Mitanie ya varumi 9

1Kyasia Saulo eekee ikandara na ikabiṛia vandu va Yesu vawalwa. Kaenda kwa nkohani ninini 2kantereva barua ya yenda siṛiń ta Vayuda kulya muṛiń wa Damasiko. Kalolia-fo vandu va Yesu womi na vaka avafinge na ivarwaa Yerusalemu. 3Kyasia ifi eekee shień kufui afike Damasiko, kwibari langa ikammulikia yuka iṛuvewu. 4Kawa si kaita ununga lwimwiaa: Saulo uu, Saulo uu nki ifi kukee ishuumbuta? 5Kamwuṛa: Ni iwe i Nndumi? Kamwia: Niń nkee Yesu uu kukee imwumbuta. 6Kwimboo enda muṛiń ulya, nafo kuio̱o̱ kilya kyawara kutane. 7Na vandu valya variani nae kyaaṛoń vakasalala-wo veeṛiikaa, fulya vandeita ununga nta ilolia nndu. 8Na Saulo kakwimboo. Ifi andetaṛambua miso akimakii ilolia kindo ndi. Vakawwara uko vakamfita Damasiko. 9Nae eekee ndoń andu a mikonu iraru nta ilya shoonga ana nta inwa.

10Kyasia kulya muṛiń wa Damasiko eeifoo nndu wa Yesu irina lyamwi eevaangwaa Anania. Nndumi kawaanga yorień: Anania uu! Nae kairika kanumbua: Ee Nndumi. 11Nndumi kamwia: Kwimboo enda alya shień ya muṛi ilya ivaangwaa shia shisaari kuṛuye-fo nndu irina lyamwi nSaulo wa kulya Tariso akee kulya numba kwa Yuda, fulya akee itereva Iṛuva. 12Nae kalolia nndu yorień irina lyamwi ni Anania eeakaa kwamwi na imwekeṛia uko akooye lingi ilolia. 13Anania kamwaṛua kamwia: Wode Nndumi, namoongoywa vvandu veengi mboni ta nndu ulya, sheeli andelisa vandu vafo ukiva kulya Yerusalemu. 14Na kunu ni wikie muumu vvakohani vanini afinge valya woose vakukusurie. 15Nndumi kamwia: Kwendie da, amu nansaua nndu uu ave ndundi wakwa aende ikurika irina lyakwa kwa vandu va isangeń vatashiishi na kwa mamangi na kwa vana va Isiraeli. 16Nań mmworusaa matuṛulwa woose alya atuṛulwaa kiimba kya irina lyakwa. 17Na Anania kaenda kaaka numba ilya kaekeṛia Saulo maako kamwia: Mwanama Saulo, ni Nndumi Yesu anshiruma ulya andekukworusa kulya shień, amu kukooye lingi ilolia na iishuṛwa Mumuyo Nsongori. 18Lia eni miso amwi akataṛambuka kalolia lingi kakwimboo kabatiswa. 19Neeli andemaa ilya shoonga kauiywa mmuu. Kakaa ifo mikonu myaangu andu emwi na vanalosho wo veekee Damasiko. 20Na ilyo yeni kakwanisa ifo numba ta iterevia kya Yesu sheeli ye mMwana wa Iṛuva. 21Na woose vandeita vakariika nnu vakanumbua: Uu ni ulya se eekee ifinga valya vakee isenda irina li kulya Yerusalemu? Na kunu ansha kiimba kya ikyo amu avafinge avarwaa kwa vakohani vanini. 22Kake Saulo kaengeṛia iva ntomari kataṛaakisa Vayuda valya veekee Damasiko eekaarisaa sheeli uu yye Kristo. 23Ili mikonu miingi indeira Vayuda vakarera kyama, amu vawwaa. 24Kake Saulo kamanya ntambwe wawo. Vakallaya mbengeń ta muṛi kio na nsanyiń, amu vawwaa. 25Vanalosho vakamwimboo kio vakanrwaa nkusheń vakamwolota na usuṛumateń lwa muṛi.

26Neeli Saulo andefika Yerusalemu kaelelia ikulunga na vanalosho. Nawo woose veemweṛee nta ikusura sheeli ye mmwanalosho. 27Llyo Barinaba awwaria kanrwaya varumi kavaongoya kasa alolia Nndumi kulya shień. Na sheeli yye arera nae na kasa akwanisa irina lyamwi na baa kulya Damasiko. 28Nae kakaa andu emwi nawo kulya Yerusalemu eeakaa na isomuka. 29Kakwanisa irina lya Nndumi na baa. Karera na Vayuda valya veeukiee Ugiriki na ivingana nawo. Nawo vakalliya kyama kya iwwaa. 30Kake ili vaaroe vandemanya mboni ti vakankurika kumande Kaisaria vakanrika aende Tariso.

31Kyasia siṛi ikakaa na unambwe kulya Yudaya koose na Galilaya na Samaria. Ikakulunga ikakwengeṛia na ifumbuka na yeṛea Nndumi na yelekio̱ mMumuyo Nsongori. 32Nae Petiro kalengetia taari toose kainama kafikia vakristo veekee kulya Lida. 33Ifo kalolia-fo nndu umwi irina lyamwi ni Ainea. Nndu to eellalaa kiraań andu a myaka nyaanyi, amu eetoṛokombiee. 34Petiro kamwia: Iwe Ainea, Yesu Kristo akukiṛa. Kwimboo kukwalie kiraa kyafo ku muni. Lia eni kakwimboo. 35Na vandu woose veekee kulya Lida na Saron ili vandellolia vakaaṛukia Nndumi.

36Na kulya Yope eeifoo mwanalosho umwi wa kika irina lyamwi nTabita — misendie yayo nsarra. Nka uu eeishulee mitanie minuru eeutaa na misimbika ya yelekia vakiva. 37Na mikonu ilya kalwaa kafwa. Ili vandemaa insangya vakamwaṛa kai. 38Na muṛi wa Lida ukee kufui na Yope. Ili vanalosho vandeita sheeli Petiro akee ifo Lida vakaruma vandu vavili kwamwi vantereve atasinde isha kwawo. 39Petiro kakwimboo kaenda nawo. Neeli andefika vakaaṛukia nae kai. Misikeeti vakanserikia woose veeiyaa na imworusa miseto ilya Tabita andeoka lia akee andu emwi nawo. 40Petiro kavasomuta wooṛo woose kafwiṛia nri katereva Iṛuva. Numa kaindukia nnyiṅa ulya kanumbua: Tabita kwimboo! Nae kataṛambua miso amwi. Neeli andelolia Petiro kakwimboo kakaa rembo. 41Kawwara uko kansalalisa. Kavaanga vakristo valya na misikeeti kanseṛeesa mbele yawo akee na muu. 42Kikamanyika muṛiń woose wa Yope. Na vandu veengi vakakusura Nndumi. 43Kyasia Petiro kakaa mikonu milive ifo Yope numba kwa nndu umwi irina lyamwi nSimon akee nsisa shoni.

Currently Selected:

Mitanie ya varumi 9: RWK72

Highlight

Copy