Luka 12

Yesu natanga obugobya

(Mat 10:26-27)

1Omu biro ebyo abantu bahurura enkumi n'enkumi, kaba kalibatano. Nikwo Yesu kugambira abegesibwabe mbere ati, “Muramanya eitumbyo ly'Abafarisayo, nibwo bugobya. 2Taliho kibunzirwe ekitalishururwa, anga ekishelekire ekitalimanyika. 3Kityo kyona kyona ekyo muraba mugambire omu mwilima kiligambirwa aha mushana, n'ebyo muraba mugambire omu biyumba omu bihwi biligambirwa aha nshwi z'enju.

Ow'okutina

(Mat 10:28-31)

4“Mbagambire, banywanyi bange, mutalitina abaita omubili ahanyuma bataina kishagireho ekyo bakukora. 5Kyonkai kambatatire owo murataga kutina: Mutinega ayakumara kubaita, akashangwa aina obushobora bw'okubanaga omu muliro ogutalihwaho. Mazima nimbagambira, ogwo mumutine! 6Entaratamba itaanu tizigura byapa bibili? Kyonkai taliho ntaratamba n'emoi eyo Ruhanga ayebwa. 7Nangu n'eishoke ly'emitwe yanyu lyona libazirwe. Mutatina; inywe mwina eiguzi kushaaga entaratamba ezili zingi.

Okwebuga Yesu n'okumwetonga

(Mat 10:32-33; 12:32; 10:19-20)

8“Mara nimbagambira, buli omoi alinyebuga omu maisho g'abantu, Omwana w'Omuntu alimwebuga omu maisho g'abamalaika ba Ruhanga. 9Kyonkai omuntu alinyetonga omu maisho g'abantu, ogwo nawe ndimwetonga omu maisho g'abamalaika ba Ruhanga. 10Buli omoi alirogota aha Mwana w'Omuntu aligarulirwa; kyonkai alirogota ahali Mwoyo Mutakatifu taligarulirwa. 11Kandi kabalibatwara omu sinagogi n'aha bakama n'abatwazi, mutalifa kubi kuhiiga kwomulihorora anga ebyo muligamba. 12Omu saa egyo yonene Mwoyo Mutakatifu alibegesa ebyo muliba muragiirwe kugamba.”

Enfumo y'omutungi omufera

13Omuntu omoi ayema omu mbaga amugambira ati, “Mwegesa, ogambire murumuna wange tubegane obusika bwaitu.” 14Ndi Yesu amushubamu ati, “Iwe mushaija, ayantaho kubaramura anga kubabeganira obusika n'ohai?” 15Nikwo kushuba akabagambira ati, “Muramanya, mwelinde omururu gwona gwona. Oburora bw'omuntu tibukomire aha bungi bw'ebintu ebyo ainabyo.” 16Abachwera enfumo nabagambira ati, “Ensi y'omutungi ekaija yayeza emyaka nyingi muno. 17Aho atekeleza ati, ‘Ngire ntai? Tinyina bubiiko bwa myaka yange.’ 18Agamba ati, ‘Ndakora nti: Ndakambura esitoa zange nyombeke ezihango, mbe nimwo mbiika emyaka yange yona hamoi n'ebyange. 19Nshube ngambire omwoyo gwange nti, mwoyo gwange, emyaka nyingi ntura ninkubiikira ebintu bitali bike. Mbwenu ikarage, olye, onywe, oshemelerwe.’ 20Kyonkai Ruhanga amugambira ati, ‘Iwe mufera! Omw'itumbi omu ninkwenza omwoyo gwawe. Ebintu eby'otura nohiiga biliba by'ohai?’ 21Nikwo ali atyo omuntu atura natuuma eitunga, kyonkai ahali Ruhanga atali mutungi.”

Okwesiga Ruhanga

(Mat 6:25-34)

22Yesu agambira abegesibwabe ati, “Aha rw'ekyo nimbagambira, muleke kufafalikanira oburora bwanyu, kumanya muralyaki, murajwaraki; anga kuhyahyanira emibili yanyu. 23Oburora bwina enshonga kushaaga ekyakulya, n'omubili gwina enshonga kushaaga ebijwaro. 24Mulebe ebikona: Tibibiba anga kugesha, tibigira na sitoa anga buhanika, kyonkai Ruhanga abiliisa. Inywe mwina eiguzi lingi litai kushaaga ebinyonyi! 25Isi kamulikugira akahangahango, n'ohai omuli inywe ayakweyongeraho omukono aha kyemakye? 26Ahonu kamuraba mutalikushobora bike nk'ebi, ebisigaire nibibagilizaki akahangahango? 27Mulebe amaua okwo gakura. Tigakora milimo anga kushuka myendo. Kyonkai mbagambire, nangu na Solomoni n'ekitinwakye kyona, tiyajwete kushemera kwelenga aha iua na limoi. 28Ka Ruhanga araba alengya atyo ebikamba ebimezire omu ishwa kir'eki, kandi nyenkya bikanagwa omu kyokezo, lero inywe arabalengya atai, inywe bantu ab'okwikiliza kuke! 29Muleke kwitanira ebyo muralya n'ebyo muranywa, muleke kugira akahangahango. 30Amahanga nigo gaitanira ebyo. Kandi Isheinywe namanya okwo mulikubyetaga. 31Ahonu mubanze mwitanire obukamabwe; n'ebi byona biliba byanyu.

Eitunga omw'iguru

(Mat 6:19-21)

32“Mutatiina, inywe buhyo buke, aha rw'okuba Tata nashemelerwa muno kubatunga obukama. 33Muguze ebyo mwinabyo, empiha muzijunise abanaku. Muhige enshaho z'empiha ezitakura, ez'eitunga ly'omw'iguru elitahwaho, mbali omushuma atagoba, eitunga elitaliibwa nyenje. 34Enshonga mbali eitunga lyanyu lili, niho n'emitima yanyu eraikaraga.

Abairu enyegendeleza

35“Mwikare mwekomire, n'etara zanyu ziikare nizaka. 36Mushushe abairu abalindiliire mukama wabo kuruga aha bugenyi bw'obushwere, babone kwanguha kumukingulira orwo araija akakomakoma. 37Baberwa abairu abo, abo mukama wabo arashanga batanagiire. Nimbagambira amazima, mukama wabo ogwo naija kwekoma, akabaha emyanya aha kifuko, ashube aije abaheleze. 38K'araija omw'itumbi anga kushagamu kake, akabashanga nibaleba, abairu abo baraba bali baberwa! 39Kyonkai eki murakimanya: Kanyin'enju yakumanyire esaa ey'omushuma araiziraho, yakuraire narora, tiyakunagireho nju. 40Na inywe kutyo mwikare mwetekatekire, orw'okuba Omwana w'Omuntu alizira aha saa etetegeirwe.”

Abairu abesigwa n'abatali besigwa

(Mat 24:45-51)

41Petero abaza ati, “Mukama, enfumo egi nogichwera ichwe chwenkai anga nogichwera bona?” 42Omukama ashubamu ati, “Omusigire omwesigwa mara omugezi n'ohai, owo mukamawe alikwasa ekaye, kubagabira ekyakulya: Buli muntu omugabogwe, orwo akanya k'okulya kagoba? 43Muberwa omwiru ogwo owo mukamawe alija akashanga nakora atyo. 44Mbagambire amazima, omwiru ogwo mukamawe alimukwasa ebye byona. 45Kyonkai omwiru aije atekeleze ati, ‘Mukama wange yakelererwayo,’ akabanza kutera abairu n'abazana, akalya, akanywa, akatamiira, 46mukama w'omwiru ogwo alija kiro eky'omwiru aliba atamwetegeire n'aha saa eyo aliba atamanyire, amubonabonyie amujwanganyie n'abatali besigwa. 47Kandi omwiru ayamanyire ebyo mukamawe yabaire nayenda, kyonkai ebyo alikwenda akabyanga anga akaburwa kubikora, ogwo aliterwa kubi. 48Kyonkai atamanyire byo mukamawe yabaire nayenda, mara akashuba akataza, ogwo aliterwa mpora. Buli omoi ayahairwe bingi, alitongwa bingi. Owo abantu babiikisa bingi balimutonga bingi.

Yesu obubeganukiro bw'abantu

(Mat 10:34-36)

49“Nkaija kuhemba omuliro omu nsi; nangu kagwakushangirwe gwayakire nakushemeleirwe kushaaga! 50Nyinayo okubatizibwa okwo ndikwija kubatizibwa; mara nindibaliibwa kuhika orwo ndabatizibwa ntyo! 51Inywe nimulenga muti nkaija omu nsi kuleta emilembe? Chei, mbagambire, nkaija kutaanisa abantu. 52Kwema mbwenu omu nju emoi abantu batanu barataana. Abashatu balemangane n'ababili, n'ababili balemangane n'abashatu. 53Ishemuntu alemangane n'omutabani, n'omwana alemangane na ishe. Nyinamuntu alemangane n'omuhara, n'omwanamuhara alemangane na nyina. Nyinazaramuntu alemangane n'omukamwana, n'omukazi mushwerwa alemangane na nyinazara.”

Okushobokerwa obukiro

(Mat 16:2-3)

54Yesu ashuba agambira embaga ati, “Orwo mubona ekichwi kyaimuka obugwaizoba, niho honkai mugamba muti, ‘Enjura neija kugwa:’ mara egwakwo. 55Kandi kamubona omuyaga gwaihya gwemire kasi, mugamba muti, ‘Omushana nigwija kujwa n'amani;’ mara bibakwo. 56Inywe ngobya! Nimumanya kwitoitora emibonekere y'eiguru n'ensi; isi aho kubaki nimulemwa kumanya obukiro obwo tulimu?

Okuchwa amaiko

(Mat 5:25-26)

57“Ahakubaki inywe nywenene nimulemwa kuramura ekilige? 58Orwo oraba okyaina kikutoijera nimugya aha muramuzi, oteho amani mumare ebigambo mukyali omu muhanda, ataija akakukurura akakutwalira omuramuzi, n'omuramuzi akakunaga omu miikono y'omwisherukare, n'omwisherukare akakunaga jela. 59Nkugambire, toliruga omwo kuhika orwo olishashura ekyapa ky'enzindo.”

Currently Selected:

Luka 12: RHAY01

Highlight

Copy