Luka 10

Yesu natuma enshanju na babili

1Ebyo kabyahingwire, Omukama aronda abandi 72 abatuma babili babili kugenda bamwebembeire, abatuma buli kigo na buli hantu mbali yabaire naija kugoba. 2Abagambira ati, “Eby'okugesha bingi, kyonkai abakozi bake. Kityo mushabe mukama w'eigesha atweke abakozi omu igeshalye. 3Mukwate omuhanda mugende, mara nimbatuma okw'obona obwana bw'entaama omu mishega. 4Mutatwara mufuko gwa mpiha, anga mufuko, n'ebiratwa chei. Mutashura muntu mu muhanda. 5Enju yona yona eyo muratahamu mubanze mubagambire muti, ‘Emilembe eraare omu nju egi!’ 6Ka haraka alimu omuntu w'emilembe, emilembe eyo mwamwendera aragigira. Kitali kityo emilembe yanyu erabagarukira. 7Mwikare nju emoi yonkai, ebyo barabaha kulya n'okunywa nibyo, kuba omukozi asaine emperwaye; mutamaraho maju, kuruga omu nimugya muli. 8Orwo murakataha omu kigo bakabanyegeza, ebyo barabaha mube nibyo mulya. 9Abarwaire abali omu kigo ekyo mubakize, mubagambire muti, ‘Obukama bwa Ruhanga bwagoba.’ 10Kyonkai orwo murakataha omu kigo bakababinga, mugye omu mbarabara z'ekigo ekyo mugambe muti, 11‘Nangu n'echuuchu y'ekigo kyanyu etuli aha maguru twagibakunkumulira; kyonkai kandi mumanye okwo obukama bwa Ruhanga bwagoba.’ 12Nimbagambira: Kiro kiliinya Sodoma eliganyirwamu kake kushaaga ekigo ekyo.

Ebigo ebitalikwesiga

(Mat 11:20-24)

13“Olibona iwe Korazini! Zakulya iwe Betisaida! Ebitangazo ebyakoleirwe omuli inywe kabyakuba byakoleirwe omuli Tiro na Sidoni, ebigo ebyo byakuba birayechulize eirai; abamwo bakuba barashuntamire ahansi barajwete engunia n'okwesiga eijwi. 14Aha kiro ky'eiramu aba Tiro na Sidoni baliganyirwamu kake kushaaga inywe. 15Isi iwe Kaperinaumu, iwe oti eikuru lyawe niliija kukukangya aha iguru? Noija kunagwa omu muliro! 16Alibahulira aliba ahuliire inye, n'alibanga aliba ayangire inye.”

Enshanju na babili nibatabaruka

17Enshanju na babili batabaruka nibashemelerwa, nibagamba bati, “Mukama, n'amasitani gatuhuliire omw'ibara lyawe!” 18Abagambira ati, “Mboine Sitani nakununtuka omw'iguru nk'orurabyo. 19Mbahaire obushobora kukandagilira enjoka n'obumiina, n'amani gona ga Sitani mugatere aha mutwe. 20Nawe eki mutakishemelerwa kubona amasitani nigabahulira; shana mushemelerwe kubona amabara ganyu gahandikirwe omw'iguru.”

Yesu nashemelerwa

(Mat 11:25-27; 13:16-17)

21Omu saa egyo yonene yonene Yesu aijwire Mwoyo Mutakatifu, agamba ati, “Waitu Tata, Omukama w'eiguru n'ensi ninkusiima, kubona ebigambo ebi obishelekire abamanyi abaina amagezi okabishurulira enkelemeke. Nikwo Tata, aha rw'okuba nikwo osingire okasiima. 22Tata ankwasize buli kantu. Kandi taliho alikumanya Mwana ab'ohai, shana Tata. N'ow'okumanya Tata ab'ohai shana Omwana n'owo Mwana aronka kumushurulira ekigambo eki.”

23Aho ahindukira abegesibwabe abagambira bonkai ati, “Gaberwa amaisho galikubona ebyo mulikubona! 24Nimbagambira, abarangi bangi n'abakama bagonzaga kubona ebyo mulikubona, n'okuhulira ebyo mulikuhulira, kyonkai tibabihuliire.”

Enfumo y'Omusamaria murungi

25Omwegesa w'Amateka aija kulenga Yesu ati, “Mwegesa, nkoreki mbone kubonera kimoi oburora obutalihwaho?” 26Yesu amubaza ati, “Omu Mateka kihandikire kitai? Oshoma otai?” 27Omwegesa w'Amateka ahorora ati, “Ogonzega Omukama Ruhanga wawe n'omutima gwawe gwona, n'omwoyo gwawe gwona, n'amani gawe gona, n'amagezi gawe gona; oshube ogonze mutahi wawe nk'okwo olikwegonza.” 28Yesu agambira omwegesa w'Amateka ogwo ati, “Wahorora kurungi; kor'otyo olibona oburora.”

29Kyonkai omwegesa w'Amateka kugonza kweyoleka okwo ali murungi, abaza Yesu ati, “Mutahi wange n'ohai?” 30Yesu ahorora ati, “Omuntu omoi akaba nasongoka arugire Yerusalemu nagya Yeriko, agwa omu bashuga, bamujura asigara bushai, bamutera, bakwata omuhanda bagenda, bamusiga araliire kufa. 31Omukuhani ashangwa nasongoka muhanda ogwo. Kayamuboine ahinguraho agya rubaju rundi. 32Kutyo n'Omulevita, ogwo kayamugobireho akamubona, ahingura agya rubaju rundi. 33Kyonkai Omusamaria kayabaire ali omu rugendo, aija agwamu omuntu ogwo. Kayamuboine, amuganyibwa. 34Amugoba amushemba amahuta, agasheshamu edivai n'amajuta, amukuubisa aha farasiye, amutwara omw'ikumbi ly'abagenyi, amujanjaba. 35Bukeire akwata edinari ibili aziha omulebelezi w'eikumbi ly'abagenyi nagamba ati, ‘Omunjanjabire. Eby'oramwongera kandagaruka ndabikushashura.’ 36Mbwenu omu bashatu aba, ow'olikulenga akazoka okwo ali mutahi w'olinya ayagwire omu bashuga n'ohai?” 37Omwegesa w'Amateka agamba ati, “Ayamugiliire obuganyizi.” Yesu amugambira ati, “Ogende naiwe ogir'otyo.”

Yesu nakyalira Marita na Maria

38Yesu kayabaire nagenda n'abegesibwabe, ataaha omu kyaro kimoi. Omukazi Marita amunyegeza omwe. 39Marita ogwo ayeta omurumuna, eibaralye Maria, aija ashuntama omu maguru g'Omukama, amuhuliliza okwo alikwegesa. 40Kyonkai Marita akaba natagaitira omugenyi; aho okutagaita okwo kumutahura. Agoba Yesu amugambira ati, “Mukama, murumuna wange yannagira emilimo, iwe tiwabifaho? Omugambire aije ankwase.” 41Kyonkai Omukama amuhorora ati, “Marita, Marita, noshasibwa ebintu bingi, nibikwita kubi. 42Kyonkai eky'omugasho kili kimoi kyonkai. Maria yaihyaho omugabo gurungi ogutalimurugaho.”

Currently Selected:

Luka 10: RHAY01

Highlight

Copy