Luka 8

Avantanda ve vamuvombeyʼuYesu

1Pisinda pa zinizi pʼuwenʼahazyungula mumalinga gonti namutusasa twonti, ahayangʼinongwʼinyinza izya vumwene vwa Mulungu. Avishumi navavili vahava nawo. 2Navantanda vamo vahajenda nawo vʼavazuzuvushizizye nimpepʼimbivi nimpungo, avaMaliya wev atili wa mu-Magadala, wʼafumizye mumwakʼimpepʼimbivi zisano nazivili, 3nuYohana umuha-Shusa umuhombe wa Helodi, nuSusana navana wavʼavinji, ve vahavatulʼukuvalela nawuyo navasundikwa vakwe nishuma shavo.

Ishiholanyo sha mupesambeyu

4-15: Mat. 13,1-23. Mal. 4,1-20.

4Ilelo lwe vavunginʼavantʼimpugʼimpiti nave vafumile munkaya munkaya, ve vahamukululushilaga wuyo, pʼuwenʼahavavuzyʼishiholanyo, ahayanga mumwo ahati: 5Lumʼumupesambeyu ahavalʼukupesʼimbeyu yakwe. Ilelo lwʼamakupesa, pe yokʼihagwa pidala. Avantu vahayihanya niṿinama, pe ninyunyi zya kumwanya zihaseva zihamala. 6Yokʼiyamwavo ihagwa piyalavwe. Iyenʼihuma lwʼimezile hansi, shʼitali nishingʼwelelezi. 7Yokʼiyamwavo ihasangana nulwangwa lwe yagwa. Ilelʼulwenʼulwangwa lwe lumezile poka nayo pe luhayibuda. 8Nkandi yokʼiyamwavo ihagwa pansʼinyinza, ihamela, ihelʼinsangʼamashumʼishumi. Lwʼayanzile zinizi pʼahavilishila ahati: Uno wengʼamakutwi ali nago, wʼatejelezyaje.

9Pe vahamuvuzilizyʼavasundikwa vakwe vahati: Ishiholanyo shinishi he hantu vuli? 10Uwenʼahati: Imwe mupelilwʼukuzimanya izya kukwilu zya vumwene vwa Mulungu. Avanji vala ve vakuvuzilwa mwe muṿiholanyo, nashenga vakwenya Pope ukuti vatazilolaje, nashenga vakwiṿwa pope ukuti vatazimanyinsanye. 11Ishenʼishiholanyo nyene she shinishi: Imbeyu lye lizwi lya Mulungu. 12Vanava ve vali papipi nidala, ve vuvo ve vakwiṿwa, ilelo havili umukwalanzi akwinza akusompolʼizwi mumoyo gavo, shʼakuti valipona lwe livahozile. 13Vanava nyenʼava piyalavwe, ve vuvo ve vakulinga viṿuyʼizwi, pe vakujenda nukuseshela ukuliposhela. Avenʼamazi vate nago, ulwitiho lwavo lwe lwakuvaholʼisiku lyoka vwelele. Nkandʼinga zyinzilʼizya kuvalinga, pe valigalamuha. 14Iyene yʼihasangana nulwangwa lwe yagwa, ve vuvo ve vakulinga viṿuye, pe havili vakujenda nuvukutano nuvulonsi nuvunonu vwa vulanzi zye vakwaga zikuvabuda, ilelo pe ninsanga zitakwela nazimo kukwavo. 15Iyene nyene iya pansi nyinza, ve vuvo ve vakulinga viṿuye, pʼizwi vakuva nalyo mumoyʼaminza amagolosu, vakujenda nukuhomʼinsanga mwe muvusitamulaha.

Insambilizyo kufuma mushiholanyo sha nyale

16-18: Mal. 4,21-25.

16Inyale ingʼumuntu ayiholelezizye pe numo atakuyikupishila nishivo, numo atakuyiviha mwizyungululu lya shitala ndali, nkandi pashilemanyale vakuyiviha, vonti ve vakwinjila munyumba ukuti vayilole ukuhozya. 17She litalipo nalimo lye liṿwamile lye litalivumbuhʼapazelu; havili nalimo lye lizyihime lye litalikupulwa nukulolehʼapazelu. 18Mwandaje mutejelezyajʼahinza zyenga mukwiṿwa: Shʼuno wengʼali naṿwo yimo, wʼalipelwʼiṿwamwavo; Uwene nyenʼuno wengʼate naho nahamo, hʼakusiva ukuva naho he hakusompolwa kuli wuyo.

Uvwanamuntu vwa nalyoli 19-21: Mat. 12,46-50. Mal. 3,31-35.

19Pe nunyina navamwavo vahavala pʼali, vahapotwa lwe vakuti tuhomane nawo, shʼali pahati pampuga. 20Pʼavantu vahamuvuzya vahati: Uvinyu navamwinyu iva vimiliye kunzi, vakuti vakwenyʼiwe. 21Uwenʼahamula ahati: Ine umayi navamwitu, ve vuvo ve vakutejelezyʼizwi lya Mulungu nukulandata.

UYesu akupililʼinkungu

22-25: Mat. 8,18; 23-27. Mal. 4,35-41.

22Umusanya woka vahayipashila mwivoti nawuyo navasundikwa vakwe. Uwenʼahavavuzya ahati: Tulambajʼusumbi tuvalʼisyila lila. Pʼavene vahasunkʼivoti. 23Ilelo lwe likujendʼivoti, pʼuwenʼahakatʼutulo. Pʼihavuhʼinkungu pasumbi, amavilingwa gahadomoshela mwivoti. Vahajenda nuvupotwe nkani. 24Pʼavene vahamwinzila, vahamudamusya, vahati: Mwene, Mwene, tukulova. Pʼuwenʼahavuha, ahapililʼinkungu namavilingwa ga minzi, pe gahapuma, kuhatehama kunzi. 25Uwenʼahavavuzilizya ahati: Ulwitiho lwinyu luli kwi? Avene vahatetema nukusukumila, vahavuzilizanya vahati: Mwati unanu wununo? She naye nkungu nage minzi gakumusajila zyengʼakuhomelezya.

Ukupola kwa wa mpepʼinkandamanu wa vaGelaseni

26-39: Mat. 8,28-34. Mal. 5,1-20.

26Pe vahalamba, vahafiha munsi ya vaGelaseni, yʼilungamine niya Galilayi pasumbi. 27Ilelo lwʼakufuma akuzuva pashipuma, pʼahahomana numuntu wa nkaya yiyo, wʼali nimpepʼimbivi. Ayanzite he hali ukujenda shisitakuzwalʼamenda nagamo, atahadila namunyumba nkandi mwe mumbipa. 28LwʼamuwenyʼuYesu pʼahavilishila, ahamugwila muṿinama, ahapongomohʼizwʼipiti ahati: Tuli vuli nane nawe, we Yesu, Mwana wa Mulungu uMulusyi? Nkulambilizya kukwaho nkuti: Utanizizyaje. 29Shʼuwenʼayipiliyʼimpepʼimbivi atili: Fumaga mumuntʼuno. Shʼihamutamwaga shima ukumudendemula mwonti mwonti. Avamwavo shima vahati tumukunje namanyololo namakofi, tumusungaje. Nkandʼuwene shima ahada-dulanyʼiṿwa kumukunjila, pʼimpepʼimbivi havili ihamushimbizya mulwugwa. 30PʼuYesu ahamuvuzilizya ahati: We nanʼizina? Uwenʼahati: Ne Mpuga. She zyinjiye mumwakwe impepʼimbivʼinyinji. 31Pe zihalambilizya kukwakwe zihati: Utatuvuzyajʼukuti simuyitaje mushiliva sha kungolongo. 32Ilelo lyali pupʼidimilo lya nguluvʼinyinji, zihalyanga mwilisyo pigamba. Pe zihalambilizya kukwakwe zihati: Utupanjʼinguluve zila, mwe twinjilʼiswe. Uwenʼahitiha. 33Pʼimpepʼimbivi zihafuma mumuntʼuno, zihinjila munguluve. Pʼidimilo lyonti lihagalagatila paluvambala mwa sumbi, lihamila. 34Avenʼavadimanguluve lwe vaziwenyi zinizi, pe vahashimbila, vahazikumusya namunkaya zyonti namumasasa gonti. 35Pe vahavuhʼukuvala Ukwenya zizyo zyʼapezile. Vahafiha pupo pʼalʼuYesu, vahamwagʼumuntu we zifumile mumwakʼimpepʼimbivi atendimʼahinza kuṿinama kwa Yesu, azwayʼamenda, asansamusile. Pe vahatetema. 36Avene lelo ve vaziwenyi vahavavuzya izya kumuzuzuvushizya uwa mpepʼimbivi. 37Pʼavantu va munsi ya mu-Gelaseni impuga yonti vahati: Yepaga munsi yitʼumu. Shʼishitetemwi shihavagwilʼishipiti. PʼuYesu ahayipashila mwivoti, ahagaluha. 38Uwenʼumuntʼuno, we zyafumile mumwakwʼimpepʼimbivi, wope ahalambilizya kukwakwe ahati: Mbanje nawe. Uwenʼahamugalusya ahati: 39Valaga kuhaya kukwaho, uvavuzyʼavantu zizyo zyʼakupeleyʼuMulungu. Pʼahavala, ahazikumusya munkaya yonti zyʼamupeleyʼuYesu.

Ukuzyuha kwa mwanʼumulindu wa Yayili nukupola kwa mwantanda wʼali nisha mwiho

40-56: Mat. 9,18-26. Mal. 5,21-43.

40IlelʼuYesu lwʼagalusile, pe vahamuposhelʼavantʼimpuga. She vonti vamuguliliye. 41Pe vahaga akupalamila umuntu, wʼizina lyakwe ali wʼuYayili, umupiti wa sinagogi. Wʼahasugamila kuṿinama ṿwa Yesu, ahalambilizya kukwakwe ukuti ahinjile munyumba yakwe. 42Shʼali numwanʼumulindu woka mwenʼimozi, wʼamazilʼamahʼishumi nagavili, wʼasyaye hansʼukufwa. Ilelʼuwene lwʼakutʼimbale pʼavantu vahatitilinkana nawo, she valʼimpuga.

43Pʼali pupo wope numwantanda woka, wʼalimbiliye nisha mwiho amahʼishumi nagavili. Ishuma shakwe shonti shasiliye muvaganga, nakumuzuzuvushizya numo. 44Wʼahapalamila mwisinda, ahamupalamansyʼamenda gakwe kuvupinte. Ilelo pe shihuma pupo ishiduda sha mavanda gakwe. 45PʼuYesu ahati: Unanu ampalamansizye? Lwe vahahana vonti, pʼava-Peteli nave vali nawo vahati: Mwene, ukusisinkana navo avantʼimpuga ukutitilinkana navo. 46UwenʼuYesu ahati: Wokʼampalamansizye. She nazilʼamaha gakufuma mumuvili mumwanʼumu. 47Ilelʼumwantanda lwʼayazile ukuti vakumwaga, pʼahapalamila kukwakwe shʼakutetema, ahasugamila, ahayanga lwe vakwiṿwa vontʼavantu zizyo zye zyatili amupalamansye, nazizyo zya kuzuzuvuha luvilo luvilo. 48Uwenʼahamuvuzya ahati: We mwana wane we, lukuzuzuvushizizye lwe lwitiho lwaho. Valaga nuvwihalo.

49Ilelo lwʼakuyanga linili, pʼahaloleha woka wʼafumile pasongo wa sinagogi, ahamuvuzya ahati: Umwana waho afuye. Utamulisyajʼumusambilizi lelo. 50UwenʼuYesu lwʼayiṿuye pʼahati: Utatetemajʼiwe, uyitihaje, pʼakupona. 51Ilelo lwʼavazilʼukufiha munyumba, pʼahagalusya vonti ve vatili twinjile nawo. Ahasenda veka ve vaPeteli nuYakobu nuYohani, nuyise wa mwana nunyina, vʼahinjila navo. 52Vonti vahakutʼamansozi, vahalosyʼilosyo lya pamwana. Pʼuwenʼahati: Mwe, kwe ndali ukulosya, shʼatafuye ndali, akasite twe tulo. 53Pʼavene vahamuseha, she vamanyilʼukutʼafuyʼumwana. 54Pʼahamulemʼumuhonʼumulindu, ahavilishila ahati: We mwana, we vuhaga. 55Pʼumupepo wakwe wa vulanzi ahavwela, ahinza mumwakwe, ahavuhʼapashezi. Uwenʼahavavuzya ahati: Mumupanjʼiṿwa kulya. 56Pʼavapafi vakwe vahatentwa muhati. Uwenʼahavahana nkani ahati: Mutamuvuzyaje numʼumuntu zye zipezilwe.

Currently Selected:

Luka 8: NYi1965

Highlight

Copy