Mapookyony 13
13
Abramu na Loti Valakana
1Abramu kasaama auka Misri, we na nka wakwe, na fyoose atiri na Loti amwi nawe, vakasoka vakafika Negebu,#13:1 Negebu:Kasa ng'alo la Negebu. 2nawe Abramu ekee isimba nnu lya findo fyevikkya, na fesa na saabu. 3Keengera yeenda auka Negebu fika Betheli, ando alya kwekee yeema llya lyakwe lya mbee nnang'ani ya Betheli na Ai, 4nang'u ng'u kwekee kitara kyerasya ensongosia kipooka ng'u Abramu aleterevya Nndumi Iruva.
5Na Loti yeto eriani na Abramu nawe etiri maronda a ng'umbe na moonri, na yeema. 6Na uruka llwa llulevamaa naambo vasange ando amwi-fo, nyeli masaa awo ekee meengyi, kutani valemwa ikaa kimwi. 7Kukavekaafo mwaandu nnang'ani ya veeisa findo va Abramu na valya va Loti na kyeeri kilya vandu veefo urukeny ni Vakanaani na Vaperizi.
8Abramu kavia Loti, “Naasa, shakutereva myaandu isie kwakwa yeny neewe, na kwa veeisa findo fyakwa na veeisa findo fyafo, yese lukee vana va nka. 9Uruka elu loose lukee mbee yafo ni lwafo. Naasa shakutereva kaa kwaasha neeny, kweenda taari ya woko umuso yeny sheende taari ya woko usha; kweenda taari ya woko usha, sheende taari ya woko umuso.”
10Loti kaipoo miso kalollya imungo lyoose lya Yordan shaasa lyitiri mura wo ando, sha nnda wa Nndumi Iruva, sha uruka lwa Misri taari ya Soari. Ekyi ni kyeeri kilya kulaore Nndumi Iruva ellyamara Sodoma na Gomora. 11Naasa Loti kasauwa imungo lyoose lya Yordan, Loti keenda taari ya ngama, vakalakana ve vavii. 12Abramu kakaa urukeny lwa Kanaani, na Loti kakaa miriny ya imungon, kasembera yeema lyakwe fika Sodoma. 13Kyeendi vandu va Sodoma vekee varavi, vakatanya Nndumi Iruva ngyulyamari shiingyi nnu.
Abramu Asammya Hebron
14Nndumi Iruva kavia Abramu, kyeeri alemaa ilakana na Loti, “Lola pookya yoo kukai taari ya ndoo, na ya sinde na taari ya ngama na ya nkwaany; 15mashika uruka elu loose kululolye mmbo nshekuningaa yewe na ufyari lwafo fika llung'anu. 16Na ufyari lwafo nshelufumbutaa sha uteeri lwa sumbai lulavaa yeekyena; na kwakooya ndu eedima yeekyena uteeri na ufyari lwafo nalo ashidimaa yeekyena. 17Kwipoo kweende kusengera uruka elu, kulole ivari lya vayo na waasha lwa vayo, mashika uruka elu shikuningaa yewe.” 18Naasa Abramu kakwiipo kandekaa ando kwekee miri efo Mamre kufii na Hebron katanya-fo Iruva kitara kyerasya.
Currently Selected:
Mapookyony 13: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
