vakalidayo kakaa Haran. Kauka ifo ndee ammaa ifwa. Iṛuva kansamisa-fo kansamisia uruka lu ini murule alli. 5Ana anniinga diṅu kunu nta andu eeṅaniaa uvayo ndi. Kanrekia sheeli anniingaa luve lwa miitoṛio yamwi na lwa ufwari lwamwi lwa numa, nae ataare mwana matika alya. 6Iniva karera kuri, sheeli va ufwari lwamwi vavaa veeni urukeń lwa vandu vengi. Nawo vavaaṛuaa vave masinga awo na ivatania fikasha andu a myaka mayana aani. 7Na uṛiti lo luvaaṛuaa maketi nniń lluumisiaa, ni Iṛuva arera kuri. Na numa ya ifo vasamaa-fo, nawo vasheshiṛundiaa ia. 8Kanniinga mma ya urini. Kyasia Abraamu kaira Isaki kanrina nkonu wa nyaanyi. Isaki kaira Yakobo na Yakobo kaira vasuṛi valya veru valya ikumi na vavili. 9Vasuṛi wo veru vakairia Yosefu iriso vakankumba aende Misiri. Iṛuva kava andu emwi nae 10kamwuta ngatareń tamwi toose kanniinga ikundika na uṛango mbele ya Farao mangi ya Misiri. Nae kamwaṛua nshili wa Misiri na numba yamwi yoose. 11Kyasia soto ikasha urukeń lwa Misiri loose na lwa Kanaan na ngyukiva shiingi. Na vaande yeru vakooya shoonga ivafile ndi. 12Neeli Yakobo andeita sheeli kulya Misiri iifo shoonga, karuma-fo vaande yeru lya mbele. 13Na kyaaṛo kya kavili Yosefu kakumanyisa kwa vanavamae. Na ufwari lwa Yosefu lukamanyika kwa Farao. 14Yosefu karuma vandu vandevaanga ndee Yakobo andu emwi na vanavamae woose deń, vvandu makumi mfungare na varaanu. 15Kyasia Yakobo kainama kumande Misiri kafiya-fo ye na vaande yeru. 16Vakakurikwa kumande Sikemu vakaṛikwa mbangeń ilya Abraamu aiuṛa na fesa kwa vana va Hemori ifo Sikemu.

17Kyasia kyeeri kya kirekio kilya Iṛuva arekiana na Abraamu ili kindefika kufui, vandu valya vakafumbuka na ikwengeṛia nnu kulya Misiri, 18kumande mangi ingi ya Misiri yakwimboo iteeshi kya Yosefu. 19Mangi yo ikautia ufwari lo lweru ntambwe na itania vaande yeru kikasha eevavavasaa vakumbe vana vawo vannya amu vafwe. 20Kyeeri kyo Mose kairiwa, nae eekee mwana nnuru nnu. Kalelwa andu a miiri iraru ifo numba kwa ndee. 21Neeli andekumbwa sambuṛa ya Farao kamwuta-fo kallela sha mwana wamwi. 22Mose kaloshwa uṛango loose lwa Vamisiri kava mwaṛia wa firero na mitanie. 23Neeli kiṛengo kyamwi kindefika myaka makumi aani, kaitikwa nrimiń wamwi yenda andella vanavamae vamwi vakee vana va Isiraeli. 24Kalolia umwi eeliswaa ukiva kamweleka kantaya sile kawaa Mmisiri ulya. 25Akusaṛa sheeli vanavamae vamanyaa sheeli Iṛuva akee ivaniinga ikiṛwa kwa uko lwamwi, kake vamanya ndi. 26Ili lya ndesi kashea vengi nawo veekee inaa. Kakunda ivaitanisa eenumbuaa: Muṛe womi vakwa, ini mukee vana va nka. Nkiki ili mukee inaa? 27Kake ulya eekee inaya ito ungi kamburusia kwaasha eenumbuaa: Ni i akwaṛua kuve mwitoṛo na mutishilia? 28A le kufurie ishiwaa niń sha lia kundewaa Mmisiri ulya kwa wu? 29Mose karisha kiimba kya kirero kyo kandekaa sha mwini urukeń lwa Midian kairia-fo vana vavili.

30Neeli indesia myaka makumi aani, malaika wa Nndumi kanshea bateń ya uro lwa Sinai kari ka kibalabala kya muro irumbushuń.

31Ili Mose andeulolia kaṛiikia myorusie ilya. Neeli andeserikia amu aulle, ununga lwa Nndumi lukanshea lwireraa: 32Niń nkee Iṛuva wa vaande yafo, nkee Iṛuva wa Abraamu na Iṛuva wa Isaki na Iṛuva wa Yakobo. Mose karerema nta ikaṛia illa-wo. 33Nndumi kamwia: Uta faaru marendeń afo, amu ia kuselele ni andu asongori. 34Dede nallolia matuṛulwa a vandu vakwa vakee kulya Misiri, namiita ivavio lyawo, nań namooloka nshevauta-fo. Kyasia alli nkurumaa kumande Misiri. 35Mose to vallea veenumbuaa: Ni i akwaṛua kuve mwitoṛo na mutishilia, yye arumwa ni Iṛuva ave nnini na nkiṛa kwa uko lwa malaika ulya anshea alya irumbushuń lia. 36Ito yye avauta-fo urukeń eetanaa myorusie na firingisio kulya urukeń lwa Misiri na kulya nruveń ya masasangya na kulya bateń andu a myaka makumi aani. 37Mose to yye aia vandu va Isiraeli: Iṛuva amuseṛeesiaa mwauya kisuku shań kari ka vanavamae vanu. 38Ye yye eekee ikusandioń lya siṛi kulya bateń andu emwi na malaika ulya anderera nae kulya uroń lwa Sinai na andu emwi na vaande yeru. Yye awaria firero foore muu atiniingie ise. 39Nndu to vaande yeru vakunda imwindia ndi, kake vamburusia kwaasha na mirima yawo vakaiwiiṛa Misiri. 40Vakaia Aron: Tisongosie maṛuva atiiriaa mbele. Amu Mose to andetiuta urukeń lwa Misiri tiishi kindo kindewia ndi. Vakasongosia fwana ya kyaashe mikonu ilya vakakyutia nsimbika vakakyesia mashoṛa a maako awo. 42Kyasia Iṛuva kailasha makusaṛo kavatia vatereve nyinyiri ta iṛuvewu, sheeli kikee kitisiṛe kitabuń kya vaauya fisuku: ”Ini va numba ya Isiraeli, mwashuutia kirasio na nsimbika myaka ilya makumi aani kulya bateń? 43Wode, mwakurika yeema lya Moloki na nyinyiri ya iṛuva lyanu Refani, mfwana mundetisongosia mu veni amu mutitereve. Nań mmusamisaa mwende kwaasha kita Babeli“.

44Kyeeri kilya vaande yeru veekee kulya bateń veeriee yeema lia lya mirambuye, sheeli avavasa ito arera na Mose alisongosie livakani na lia yeni andelolia. 45Nalyo llia vaande yeru valya veekee na Yosua vandetaṛana vakalyata urukeń lua lwa vayavaṛumu Iṛuva andevaumbuta kisanguń kya vaande yeru. Kikakaa kuri kumande kyeeri kya Davidi. 46Ito eenkooyaa ikundio̱ mbele ya Iṛuva. Nae kantereva amu akooiye Iṛuva wa Yakobo kirembo. 47Kake Salomon yye andentania numba. 48Kake ito akee ule ya foose akaa numba tantanwa na maako a vandu ndi, sheeli mwauya arerie: 49”Iṛuvewu nkifumbi kyakwa kya unini na isanga ni andu a yekeṛia marende akwa. Nnumba ingai ini mushitaniaa? Ana ni andu angaa niń niimuyaa? 50Ni uko lwakwa se lwatana ifi foose?“

51Ini muwore nra mutakee varini mirima ana marwi, nkonu woose muleaa Mumuyo Nsongori sha lia vaande yanu vatana, neeni mfo kuro da. 52Ni ungau umwi kari ka vaauya fisuku kitaare vaande yanu vantuṛua? Nawo iwaa vakawaa valya varingisia mboni ta isha lya ulya nsumani ulya ini alli mwammutuṛua na iwwaa. 53Ini mundewaria mavavaso mwielekio̱o̱ vvamalaika nta yawara. 54Kyasia ili vandeita firero fo, fikavailika mirimiń vakanrafunia mayoo. 55Nae kaishua Mumuyo Nsongori kalla na ule iṛuvewu kalolia unini lwa Iṛuva na Yesu aselele uko usha lwa Iṛuva. 56Kanumbua: Lla te, llolie iṛuvewu liruukie na Mwana wa nndu aselele uko usha lwa Iṛuva. 57Vakaṛoṛongya na ununga unini vakaraya marwi a wo vakanrumbukia kwa limwi. 58Vakansomuta wooṛo ya muṛi vakankaba na mawe. Na vaṛiingi valya vamwi vakarwaa miseto yawo marendeń a nkoo umwi eevaangwaa Saulo. 59Vakakaba Stefano na mawe, nae katereva kanumbua: Wui Nndumi Yesu, waria nrima wakwa! 60Kafwiria nri kaia na ununga unini: Wui Nndumi, manya kutavataalie ireko li! Neeli andemaa irera firero fi kanutuka.

Currently Selected:

Mitanie ya varumi 7: RWK72

Highlight

Copy