Luka 13

Okwechuza anga orufu

1Haliho ababaire baliho aho omu kaanya ako konene, bamubarulira amakuru g'Abagalilaya abo Pilato yakwete obwamba bwabo akabutabirana n'obw'ebitambo byabo. 2Yesu abashubamu ati, “Nimulenga muti Abagalilaya aba bakaba bali bafakare ababi kushaaga Abagalilaya abandi bona, bonene kufa batyo? 3Nimbagambira nti, chei; kandi nainywe kamutechulize, inywena mulifa mutyo. 4Anga eikumi na munaana abakumbiirwe omunara omuli Siloamu gukabaita, nimulenga muti bakaba bali bafakare ababi kushaaga abandi bona abaturaga Yerusalemu? 5Nimbagambira nti, chei. Nainywe kamutechulize mulifa mutyo.”

Enfumo y'omutini ogutalikuraba

6Yesu ashuba abachwera enfumo egi ati, “Omuntu omoi akaba abyaire omuti gw'omutini omu ndimiroye y'emizabibu. Agya aija nagulebaho ekiraba, kyonkai tiyakikwasize. 7Nikwo kugambira omukozi w'endimiro egyo y'emizabibu ati, ‘Emyaka egi eshatu nyija kuhiiga ekiraba aha mutini ogu, kyonkai timbona kantu. Oguteme, guleke kuliira bushai eitaka.’ 8Omukozi amuhorora ati, ‘Waitu oguleke, n'omwaka ogu guhingureho, mbanze ngutematemere ntekemu obushai. 9Mwaka oguraija kaguraaraba, aho hakili, tigwaraba, oguteme.’ ”

Yesu nakiza omukazi alemaire ahali Sabato

10Limoi eli Sabato, Yesu ashangwa ali omu sinagogi nayegesa. 11Omwo hakaba halimu omukazi amazire emyaka 18 arwazibwe eisitani. Akaba ainamire atalikushobora kwinuguka. 12Yesu kayamuboine amweta amugambira ati, “Iwe mukazi, nakukiza.” 13Amutaho emikono, niho honkai omukazi ainuguka ayemelera bwemi, asingiza Ruhanga. 14Kyonkai omutwazi w'esinagogi kayaboine okwo Yesu yakiza omuntu ahali Sabato, atamwa, agambira abantu ati, “Ebiro by'okukoleraho emilimo biba mukaga. Mwije omu biro ebyo mutambirwe, kyonkai ahali Sabato, chei.” 15Aho Omukama amuhorora ati, “Inywe ngobya! Inywena ahali Sabato timukomorora nte anga ndogobe zanyu kugya kuzoshera? 16Isi omukazi ogu, muhara wa Aburahamu, owo eisitani lyamara emyaka 18 libohire, atabohororwa ngu orwo kili kiro kya Sabato?” 17Kayabaire ali omu kugamba atyo, ababishabe bona bakwatwa enshoni. Abantu bona bashemelerwa ebigiro by'ekitinwa ebyo Yesu yakora.

Enfumo y'enjuma ya Haradali

(Mat 13:31-32; Mar 4:30-32)

18Aho Yesu agamba ati, “Obukama bwa Ruhanga nibushushaki? Mbushushanise naki? 19Nibushusha enjuma ya Haradali ey'omuntu yakwete akabiba omu ndimiro. Ekura, guba muti, ebinyonyi bija byombeka ebishunkuli omu mataagi gagwo.”

Enfumo y'eitumbyo

(Mat 13:33)

20Yesu ashuba agamba ati, “Obukama bwa Ruhanga mbushushanise naki? 21Nibushusha eitumbyo ely'omukazi yakwete akateka omu bipimo bishatu by'ensano, ensano yona ekatumba.”

Omulyango ogufunzire

(Mat 7:13-14,21-23)

22Yesu akwata omuhanda agenda, araba omu bigo n'omu byaro nayegesa, kyonkai aho ayolekeire Yerusalemu. 23Omuntu omoi amubaza ati, “Mukama, abalirokoka bake?” Aho Yesu abagambira ati, 24“Muteho amani gangi kuraba omu mulyango ogufunzire. Mbagambire, bangi baligonza kutahamu kyonkai tibalishobora. 25Kanyin'enju alishangwa yaimukire yakingire orwigi, mulyema aheru mukomakome aha rwigi, nimugira muti, ‘Waitu Mukama batukingulire.’ Alibahorora ati, ‘Mbali mwaruga tindikuhamanya.’ 26Nirwo muligamba muti, ‘Twalyaga naiwe, twanywaga hamoi, warabaga n'omu bigo byaitu noyegesa.’ 27Kyonkai wenene aligamba ati, ‘Ekyo ndikubagambira nikyo, tindikumanya mbali mwaruga. Mundugeho inywena abafakare.’ 28Aheru niho mulichulira mukanena n'amaino, orwo mulibona Aburahamu na Isaka na Yakobo n'abarangi bona omu bukama bwa Ruhanga, kandi inywe munagirwe aheru. 29Abantu baliruga oburugaizoba n'obugwaizoba, baruge kasi na bikara, balye omu bukama bwa Ruhanga. 30Mara aho haliho ab'enzindo abaliba ba mbere, kandi abandi aba mbere baliba b'enzindo.”

Engonzi za Yesu ahali Yerusalemu

(Mat 23:37-39)

31Omu saa egyo yonene haliho Abafarisayo abaizire bakagambira Yesu bati, “Oruge hanu ogende, ahakuba Herode nayenda kukwita.” 32Yesu abashubamu ati, “Mugende mugambire emboigora egyo muti, ‘Leba, kir'eki na nyenkya ndiyo nimbinga amasitani, ninkiza n'abarwaire, ndamara eikora lyange aha kiro kya kashatu. 33Kyonkai omuli mbwenu na nyenkya na ijo ndagiirwe kukwata omuhanda nkagenda, enshonga tikyakuba, omurangi atagwire Yerusalemu.’

34“Iwe Yerusalemu, Yerusalemu, oita abarangi, n'entumwa ezo bakutumaho oziteza amabare! Kangahai abaana bawe nimpiga kubateka hamoi nk'okwo enkoko eshoroleza obwana bwayo omu mapapa gayo, iwe noyanga! 35Leba, omwawe yaba ndara. Mbagambire, timukimbona kuhika orwo muligamba muti, ‘Ni kilimugisha ogwo ayaija omw'ibara ly'Omukama.’ ”

Currently Selected:

Luka 13: RHAY01

Highlight

Copy