Embandizo 34

Batabani ba Yakobo nibarwanira munyanyabo

1Dina muhara wa Yakobo owo yazaire ahali Lea, agya kukyalira Abakanaani. 2Orwo Shekemu eya Hamori Omuhivi omutwazi w'ensi egyo yamuboine, amukwata bwamani, abyama nawe, amuhemura. 3Omwoyogwe gurongotokera omwisiki ogwo, amugonza ata namufumoza. 4Ahanyuma agambira Hamori ishe ati, “Onshelerere omwisiki ogu mushwere.” 5Yakobo agahuliza, amanya okwo Shekemu ahagaize Dina omuhara; kyonkai abatabani bakaba bali omw'irungu nibaliisa ebitunganwa. Aha rw'ekyo atekana kuhika orwo baizire.

6Hamori ishe Shekemu aimukya agya owa Yakobo kufumora nawe. 7Batabani ba Yakobo kabagahuliize baruga omw'irungu batamirwe, banigaire muno, aha rw'okuba Shekemu akakora ekihemu omuli Isiraeli kuhamba munyanyabo; ekikorwa ekyab'ekyo tikyakorwaga. 8Kyonkai Hamori afumora nabo nagamba ati, “Mutabani wange Shekemu nagonza muhara wanyu. Mbwenu nimbashaba mumumusiigire. 9Tusiigirangane; mutusiigire bahara banyu, na inywe tubasiigire bahara baitu. 10Muture na ichwe omu nsi egi eyo mulikubona, mutundiremu, mugigaigaliremu.” 11Shekemu nawe agambira ishe mwisiki na banyanya ati, “Munsiingire waitu, kyona kyona ekyo muragamba ndakigira. 12Munyenze amakura n'ebifunika bingi bitai, ndabigira nk'okwo murangambira, ekikuru munsiigire omwisiki ogu.”

13Batabani ba Yakobo bahorora Shekemu na Hamori ishe, kyonkai bagamba ebishuba aha rw'okuba akaba ahagaize munyanyabo Dina. 14Babagambira bati, “Titushobora kukora tutyo munyanyaichwe kumusiigira mushaija atatahirirwe; aha rw'okuba ekyo kyakuba ky'enshoni ahali ichwe. 15Katuraija kubaikiliza ekikuru niky'eki: Mube nk'okwo tuli, buli mushaija bamutahiri. 16Aho turabasiigira bahara baitu, na ichwe mutusiigire bahara banyu, tuture na inywe, tube ihanga limoi. 17Kyonkai kamutaikiliize mukatahirirwa, turatwara muhara waitu tugende.”

18Ebigambo byabo bishemelera Hamori hamoi n'omutabani Shekemu. 19Omusigazi tiyakelereirwe kutahiri, enshonga akaba nagonza muno muhara wa Yakobo. Shekemu akaba nakunirwa kushaga bona omwabo. 20Hamori n'omutabani Shekemu bagenda aha kihigi ky'ekigo kyabo, bagambira abanyakigo babo bati, 21“Abashaija aba ni batahi baitu. Bature omu nsi yaitu batundiremu; nimubona okwo ensi eli mpango, erabamara. Batusigiire bahara babo na ichwe tubasiigire bahara baitu. 22Ekikuru abashaija abo kwija kwikiliza kutura na ichwe, tukaba ihanga limoi: Buli mushaija omuli ichwe atahiriirwe nk'okwo bonene batahiriirwe. 23Eitunga lyabo n'ente n'ebitunganwa byabo byona biraba byaitu. Ekikuru twikilijanyie nabo mara baratura na ichwe.” 24Abanyakigo bona ababaire baliho baikilijanyia na Hamori n'omutabani Shekemu, buli mushaija omunyakigo bamutahiri.

25Omu kiro kya kashatu engoga zikyali zibisi, batabani ba Yakobo babili, Simeoni na Levi, banyanya Dina, bakwata embanda zabo batabalira ekigo kibandagara, baita abashaija bona. 26Hamori n'omutabani Shekemu babaisa embanda, Dina bamwihya omwa Shekemu, bagenda. 27Batabani ba Yakobo abandi bagwera emitumbi baginyaga, banyaga n'ekigo aha rw'okuhagazibwa kwa munyanyabo. 28Batwara amahyo gabo g'entaama n'ag'ente, endogobe zabo na buli kimoi ekyabaire kili omu kigo n'omw'ibuga. 29Bakatwara n'eitunga lyabo lyona, abaana babo bona n'abakazi babo na byona ebyabaire bili omu maju babinyaga. 30Aho Yakobo agambira Simeoni na Levi ati, “Mwandetera orushengo kunnobesa abanyansi: Abakanaani n'Abaperizi. Inye nyina abantu bake; kabakumpurulira bakantabalira bansilikya n'omutungo gwange.” 31Ndi bonene bati, “Munyanyaichwe amuhindure malaya?”

Currently Selected:

Embandizo 34: RHAY01

Highlight

Copy