Mapookyony 14

Abramu Akira Loti

1Naasa kyeeri kya Amrafeli mangyi ya Babilony na Arioko mangyi ya Elasari, na Kedorlaoma mangyi ya Elamu na Tidali mangyi ya Goimu, 2vakakapa fira na mangyi ya Sodoma na Birsha mangyi ya Gomora, na shinabu mangyi ya Adima na Shebari mangyi ya Seboimu na mangyi ya Bela (nyo Soari).

3Yewo woose vakakwaannya imungony lya Sidimu, (kulya Yeeve lya Shumbi). 4Ando a myaaka ikumi na ivii vakarundya Kedorlaoma, indi mwaka wa ikumi na kararu, vakamwaluka.

5Mwaka wa ikumi na kaana, Kedorlaoma na vamangyi vekee nawe. Vakakapa Varefaites kulya Ashteroth Karnaimu, na Varusi kulya Hamu, na Vaemu kulya Shawe-kiryataimu, 6Wahori kulya ifumbuny lyawo lya Seiri kufike Elparani kufii na kasa koomu. 7Naasa vakawuy vakafika Enmisfati, (nyo Kadeshi) vakakapa uruka loose lwa Vaamaleki, na lwa Vaamori yewo vekee Hasason-tamari.

8Mangyi wa Sodoma na mangyi ya Gomora na mangyi a Adima na mangyi ya Seboimu na mangyi a Bela, (nto Soari) vakakupoo vakadeesya fira kulya imungony lya Sidimu; 9vakapani na Kedorlaoma mangyi ya Elamu, na Tidali mangyi ya Goimu, na Amrefeli mangyi ya Sinari na Arioko mangyi ya Elasari, vamangyi vaana ando a valya varaanu. 10Na imungo lya Sidimu mmbo lyeshwe muya. Na vamangyi wa Sodomu na Gomora vakarisha, vakafiiya-fo, na yewo vesaa-u vakarishya ifumbuu. 11Vakatira findo fyoose fya Sodoma na Gomora na shoonga tawo toose, vakeenda. 12Vakatira Loti mwana wa mwanamaye wa Abramu yeto ekee Sodoma, na masaa akwe vakeenda. 13Nndu umwi aleturushuka-fo, kafitya Abramu Mwebrania mbony tilya; nawe mmbo elele Ngoroshony ya Mamre, Mwamori ulya mwanamaye wa Eshkoli na mwanamaye wa Aneri, nawo mmbo veeshani na Abramu.

14Abramu ekiita mwanamaye antirwa mfungwa, kaniingya vasero vakwe fisha, vawonikkye yoo kyeny kwakwe, vandu iyana na ikumi na nyanya. Kavasora fika Dani. 15Vakakudeesya vakapani nawo elyi kio we na mashinga akwe. Kavakapa kavafuna fika Hoba, ukee taari ya ngama ya Dameski. 16Kaviira findo fyoose, kaviira na Loti mwanamaye na findo fyoose ando amwi na vaka na womi.

Meleksedeki Avikkya Abramu Mbora

17Kyeeri Abramu aleuka ikapana na Kedorlaoma na vamangyi valya vekee nawe, mangyi ya Sodoma kashemwaambya alya imungony lya Shawe, (nalyo ni imungo lya mangyi). 18Na Melkisedeki mangyi ya Salemu keende nkate na mfinyu, nawe mmbo ekee nkohani wa Iruva yeto Akee Uwe ya fyoose. 19Kammbikya mbora, kaamba,

“Iruva yeto Akee Uwe ya findo fyoose

navikkye Abramu mbora,

atannyi iruveeu na ulana.

20Naitikiswa Iruva eto Akee Uwe ya findo fyoose,

yeto alevika vakiduva vafo maakony afo.”

Abrahamu kaningya kyenga kya ikumi kya findo fyakwe.

21Mangyi wa Sodoma kavia Abramu, “Shininga vandu yewo, na masaa yoo engyi kwipoo yewe.”

22Abramu kavia mangyi ya Sodoma, “Shallya mboo na irina lya Nndumi Iruva, Iruva eto akee Muumbi wa iruveeu na ulana, 23sheelyi nshisheipoo nta uruu ao ukova lwa kyaaru, nta kindo kimwi kyafo-fo, kulasheeamba, ‘Shammallwa Abramu isimba! 24Nshishipoo nta kindo kimwi-fo kuuta findo efyo vasero valelya na waavi lwa vandu ewo valeenda neeny, mmbo Aneri, Eshkoli, na Mamre; wo vaonise waavi lwaawo.’”

Currently Selected:

Mapookyony 14: MAS2

Highlight

Copy