Luka 11

Yesu nayegesa aha nshara

(Mat 6:9-13; 7:7-11)

1Yesu aina mbali yashangirwe ali nashoma enshara. Orwo yamazire, omoiho omu begesibwabe amugambira ati, “Mukama, otwegese kushoma enshara, nk'okwo Yohana yayegesize abegesibwabe.” 2Abagambira ati, “Orwo murataga kushoma enshara, mugambe muti,

‘Isheichwe, eibara lyawe lihabwe ekitinwa,

obukama bwawe bwije.

3Buli kiro batuhe ekyakulya kyaitu kya bukakeire;

4batugarulire amafu gaitu,

ahakuba ichwe tugarulira buli omoi atufakalira,

mara batatutwara mu bilengeso.’ ”

5Ashuba ababaza ati, “N'ohai omuli inywe aina munywanyiwe akamwirukira omu kiro eitumbi akamugambira ati, ‘Munywanyi wange ompore emikate eshatu. 6Munywanyi wange omoi yaruga omu rugendo, kandi inye tinyina kakumuha kulya.’ 7Yakwema omu nju amuhorora ati, ‘Otanyita kubi, nakingire, nyina n'abaana aha kitanda; tinakwimuka kukuha mukate?’ 8Nimbagambira, n'orwo araba ataimukire kumuha mukate aha rw'enshonga ni munywanyiwe, buzima araimuka amuhe ekyo alikwetaga aha rw'okumwita kubi. 9Mbagambire, mushabe mulihabwa; muhige mulibona; mukomakome mulikingulirwa. 10Ayakashaba wena ahabwa; ayakahiga abona; ayakakomakoma akingulirwa. 11Okwo muli n'ohai ishemuntu ow'omutabani yakumushaba ekyakulya akamuha eibare, anga kumushaba enfuru akamuha enjoka, 12handiki akamushaba eihuli akamuha akamiina? 13Inywe ababi, kamuraba nimumanya kuha abaana banyu ebirungi, lero Isheinywe asingiire omw'iguru, abamushaba Mwoyo Mutakatifu k'alimubaha talishaagaho?”

Yesu na Belizebuli

(Mat 12:22-30; Mar 3:20-27)

14Yesu aija ashangwa nabinga eisitani elitita. K'eisitani lyabaire lyagenzire, omutita agamba, abantu batangara. 15Kyonkai abandi bagamba bati, “Amasitani nagabingisa amani ga Belizebuli, mukama wago.” 16Abandi bamulenga, benda k'abakolera ekitangazo eky'okuruga omw'iguru. 17Kyonkai wenene ashangwa namanya ebitekelezo byabo, abagambira ati, “Buli ngoma ebeganukire yonkai egyo neba esilikire. N'eka ebeganukire teguma. 18Nangu na sitani wenkai k'abeganukiire, engomaye yakuguma etai? Nimugamba ngu mulikugamba okwo amasitani ndikugabingisa amani ga Belizebuli! 19Isi k'amasitani ndikugabingisa amani ga Belizebuli, aho abegesibwa banyu nibagabingisa maniki? Aha rw'ekyo nibo balibaramura. 20Kyonkai k'amasitani ndaba ningabingisa obushobora bwa Ruhanga, ahonu obukama bwa Ruhanga bwabagobire. 21Omuntu omunyamani k'akwata ebikwato by'endashana akaguma, akalinda omwa wenene, aho ebya wenene nibiba bilige. 22Kyonkai ow'amani kumushaga k'alikumutabalira akamusinga, amwaka ebikwatobye by'endashana ebyo yaba nayesiga, ashuba amunyaga ebye abigaba. 23Atali wange, ogwo mushengi ahali inye. Kandi atashombokya nanye ogwo anaganaga.

Eisitani tiligendera kimoi

(Mat 12:43-45)

24“Eisitani kalimara kuruga omu muntu liraba ahomire, nilihiiga mbali liraikarage. K'aliburwa obwikaro ligira liti, ‘Ndagaruka omwange mbali naba ndugire.’ 25Orwo liija lishanga enju egyo eyeleleire, eshemezibwe. 26Nirwo ligenda likaleta amasitani agandi mushanju agabi kulishaga, gataaha omu nju egyo, gatura omwo. Aho okwo omuntu aija akaba aha nyuma ashumbuka kushagaho orwa mbere.”

Ebyera nyakabara

27Yesu kayabaire ali omu kugamba atyo, omukazi ayema omu mbaga agamba ati, “Liberwa eibunda lyakutwete enda, n'amabere ago wayonkire gaberwa!” 28Wenene ahorora ati, “Manti ababerwa ni balinya abahulira ekigambo kya Ruhanga bakakihikya!”

Abantu nibenda ekitangazo

(Mat 12:38-42)

29Orwo abantu babandize kweyongera obungi, Yesu agamba ati, “Omuzarwa ogu gw'abantu babi. Nigugonza ekitangazo, kyonkai tigulikwija kukolerwa kitangazo kyona kyona, shana ekitangazo kya Yona. 30Nk'okwo Yona yabaire kitangazo aha bantu ba Ninive, nikwo n'Omwana w'Omuntu alikwija kuba aha muzarwa ogu. 31Omukamakazi wa kasi alihimbukirana n'abantu b'omuzarwa ogu aha kiro ky'eiramu abaramure; aha rw'okuba akaruga harai muno kuhulira obumanyi bwa Solomoni, kandi leba alikukira Solomoni asingiire hanu aha. 32Abantu ba Ninive balihimbukirana n'abantu b'omuzarwa ogu aha kiro ky'eiramu babaramure, aha rw'enshonga ka Yona yarangire bakechuza; mbwenu leba alikukira Yona asingiire hanu aha.”

Eliisho ly'omubili

(Mat 5:15; 6:22-23)

33“Taliho muntu ahemba tara akagiteka mu kiina anga akagijumikiza kitukuru. Agiteka ahatungamire, abaraija kutaaha omu nju bashobore kubona. 34Eliisho lyawe niyo tara y'omubili gwawe. K'eliisho lyawe lilige, omubili gwawe nigubona gwona. Kyonkai k'eliisho lyawe litalige, omubili gwawe gwona niguba guli omu mwilima. 35Aha rw'ekyo oramanya otaija okagya omu mwilima. 36Ahonu k'omubili gwawe gwona guraba nigubonage, gutainaho ka mwilima, aho gurashamura gwona, nk'okwo etara ekwakiza amaranzi gayo.”

Yesu narwanisa Abafarisayo n'abeegesa b'Amateka

(Mat 23:1-36; Mar 12:38-40)

37Orwo Yesu yabaire akyagamba, Omufarisayo amuraliza kugya kuraagira omwe. Ataaha omu nju ashuntama kulya. 38Omufarisayo kimutangaza kubona kayaija kuragira atabanza kunaba ngaro. 39Omukama amugambira ati, “Inywe Abafarisayo, ebikompe n'esahani mubyogya aheru, kyonkai omunda mwijwire obukatili n'omutima gubi. 40Inywe bafano! Ayatonzire aheru tiwe yatonzire munda? 41Ebibali omunda bibe nibyo biba shumbusho eyo mwaha abanaku; aho buli kantu kanyu karaba kezire.

42“Kyonkai inywe Bafarisayo inywe, mulibona! Muhongera Ruhanga ekichweka kya ikumi ky'omudarasini, n'omulili, na buli mukubi; kyonkai amazima n'okugonza Ruhanga timubyetaireho. Ebi muragiirwe kubihikya, hamoi n'ebindi byona kutabisiga nyuma. 43Mulibona inywe Bafarisayo! Orwo mugonza entebe kaliza omu sinagogi n'okuramibwa omu katare. 44Mulibona inywe! Nimushusha ebituro ebitalikuboneka, n'abantu nibabitambuka batamanyire.”

45Omwegesa w'Amateka omoi amushubamu ati, “Mwegesa, okugamba otyo aho naichwe watujumirana.” 46Yesu agamba ati, “Na inywe beegesa b'Amateka mulibona! Aha rw'okuba mutweka abantu emigugu elikusikiira lindindi, kandi inywe timwakugizizaho rukumu. 47Mulibona inywe! Muliyo nimwombeka ebituro by'abarangi abo baisheinywe baisire. 48Aho nimwolekya okwo mulikusiima ebyo baisheinywe bakozire. Bakaita abarangi abo, inywe nimubombekera ebituro. 49Na Ruhanga omu bumanyibwe akagamba ati, ‘Ndibatwekera abarangi n'entumwa, abandi bagingiizibwe n'okwitwa,’ 50omuzarwa ogu gwije gubonabonibwe aha rw'abarangi bona abaraisirwe kwema ensi kutondwa, 51kubandiza aha kwitwa kwa Abeli kuturuka aha kwa Zekaria, ayagwire omugati ya altare n'ahatakatifu. Nikwo mbagambire, omuzarwa ogu gulyehorwa niguturwa abo abaisirwe. 52Mulibona inywe beegesa b'Amateka! Mukasheleka orufunguruzo rw'enju y'obumanyi; inywe timwafa gatahamu, kandi n'ababaire nibenda kutahamu mwabazibira.”

53Yesu kayabaire naruga omw'Omufarisayo, abeegesa b'Amateka n'Abafarisayo babanza kumuhakanisa n'amani, bamuligiija kumugambisa bingi, 54nibamutega kuleba nk'arataza omu migambire.

Currently Selected:

Luka 11: RHAY01

Highlight

Copy