Luka 7

Ukupola kwa muvomyi wa mupiti wa vasikali

1-10: Mat. 8,5-13.

1IlelʼuYesu lwʼamazilʼukuyanga zyonti zyʼahavavuzyaga kumakutwi ga vantu vonti, pʼahavalʼukwinjila mu-Kapelinahumu. 2Ilelo mwʼali munkaya mumwʼumunyamata wa mutwale wa vulugu, wʼavinile nkani nukwandʼukufwa; wʼali unkundwa kukwakwe. 3Uwenʼumutwale lwʼayiṿuyʼizya Yesu, pʼahatuma kukwakwe avasongo va vaYuda, ahati muhamulambilizye muhamuvuzye ayinzʼamuzuzuvushizyʼumunyamata wane. 4Ilelʼavene lwe vavazilʼukufiha pupo pʼalʼuYesu, pe vahapitilizya ukumulambilizya vahati: We ahondeyʼukumutula vovulʼiwe. 5Shʼakunzite nuluho lwitu, yope nisinagogi atuzenjeye. 6PʼuYesu ahavala navo. Ilelo lwe pasyaye pansi ukufiha kunyumba ya mutwale, pʼuwenʼahatumʼavajenzi vakwe ahati simuvale mutatinji: Utayilisye we Mwene, she ntahondeyʼine ukuti uyinjile munyumba yanʼiwe. 7Zye zizyo ntili kutankondeyʼukwinza kukwaho Ukwo ine ndali, yangaga lye lizwi lyeka, pʼakuzuzuvuhʼumunyamata wanʼuno. 8She ne muntu vwelele nane, mbisilwe kuṿinama kuvapiti, nane ndi navasikali kuṿinama ṿwane, ilelo inga nkuyanga kuli woka nkuti: Valaga kuvulive, pʼakuvala; kuwamwavo: Nzagagʼuku, pʼakwinza; kumunyamata wane: Vombagʼahalive, pʼakuvomba. 9UwenʼuYesu lwʼayiṿuye zinizi, pʼahamusukumila, ahavashevela ve vamulanditʼimpuga yonti, ahati: Nkuvavuzyʼimwe, nalyoli ulwitiho inzʼulu ntalwazile mwa Yisilayili umu. 10Ilelo lwe vavazilʼukufiha kuhaya vʼavatumilʼumutwale, pe vahaga umunyamata azuzuvusile.

Ukuzyuha kwa halumendo ahana ha mzvantandʼumuzishe mu-Nayini

11Ulwa ndavi pʼahavala munkaya yeka ye vakuti mwe mu-Nayini. Vahajenda nawo navasundikwa vakwe navantʼimpuga. 12Ilelo lwe vandʼukufiha papipi pashikwilo sha nkaya, yenyi, pʼavantu vahavalʼukumusyilʼumulumendo wʼafuye, umwanʼimozi mwa nyina, wʼali muzishe, navantu va muhaya impugʼimpiti vahajenda nawʼumwantanda. 13UwenʼuMwene lwʼamuwenyʼumwantandʼuno, pʼahamufwilʼuvwila, ahati: Kwe ndali ukuputa. 14Pʼahapalamila ahalemʼipagali, pe vahimilila ve vamunyatuye. Pʼuwenʼahati: We mulumendʼiwe, nkukuvuzya nkuti vuhaga. 15Pʼahatendamʼumufwe, ahandʼukuyanga. Pʼuwenʼahamupʼunyina. 16Pʼishitetemwi shihavagwila vonti, vahatinihʼuMulungu vahati: Alolesile umukuvwi umupiti mumwitʼumu. UMulungu atwenyizyʼiswe swe vantu vakwe. 17Panongwa zyakwe zinizi zihasata mwonti namu-Yudayi namunsi ya mupipi mwonti.

UYohani umwozyi

18-35: Mat. 11,2-19.

18PʼuYohani avasundikwa vakwe vahamuvuzya zyonti zinizi. 19PʼuYohani ahavitʼavasundikwa vakwe vavili, ahavatuma kwa Mwene, vahatinji: Amwe wewe we vatinji akwinza, amwe tumugulililajʼuwunji? 20Pe vahafiha pupo pʼali avantu vanava, vahati: AtutumilʼuYohani umwozyi kukwahʼiwe, wʼakuti: Amwe wewe we vatinji akwinza, amwe tumugulililajʼuwunji? 21Pahavalilizyo huho ahavazuzuvushizyʼavinji nimpungo zyonti nuvuvinu vwonti nave vali nimpepʼimbivi, navantonkʼavinji ahavapʼukwenya. 22Pʼahavamula ahavavuzya ahati: Muvale, muhamuvuzyʼuYohani nazye mukwenya nazye mukwiṿwa ukuti: Avantonko vakwenya, ve vakudyogolela vakujenda, avamambombo vasofilʼumuvili, avakutwi vakwiṿwa, avafwe vakuzyuha, avasamusu vakwiṿwʼintumʼinyinza; 23havili nkuti: musangalusʼuno wengʼatakupunula mulʼine.

24Ilelo lwe vavazile vʼavatumilʼuYohani, pʼahanda pupʼuYesu ahamuyanjilʼuYohani kulʼava ve vavungine pupʼimpuga, ahati: Muvazilʼukwenya shonu mulwugwa? Itete lye likuyugumbana kunkungu? 25Amwe muvazilʼukwenya shonu lelo? Muvazilʼukwenyʼumuntu wʼazwayʼamendʼamatinyu? Shʼava ve vakuzwalʼamendʼamatinyu nava ve vakulyʼiṿwa vuluṿu ṿwonti, ve vakuva muṿinamwene. 26Amwe muvazilʼukwenya shonu lelo? Umukuvwi? Ena nalyoli, nkuvavuzyʼine nkuti: Umupiti ukulusya avakuvwi. 27She we wuyo wʼayanzilwe namwa kalata ukuti:

Yenya, nkukutumilʼuhavizya wane

uwa kulongolela kwilongolela kukwaho,

wʼalikuyananizyʼidala lya kujenda mumwʼiwe.

28Nkuvavuzyʼine nkuti: Muli vonti ve vapafilwe kuvantanda atavonesile numʼumupiti kwa Yohani. Nkandʼumunsi kuli vonti mushinamwene sha Mulungu wʼamulusizyʼuvupiti. 29Navantu vonti ve viṿuye navasonkolamusonko vahanawitihʼuvugolosʼuMulungu, she vahozelwa mulwozyo lwa Yohani. 30Avene nyenʼavaFalisayi navamanyankomelezyo vahaṿwala-nganya ulululumilo lwa Mulungu lwʼavalulumiye, she vatahozelwa nawuyo. 31Mbaholanye nishonu avantu vashinishʼiva, vali fwe shonu? 32Vali fwe twana twe tutendime pamusolo, twe tukuvilishilana tukuti:

Nilonji twavahomeye, imwe nyene mutahashima;

nilosyo twalosizye, imwe nyene mutahakutʼamansozi.

33LwʼayinzilʼuYohani ahasita nukulyʼumukati nukungʼwelʼipele lya mampensya, pe mukuti: Ali nimpepʼimbivi. 34Havili ayinzilʼuMwanamuntu wʼakulya, wʼakungʼwela, pe mukuti: Yenya, umuntʼumuluṿʼuno, wʼushingʼwezi wa mampensyʼuno, uwamwavo navasonkolamusonko navatalamalandu. 35Izyenʼinjele zya Mulungu zye zikuloleha mwe muvana vakwe vonti ukuva ngolosu.

UYesu akupakwa amafuta muvinama nishiholanyo sha ve vahofilʼimpiya vavili

36Pe wokʼumuFalisayi ahamwita ukulya nawo. Pʼahinjila munyumba ya muFalisayi ahatendamʼukulya. 37Ilelo lwe munkaya mwʼalʼumwantanda umutalamalandu. Wʼahiṿwʼukutʼakulya munyumba ya muFalisayi. Pʼahatwalʼinsupa ya mafutʼamagomu. 38Ahavalʼukwimilila kuṿinama mwisinda, ahakutʼamansozi. Amansozi ahazwilizya muṿinama ṿwakwe. Havili ahasyumula muṿinama ninsisi zya kwitwe lyakwe, ahaṿifipa, ahaṿipaha namafuta. 39UwenʼumuFalisayi wʼamwisite lwʼamuwenyi, pʼahasiva muhati yakwe ahati: Umuntʼuno inga mukuvwi nalyoli, pe nkwʼamumanyilʼumwantandʼuno wʼamupalamansizyʼumuvili ukuti we wʼushitʼulive mutalamalandu. 40PʼuYesu ahamula ahati: Simoni, ndi ninongwa iya kukuvuzya. Uwenʼahati: We Musambilizi, Ukwo yangaga. 41Uwenʼahati: Alipo wokʼumupaṿilampiya wʼali navʼavapaṿi vavili. Wokʼapaṿilʼamadinali amashumʼamashumi gasano, uwamwavo apaṿilʼamashumi gasano vwelele. 42Ilelo lwe ṿisoṿilʼavene iṿwa kumuvuyizizya pʼahavafwilʼuvwila ve vavili vonti. Ukwo lelo, ve vanava ali kwi wʼalimukunda nkani? 43AhamulʼuSimoni ahati: Nkutʼuno wʼamufwiliyʼinyinji. Pʼuwenʼahati: Ulonzile ulovosizye. 44Pʼahashevela, ahamwenyʼumwantanda, ahamuvuzyʼuSimoni ahati: Umuwenyʼumwantandʼuno? She ninzile munyumba yahʼumu, iwe utampiyʼaminzi aga kugeza muṿinama ṿwane, uwene nyene azwilizizyʼamansozi muṿinama ṿwane, aṿisyumuye ninsisi zyakwe. 45Iwe utamfifilʼine. Uwenʼatalisile lwe ninjiye munyumbʼumu, atakulehʼukufipʼiṿinama ṿwane. 46Iwe utampasilʼitwe namafuta. Uwene nyene apasilʼiṿinama ṿwane namafutʼamagomu. 47Mwe mumwo nkuti amalandu gakwe gaswililwe ge minji, shʼakunzitʼishikunzi she shinji. Nkandʼuno we gaswililwe mansi vwelele, wʼakukundʼishikunzi shinsi. 48Pʼahamuvuzyʼumwantanda ahati: Uswililwʼamalandu gaho. 49Pʼavene ve vatendime nawʼukulya vahasiva muhati zyavo vahati: We muntu vulʼuno, wʼakuti nage malandu akugaswila? 50Pʼuwenʼahamuvuzyʼumwantanda ahati: Lukuposile lwe lwitiho lwaho. Valaga nuvwihalo.

Currently Selected:

Luka 7: NYi1965

Highlight

Copy