Mapookyony 12
12
1Nndumi Iruva kavia Abramu, “Kwiipoo kuuke kunu urukeny lwafo, na ufyari lwafo na va mmba ya ndoo, kwende kundefika urukeny elo nshekoraa. 2Neeny nshekwallwaa ufyari uniini, shikuwikye mbora, nsheng'anisa irina lyafo neewe kuwe mbora; 3vekuvikya mbora neeny nshevavikyaa mbora, neeto akudengaa neeny shindenge, neefo kwafo mfo ngyufyari toose ta ulana tishevikyoo mbora.”
Iruva Avaanga Abramu
4Kyasia Abramu keenda shaasa Nndumi Iruva alemmbia, Loti keenda amwi nawe. Nawe Abramu etiri myaaka makumi mfungare na iraanu kyeeri euka Haran. 5Abram u keepoo nkaakwe Sarai na Loti mwana wa mwanamaye, ando amwi na findo fyawo fyoose vetiri, na vandu yewo valewonisa efo Haran, vakauka-fo naambo veende Kanaani, nao vakaanga urukeny lwa Kanaani. 6Abramu keera nnang'ani ya uruka kafika ando kweele kwevaangwa Shekemu; kutiri nri va mwaloni va More. Na Vakanaani kyeeri ekyo mmbo vekaa urukeny elo.
7Nndumi Iruva kakoora na Abram efo yooryeny kammbia, “Ufyari lwafo nshevaningaa uruka elu.” Nawe katannya-u Nndumi Iruva kitara kyeerasya yeto alekoora nawe. 8Naasa kooka-u keenda ifumbuny lyikee taari ya ngaminy ya Beteli, kareiya-u yeema lyakwe; taari ya nkwaany, na Ai taari ya ngaminy, katannya-fo Nndumi Iruva kitara kyeraasya, kavaangya-u irina lya Nndumi Iruva. 9Abramu keepoo kyaaro keengera yeenda taari ya Negebu.
Abramu Urukeny lwa Misri
10Naasa kukakaafo shaa kulya urukeny lulya, Abramu kasoka na Misri, naambo nakaefo kyaangu, mashika elyi shaa yeng'ani nnu urukeny. 11Naasa kufii nafike Misri, kavia nka-wakwe Sarai, “Kwiishi, yewe mmbo kukee nka mweremutu. 12Naasa kyeeri Vamisri vashekulollyaa, mmbo vashaamba, ‘Yeu ni nka-wakwe, nawo mmbo vashiwaa, neewe vakure na muu;’ 13Shakutereva kwaambe mmbo kukee mfwama, kive kisha kyakwa kyeendwa ni yewe, neeny shikae na muu kimaruma kyafo.”
14Naasa Abramu ekifika Misri, Vamisri vakalollya sheelyi nka yeto mmbo akee mweremutu nnu. 15Vasongoru va Farao vakallolya vakamwitikisya kwa Farao, naasa nka ulya kaipowa karawa mmba kwa Farao. 16Nawe kimaruma kya Sarai katannya Abramu mesha Farao kaniinga Abramu moonri, na ng'umbe, mishungu ya kyuumi, na ya kyika, mashinga a kyuumi a kyika na ngamula.
17Kyeendi Nndumi Iruva kakapa Farao na va mmba yakwe, kyeendwa ni Sarai we nka wa Abramu. 18Naasa Farao kavaanga Abramu kammbia, “Nkyoki ekyi kwashitannya? Nkyiki elyi kulaore kuleshivia yeu ni nka-wafo?” 19“A nkyiki elyi kuleamba yeu ni mfwamau, kutani shamwipoo kava nka wakwa? Naasa ulaalu, ipoo nka wafo, kweenda.” 20Farao kavavasya vandu vamwiimyi ando amwi na nka-wakwe, na wo kindo ekyo etiri.
Currently Selected:
Mapookyony 12: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
