Luka 6

Ukwimishilwa kwʼisabati

1-5: Mat. 12,1-8. Mal. 2,23-28.

1Lumo lelo pisabati lwʼakutuha mwidala mumagunda, pʼavasundikwa vakwe vahadumulʼamatwe ga ngana, vahapukusa munyove, vahalya. 2Pe vamʼavaFalisayi vahati: He mukuvomba hashi he mwiho ukuvomba pisabati? 3PʼahamulʼuYesu ahati: Mutazyazilʼimwe mwa kalata zila zyʼahavombʼuDavidi pala pʼihamulumʼinzala na wuyo nava ve vali nawo? 4Pala pʼahinjila munyumba ya Mulungu, ahasendʼamakati ga lulolesyo, ahalya, ahavapa nava ve vali nawo, ge shima numo atahaiya nalumo, ge vahalyanga ve vashiputo veka? 5Havili ahavavuzya ahati: She lyope nisabati uMwanamuntu wʼuMwene wakwe.

6-11: Mat. 12,9-14. Mal. 3,1-6.

6Ilelo pisabati lyamwavo pʼahavalʼukwinjila musinagogi, ahavasambilizya. Mwʼali wokʼumuntu wʼumuhono wakwe umulilo ayumiye. 7Avene navamanyakalata avaFalisayi vahamutega, vahati twenye ingʼakumuzuzuvushizya pisabati, vahati mwe tukuzyaga mumwo izya kuzuvila mumwo. 8Uwene nyene ahamanyʼinsivo zyavo, pʼahayanga kumuntu wʼumuhono ayumiye ahati: Vuhaga, uyimilile pahatʼipa. 9PʼuYesu ahavavuzilizya ahati: Simumbuzyʼimwe, zyonu zihondeye pisabati, nukuvombʼinyinza nukuvombʼimbivi, nukupohʼuvulanzi nukutupula? 10Ahavenyelezya vonti mwe vazyunguluye. Pʼahamuvuzya wʼumuhono ayumiye ula ahati: Iwe golosyʼumuhono waho. Uwenʼahawugolosya. Pʼahandʼumuhono wakwe havili, ahava mwinza. 11Pe vahava fwe ngati vapenilʼishipena ukuṿitwa, pe vahavalʼukuyangana ilya kuti vangamuhonzezyʼuYesu vahati tutinji tutinji.

Avapositili ishumi navavili

12-16: Mat. 10,2-4. Mal. 3,13-19.

12Mumanda gugo umusanya woka ahavala pigamba ukuputa. Ahaputa vusiku vwonti kwa Mulungu. 13Lwe kushiye kunzi, pʼahavitʼavasundikwa vakwe, ahasavulʼishumi navavili, vʼahavapa nilya vapositili izina. 14Ve vaSimoni, wʼamupiye nilya Peteli, nuAndeleya umuzuna wakwe, nuYakobu nuYohani nuFilipu nuBalitolomayi 15nuMatayi nuToma, nuYakobu umwana-Alifayi, nuSimoni we vatili wʼUhayikungule, 16nuYuda umwana-Yakobu, nuYuda wa mu-Kalyoti we pisinda ahava nkomi.

17-19: Mat. 4,23–5,1. Mal. 3,7-12.

17Pʼahiha navʼavantu, ahavalʼukwimilila navo pe patelime. Vahava pupo navasundikwʼimpuga, navantʼavinji nkani, ve vafumile mwonti mu-Yudayi namu-Yelusalemu nakushipuma sha mu-Tili nisha mu-Sidoni, 18ve vinzilʼukwiṿwʼinongwa zyʼahayangaga nukuzuzuvuhʼuvuvinu vwavo. Vope nava ve zihavatamwagʼimpepʼinkandamanu, vontʼahavazuzuvushizya. 19Ilelo vontʼimpuga yonti vahati tumupalamansye. She vazilʼamaha gakufuma mumwakwe aga kuvazuzuvushizya vonti.

Izya numo nizya kuti Ye mayi we!

20-23: Mat. 5,3. 4. 6. 11. 12.

20Pʼahavusyʼaminso gakwe Avasundikwa vakwe, ahati:

Mwe vasangalusʼimwe mwe vasamusu,

shʼishinamwene sha Mulungu shinyu mwenemwe.

21Mwe vasangalusʼimwe mwʼinzalʼikuvaluma shinishi, she muliyikutaga.

Mwe vasangalusʼimwe mwe mukukutʼamansozi shinishi, she mulisehaga.

22Mwe vasangalusʼimwe, ingʼavantu vakuvapatʼimwe, inga vakuvavingʼimwe, inga izina lyinyu avantu vakuliyanjilʼahavivi nukulipalasila kunzi inga vakuti lye livivi, she mwe vantu wa Mwanamuntu.

23Muhaseshelaje musanya wuyo, muhadovelaje, she pʼiṿwa kuvalipila ṿilivʼiṿwinji kumwanya. Shʼavayise vavo she vahonzizye vovulo ukuvizizyʼavakuvwi.

24Nkandʼimwe, ye mwe, mwe vadumbwe,

she muyisendeye nzila iṿwa kuvasuvizyʼimwe.

25Ye mwe, imwe mwe muṿimbilwe shinishi,

she pʼilivalumʼinzalʼimwe.

Ye mwe, imwe mwe mukuseha shinishi, she pe muliswimililwa, mulikutʼamansozi.

26Ye mwe, imwe inga vontʼavantu vakuvayangʼinyinza,

shʼavayise vavo she vahonzizye vovulo ukuvayangʼinyinza avakuvwi avilenga.

Ukukunda avalugu

27Imwe nyene mwe mukutejelezya nkuvavuzyʼine nkuti: Simukundʼavalugu vinyu, muvavombelʼuvwinza vuvo ve vavapasite, 28muvalote ve vakuvatipa, muvalavile ve vakuvaligʼimwe. 29Uno wengʼakukukanza nikofi pavudili vwoka, wʼumupanje nuvwamwavo vwope. Uno wengʼakufwulʼinkanzu yaho, wʼutasitilaje nalye lishati lyaho. 30Vonti venga vakulavʼiṿwa kulava kukwaho, vʼuvapanje. Uno wengʼakufwulʼiṿwaho, wʼutamulanduzye. 31Zyonti zyenga mukwanzʼukuti avantu vavavombelʼimwe, zye vope muvavombelaje zizyo namwenemwe. 32Apene inga muvakunzite vuvo ve vavakunzite namwenemwe, pʼunanʼatinji mwasalipa mwavomba? She vope avatalamalandu vakukundana vuvo vatupu. 33Havili inga mukuvavombelʼinyinza vuvo ve vakuvavombelʼinyinza namwenemwe, pʼunanʼatinji mwasalipa mwavomba? She vope avatalamalandu vakuhonzya vovulo. 34Havili ingʼavantu mukuvapavila lwe mukusuvilʼukuṿisenda nohavili, pʼunanʼatinji mwasalipa mwavomba? She vope avatalamalandu vakuvapavilʼavatalamalandu avamwavo, vakusuvila ukuti tukuvalʼukusenda mwe ṿwalʼiṿwitu. 35Nkandi simukundʼavalugu vinyu, muvavombelʼavantʼinyinza, muvapavile niṿwa kuvapavila shisitakusuvila ukuti valivagalushizya yimo, pe niṿwa kuvalipilʼimwe ṿilivʼiṿwinji, muliva mwe vana va Mulusyi, shʼuwene mutonsu nakulʼava ve vatakusalifwa kukwakwe nakuvanyala. 36Mwe mumwo muve nulupepelezyo, inza she wope nuSo ali nulupepelezyo.

Ukulongʼavanji

37-49: Mat. 7,1-23.

37Mutalongaje, pe namwe mutalilongwa. Mutamuyanjilʼahavivi numʼumuntu, pe namwe numʼatalivayanjilʼahavivi. Muvaleshele venga vali namalandu kumwinyu, pe namwe mulileshelwa namalandu ginyu. 38Simuvapanjʼiṿwa kuvapʼavantu, pe valivapanga yimo namwenemwe. Mulipelwa iṿwa mushilinjilo iShinza ishihanyile ishisindile she shikulafuha pavwambililo vwa menda ginyu. She shifinjile shisho she mukuvalinjilʼavanji, she mulilinjilwa shisho namwenemwe.

39Ahavavuzya nishiholanyo ahayanga ahati: Amwe wokʼuwantonko amulemelʼindisa uwantonko wamwavo? Vatalivalʼukugwa mwitego ve vavili? 40Numʼumusundikwa atalusizyʼuvupiti umusambilizi wakwe. Uno wengʼamazilʼukuyeveta, pʼali fwe musambilizi wakwe. 41Ukwenya hashʼahambaza he hali mwilyinso lya wamwinyu, shʼigambo lye lili mwilyinso lyahʼiwe utakwenya? 42Havili watʼuyanje vuli kuwamwinyu ukuti: Weya, leha nkwefwʼahambaza he hali mwilyinso lyaho, shʼigambo lye lili mwilyinso lyaho mukwenya? We mulumilengʼiwe, uyefwe sutʼigambo lye lili mwilyinso lyaho wenewe, inga pʼulinje lelo ukumwefwa wope nuwamwinyu ahambaza he hali mwilyinso lyakwe.

43Nalimʼikwʼilyinza lye likuhomʼinsangʼimbivi. Nalimʼikwi lye livivi likuhomʼinsangʼinyinza. 44Gontʼamakwi gakumanyiha pansanga zyakwe. Shʼamakunyu vatakutonola palwangwa, gope namampensya vatakuyavila pantolomṿu. 45Umuntʼumwinza akuvumbula zye nyinza mwʼalunzite vwe vwinza mumwoyo wakwe. Uwenʼumuntʼumuvivi akuvumbula zye mbivi mwʼalunzite vwe vuvivi mumwoyo wakwe. She mwilomʼumu mwʼumuntu akuyanga zye zikulafuha mumwoyo wakwe.

Ukwiṿwa nukuvomba

46Pe mukuntaha shonʼine mukuti: Mwene, Mwene, havili mutakulandata zizyo zye nkuvavuzya?

47Ilelʼuno wengʼakwinza kukwane wʼakwiṿwʼamazwi gane nukugalandata, muleshe mbalanganizye we nkuti aholine nawo: 48Ali fwe muntu wʼazenzilʼinyumba, pʼahabanʼulufula ulwivizu nkani, ulwalo ahaviha piyalavwe. Ilelo lwe gizuyʼamajenje pʼamahava gahabunka panyumba yinino, nkandi gahapotwa ukuyiyinzya, she yazenzilwʼahinza. 49Nkandʼuno wengʼakusitʼukulandata lwʼayiṿuye, wʼali fwe muntu wʼazenzilʼinyumba pantope vwelele insitakwala pansʼulwalo. Ilelo lwe liyibunchiyʼihava, pʼihagwa luvilo luvilo. Ihamongonkana ukumongonkanʼukupiti.

Currently Selected:

Luka 6: NYi1965

Highlight

Copy