Luka 9

Yesu natuma abegesibwa ikumi na babili

(Mat 10:5-15; Mar 6:7-13)

1Yesu ayeta eikumi na babili, abaha amani n'obushobora bw'okubinga amasitani gona n'okukiza endwara. 2Amara abatuma kuranga obukama bwa Ruhanga n'okukiza abarwaire. 3Abagambira ati, “Mutagenda na kantu: Enkoni chei, omufuko chei, omukate chei, empiha chei, n'ekanzu mutatwara ibili. 4Kaishe nju eyo muratahamu mwikare omwo, mute nimwema omwo. 5Mbali barabanga, orwo muraija kuruga omu kigo ekyo mukunkumure echuuchu aha maguru ganyu bamanyireho okwo batabakunda.” 6Baimukya baraba omu byaro, buli hantu nibaranga evangeli nibakiza n'endwara.

Herode nashoberwa

(Mat 14:1-12; Mar 6:14-29)

7Omutwazi Herode kayahuliize byona ebyabaire nibikorwa, ashoberwa. Nobona abandi bakaba nibagamba okwo Yohana omubatiza ahimbukire, 8abandi bati Eliya n'iwe aizire, abandi bati omu barangi ab'eirai alimu ahimbukire. 9Herode wenene ati, “Yohana nkamutema ebikya; mbwenusi ogu n'ohai owo ndikuhulizaho ebi?” Aho ayenda kubona Yesu.

Yesu nalisa abantu enkumi itaanu

(Mat 14:13-21; Mar 6:30-44; Yoh 6:1-14)

10Entumwa kazabaire zagarukire, zabarulira Yesu byona ebyo zakora. Yakwata entumwa ezo yagenda nazo omu kigo kya Betisaida kweshelekayo abantu. 11Embaga kayakimanyire emuhonderayo. Abanyegeza, abafumoleraho obukama bwa Ruhanga, n'ababaire nibetaga kukizibwa abakiza. 12Aho eizoba libanza kutobera, nikwo eikumi na babili kumugambira bati, “Waitu, otaishure abantu bagende omu byaro ebili haihi bahige ak'okulya n'oburaaro; enshonga aha mbali tuli karungu.” 13Ndi Yesu abagambira ati, “Inywe mube n'inywe mubaha ak'okulya.” Bagamba bati, “Titwina kantu, shana emikate etanu n'enfuru ibili, shana katuraba tuli b'okugenda kugulira abantu aba bona ekyakulya.” 14Abantu bakaba bali nka 5,000. Yesu agambira abegesibwabe ati, “Mubagambiire bashuntame omu bichweka by'abantu 50 omu 50.” 15Bagira batyo, bagambira bona bashuntama. 16Kayakwete emikate etanu n'enfuru ibili araramira omw'iguru, abiha omugisha, abibegabegura aheleza abegesibwa kubigabira embaga. 17Bona balya mara baiguta. Ebyasigaireho babishombokya, baijuza entukuru 12 z'obubeguka.

Petero nayebuga Yesu

(Mat 16:13-19; Mar 8:27-29)

18Yesu kayabaire aina abegesibwa bali bonkai, nashoma enshara, ababaza ati, “Abantu nibagira bati ndi ohai?” 19Bahorora bati, “Ngu oli Yohana Omubatiza; kandi abandi bati Omurangi omoi omu barangi aba karai ahimbukire.” 20Kyonkai wenene ati, “Isi inywe nimugira muti ndi ohai?” Petero ahorora ati, “Iwe n'iwe Kirisito wa Ruhanga.”

Yesu nabaasha okushashakwe n'okufakwe

(Mat 16:20-28; Mar 8:30–9:1)

21Aho Yesu akomeleza abegesibwabe kutabigambira muntu n'omoi, 22ati, “Omwana w'Omuntu naija kushasha nibamutura bingi, kandi abagurusi n'abakuhani bakuru n'abeegesa b'Amateka nibaija kumwanga bamwite, kyonkai aha kiro kya kashatu ahimbuke.”

23Kandi agambira bona ati, “K'omuntu alikugonza kumpondera, ayeyange wenene, ayetweke omusarabagwe buli kiro, ampondere. 24Manyasi aligonza kurokora oburorabwe bulimufera, kandi alikiliza kuferwa oburorabwe aha rwange ogwo alibwihura. 25Kuba Omuntu nagasirwaki kulya ensi yona kyonkai kandi akaferwa oburorabwe? 26Nobona kaishe muntu alinkwatirwa enshoni anga akakwatirwa ebigambo byange enshoni, n'Omwana w'Omuntu alimukwatirwa enshoni k'alimara kugoba omu kitinwakye n'ekya Ishe n'eky'abamalaika batakatifu. 27Mbagambire amazima, haliho abemeleire aha abataliziza kufa bataboine bukama bwa Ruhanga.”

Yesu nahinduka obuso aha ibanga

(Mat 17:1-8; Mar 9:2-8)

28Ebiro kabyakeire nka munaana Yesu agambire ebigambo ebyo, atwara Petero na Yohana na Yakobo, atemba omw'ibanga kushoma enshara. 29Kayabaire nashoma enshara ahinduka aha maisho, ebijwarobye byengelera kundi. 30Leba abantu babili nibafumora nawe: Musa na Eliya. 31Bakazoka baina ekitinwa, bafumora aha kufakwe okulikwija kubaho omuli Yerusalemu. 32Aho Petero n'abo yabaire ainabo bakaba nibasomba. Kabarugire omu turo babona ekitinwakye, babona n'ababili ababaire bemeleire nawe. 33K'ababili abo babaire nibamurugaho, Petero agambira Yesu ati, “Rugaba, kirungi kitai kubona tuli aha! Twombeke obusisira bushatu, akamoi kabe kawe, akandi kabe ka Musa n'akandi kabe ka Eliya,” kyonkai aho Petero atalikumanya by'alikugamba. 34Kayabaire ali omu kugamba atyo, ekichwi kija kibabunda, batina. 35Eiraka lyema omu kichwi niligamba liti, “Ogu n'iwe Mwana wange endonkwa, mumuhulilize!” 36K'eiraka lyamazire kugamba, bashanga Yesu yasigaire wenkai. Besiza, omu bir'ebyo tibafumoleire muntu n'omoi ebyabaireho aha ibanga.

Yesu nakiza omwojo akwetwe eisitani

(Mat 17:14-18; Mar 9:14-27)

37Bukeire baraire barugire aha ibanga, Yesu abuganganwa abantu batali bake. 38Niho honkai omushaija ayema omu mbaga ataaga ati, “Mwegesa, ninkutagiliza osinge ogilire mutabani wange ekisha, ahakuba n'iwe mwana wange omumoi. 39Eisitani liikara nilimukwata, aho akunga. Limukabisa nk'owensimbu alemwa agira n'ekifuzi aha munwa. Limushaasa muno tiliziza na kumutaishura. 40Abegesibwa bawe nabatagiliza kulibinga, kyonkai tibaashobora.” 41Yesu ahorora ati, “Inywe muzarwa ogutalikwesiga, ogulikwehurubasa, ndikara nainywe mberehai? Ndibegumisiliza ngobehai? Leta omwana wawe aha!” 42K'omwana yabaire naija eisitani limukuntura ahansi limukabisa nk'owensimbu. Kyonkai Yesu alikabukira, akiza omwana, amugarulira ishe. 43Abantu bona batangalira ekitinwa kya Ruhanga.

Yesu nashuba nabasha okufakwe

(Mat 17:22-23; Mar 9:30-32)

K'abantu babaire bakyatangazibwa ebyo Yesu yakora, agambira abegesibwabe ati, 44“Murahulira kurungi ebyo naija kubagambira. Omwana w'Omuntu nibaija kumunaga omu mikono y'abantu.” 45Kyonkai ekyo yagambire tibakishobokeirwe, akakibasheleka busheleka batakishobokerwa. Mara kandi batiina kukimubaza.

Omukuru muno n'ohai?

(Mat 18:1-5; Mar 9:33-37)

46Abegesibwa babanza kuhakana kumanya omuli bonene omukuru muno n'ohai. 47Nawe Yesu kayamanyire eby'emitima yabo elikutekeleza, akwata omwana amweteka aha rubaju, 48abagambira ati, “Alitora omwana ogu aha bwange aliba atoire inye. Kandi alitora inye aliba atoire ayantumire. Araba ali mujege muno omuli inywe, ogwo n'iwe mukuru wanyu.”

Atalikukushenga ogwo wawe

(Mar 9:38-40)

49Yohana agamba ati, “Rugaba, tuboine omuntu nabinga amasitani omw'ibara lyawe twamutanga, aha rw'enshonga ti waitu.” 50Kyonkai Yesu amugambira ati, “Mutamutanga, manyasi atalikubashenga ogwo naba ali wanyu.”

Abasamaria nibanga Yesu

51K'ebiro by'okutemba omw'iguru byabaire byaija haihi, Yesu omutima yaguteka Yerusalemu. 52Atuma ab'okumwebembera, bagenda bataha omu kyaro kimoi ky'Abasamaria kumuteekatekera oburaaro. 53Kyonkai Abasamaria tibamunyegeize, kuba omutima akaba agutaire Yerusalemu. 54Orwo abegesibwabe, abalimu Yakobo na Yohana baboine okwo bamubinga, bagamba bati, “Waitu Mukama, noyenda turagire omuliro guhanantuke omw'iguru gubokye; [nk'okwo Eliya yagizire?]” 55Kyonkai Yesu ahinduka abakabukira. [Ashuba agamba ati, “Timulikwemanya kwo muli inywe, kuba Omwana w'Omuntu tiyaizire kwita bantu akaija kubarokora.”] 56Aho bakwata omuhanda bagya kyaro kindi.

Ebilikwetagwa aha balikugonza kuhondera Yesu

(Mat 8:19-22)

57Kababaire bali omu muhanda nibagenda, omushaija omoi agambira Yesu ati, “Mbali orakagya hona ndakuhondera.” 58Ndi Yesu amugambira ati, “Emiha eina emiina, n'ebinyonyi bigira ebishunkuli. Kyonkai Omwana w'Omuntu tagira bubyamiko bwa mutwe.” 59Yesu agambira omuntu ondijo ati, “Ompondere.” Ndi ogu ati, “Kambanze ngye nziike tata.” 60Kyonkai Yesu amugambira ati, “Oleke abafu beziikire abafu babo. Iwe ogende orange obukama bwa Ruhanga.” 61Omuntu ondijo ati, “Waitu Mukama, inye ndakuhondera; kyonkai mbanze ngende ngye ndazege abange omwaitu.” 62Yesu amugambira ati, “Omuntu aba yakwete enfuka kulima akashuba akakebuka enyuma ogwo tasanire bukama bwa Ruhanga.”

Currently Selected:

Luka 9: RHAY01

Highlight

Copy