Luka 8

Abakazi abahonderaga Yesu

1Ebiro kabyahingwireho bike, Yesu yaraba omu bigo n'omu byaro naranga, natona abantu evangeli y'obukama bwa Ruhanga. Eikumi na babili bakaba bali hamoi nawe, 2n'abakazi abandi ababaire babingirwemu amasitani, bakiziibwe n'endwara. Nibo Maria owo beta Magadalena, abayabire arugirwemu amasitani mushanju, 3na Yoana muka Chuza, omusigire wa Herode, na Shuzana, n'abandi bangi abagiraga ebyabo kubijunisa Yesu n'abegesibwabe.

Enfumo y'omubibi

(Mat 13:1-9; Mar 4:1-9)

4K'embaga yahurwire nyingi, n'abantu bakamugobaho kuruga buli kigo, abachwera enfumo ati, 5“Omubibi akaturuka kugya kubiba. Kayabaire nabiba embibo ezindi zaragara omu muhanda, bazilibatilira n'ebinyonyi byazilya. 6Ezindi zaragara aha rwazi; kazabaire zakura, zayoma aha rw'enshonga zikaburwa amaizi. 7Ezindi zaragara omu mahwa; amahwa gakulirana gatuhikanisa embibo ezo. 8Ezindi zaragara aha itaka lirungi, zaraba 100 omu 100.” Kayamazire kuchwa enfumo egyo yagamba n'eiraka lihango ati, “Aina amatwi g'okuhulira, ahulire.”

Omugendelero gw'enfumo

(Mat 13:10-17; Mar 4:10-12)

9K'abegesibwabe bamubalize enshonga y'enfumo egi, 10yabagambira ati, “Inywe muhairwe okushobokerwa enama z'obukama bwa Ruhanga. Kyonkai abandi nibagambirwa enama ezo omu nfumo, babone bataboine, bahuliire batashobokeirwe.

Yesu nashoborora enfumo y'omubibi

(Mat 13:18-23; Mar 4:13-20)

11“Mbwenu enshonga y'enfumo niy'egi: Embibo kigambo kya Ruhanga. 12Embibo ez'omu muhanda nibo bantu abahulira ekigambo ekyo, kyonkai Sitani naija naihya ekigambo ekyo omu mitima yabo, bataija bakaikiliza bakarokoka. 13Embibo ez'aha rwazi, nibo balinya abalikuhulira ekigambo bakakitora n'amashemelerwa, kyonkai tibaina mizi: nibaikiliza akanya kake, kabalikulengesibwa bagwa. 14Ezaragaire omu mahwa nibo balinya abalikuhulira ekigambo, kyonkai kabalikuba bali omu gabo, eitunga n'amashemelerwa g'ensi bibokayokya, kityo ebiraba byabo tibyera. 15Ezaragaire aha itaka lirungi nibo bahulira ekigambo bakagira omutima gurungi n'obwesigwa bakakigumaho, bakagira obwegumisiliza bakaraba ebiraba.

Etara omu kitukuru

(Mar 4:21-25)

16“Taliho muntu ahemba tara akagijumikiza kitukuru, anga akagiteka mu kitanda. Agiteka ahatungamire, abalikutaaha omu nju bashobore kubona. 17Taliho kintu kishelekire ekitalishururwa, anga kubaho nama yona yona etalimanyika ekaija aha mushana. 18Ahonu muramanya muhulire kurungi; aha rw'okuba ain'ake n'iwe alyongerwaho, kandi atainake, n'ako alikulenga ati ainako balikamwaka.”

Nyina Yesu n'abarumuna

(Mat 12:46-50; Mar 3:31-35)

19Nyina Yesu n'abarumuna bamuhondera, kyonkai tibashoboire kumugoba aha rw'obungi bw'abantu. 20Abantu bagambira Yesu bati, “Nyoko na barumuna bawe bemeleire aheru, nibenda kukubona.” 21Kyonkai wenene abagambira ati, “Mawe na barumuna bange nibo balinya abalikuhulira ekigambo kya Ruhanga bakagobesheleza ebyo kilikubaragira.”

Yesu nachuleeza enyanja

(Mat 8:23-27; Mar 4:35-41)

22Ekiro kimoi Yesu ataaha omu bwato n'abegesibwabe. Abagambira ati, “Mushabuke enyanja tugye buseli.” Bagenda; 23kababaire nibagenda, wenene anagira. Hamukwa omuyaga omu nyanja, obwato bubanza kwijura amaizi, abegesibwa bagya omu kabi. 24Bagya bamwimukya, bamugambira bati, “Rugaba! Rugaba! Twafa!” Aimuka akabukira omuyaga n'amayengo galikuhinda; omuyaga n'amayengo bibutama, enyanja echulera. 25Ababaza ati, “Okwesiga kwanyu kulihai?” Batina, batangara, bagambirangana bati, “Naho ogu n'ohai alikuragira omuyaga n'enyanja bikamuhulira?”

Yesu nakiza akwetwe amasitani

(Mat 8:28-34; Mar 5:1-20)

26Yesu n'abegesibwabe bagya omu nsi y'Abagerasi, eyolekeraine na Galilaya. 27Aruga omu bwato agya aha mwaro, atanganwa omushaija naruga omu kigo akwetwe amasitani. Akaba yamazire ebiro bingi atajwara myendo, kandi tiyaikaraga mu nju shana yaturaga omu mpako. 28Orwo yaboine Yesu ataaga n'eiraka lihango, amugwa omu maisho, agamba muno ati, “Nonyenzaki iwe Yesu Omwana wa Ruhanga Rukirabyona? Ninkutagiliza otanshasa.” 29Yesu akaba aragiire eisitani kuruga omu mushaija ogwo. (Lyaikaraga nilimukwata; kityo baikaraga bamulinzire, bamukomire eminyororo n'empingo, kyonkai ebyo bamukomesaga yabiguturaga, eisitani limupapaaliza omw'irungu.) 30Aho Yesu alibaza ati, “Iwe eibara lyawe oli ohai?” Limuhorora liti, “Ihe;” kuba omushaija ogwo akaba atahirwemu amasitani gangi. 31Gamutagiliza kutaagaragira kugya mu muliro. 32Aho obuhyo buhango bw'empunu bukaba nibulya omu busoka bw'orushozi; amasitani gamushaba kutaaha omu mpunu ezo. Kityo agataishura. 33Omushaija arugwamu amasitani, gataaha omu mpunu, obuhyo buhilingita aha bulengo bugwa omu nyanja, amaizi gabulya.

34Abashumba kabaaboine ekyabaho, bairuka, bakibarura omu kigo n'omu byaro. 35Nirwo abantu baturukire kuleba ekyabaho ekyo, bagoba n'ahali Yesu, bashanga n'omushaija ayarugwamu amasitani amushuntamire omu maguru, ajwete mara atebekaine. Aho batiina. 36Ababaire babiboine bababarulira okwo omushaija ayabaire akwetwe amasitani yakiziibwe. 37Abantu bona ab'ensi eyabaire eyataine ey'Abagerasi bamugambira kubarugira omu nsi yabo, aha rw'okuba bakakwatwa obutini bungi. Yesu asabara omu bwato, agaruka. 38Omushaija ayarugirwemu amasitani amushaba kwikara nawe, kyonkai Yesu amurazage, ati, 39“Oshube omuka, obarure ebyo Ruhanga yakukolera.” Omushaija akwata omuhanda agenda, amaraho ekigo kyona nabarura ebyo Yesu yamukolera.

Muhara wa Yairo n'omukazi w'ekiganga

(Mat 9:18-26; Mar 5:21-43)

40Orwo Yesu yagarukire, embaga emunyegeza, nobona bona bakaba bamulindiliire. 41Aijwa omushaija eibaralye Yairo, akaba ali mukuru w'esinagogi. Agwa Yesu omu maguru, amutagiliza kwija omwe 42enshonga omuhara omumoi owo yabaire ainawe, w'emyaka 12 akaba ali kubi agafa.

Kayabaire nagenda, abantu bamufunza oku n'oku. 43Omukazi ayabaire arwaire ekiganga emyaka 12, n'ebye byona yabimaliire omu batambi, kyonkai ow'okumutambira akabura, 44amuruga enyuma akwataho omukugiro gw'ekijwarokye; aho n'aho ekiganga kilekera. 45Yesu abaza ati, “N'ohai ayankwataho?” Orwo bona bayetongire, Petero amugambira ati, “Rugaba, embaga ekuzingoire, nobona okwo ekuhagasire!” 46Ndi Yesu ati, “Haliho ayankwataho, aha rw'okuba nahulira okwo aliho amani agandugaho.” 47Omukazi kayaboine okwo ekyo yakora kyamanyika, aija nachundwa, amugwa omu maisho agamba ekyo yamukwatiraho, n'okwo yakira aho n'aho. 48Yesu amugambira ati, “Mwana wange, okwesiga kwawe kwakukiza, ogende n'emilembe.”

49Kayabaire akyagamba ago, omuntu omoi aruga omw'omukuru w'esinagogi agambira omukuru ogwo ati, “Muhara wawe yafire. Leka kwita kubi omwegesa.” 50Kyonkai Yesu kayabihuliire amuhorora ati, “Otatiina; iwe ekikuru oyesige, omwana arakira.” 51Kayagobire omwa Yairo, tiyajubwire muntu kutaaha mu nju hamoi nawe, shana Petero na Yohana na Yakobo, na ishemwana na nyinamwana. 52Bona bakaba nibamuchulira, nibalira. Yesu ati, “Muleke kulira; omwana anagiire, tafire.” 53Bamushekelera, kuba nibamanya okwo afire. 54Kyonkai Yesu akwata omwana omukono nagamba ati, “Mwana wange, imuka.” 55Omwoyo gushubamu, aimuka aho honkai. Aragira kabamuha ak'okulya. 56Abazaire ba wenene kibabera kitangaro; kyonkai ebyabaho Yesu abatanga kugira owo babibarulira.

Currently Selected:

Luka 8: RHAY01

Highlight

Copy