Embandizo 35

Ruhanga naha Yakobo omugisha

1Ruhanga agambira Yakobo ati, “Imuka otembe Beteli obe niyo otura. Onyombekereyo ealutare inye Ruhanga ayakubonekeire noiruka murumuna wawe Esau.”

2Aho Yakobo agambira omutungogwe na bona abo yabaire ainabo, ati, “Baruhanga abo mwinabo mubataishure, mweshemeze, muhindure n'ebijwaro byanyu. 3Tushube twimukye tutembe Beteli, ngye nyombekere Ruhanga ealutare, ayanjunire enaku zintangire, akanyemamu buli hamoi mbali nagyaga.” 4Aho baruhanga babo bona abanyamahanga abo babaire bainabo babaha Yakobo, bamuha n'eheleni ezabaire zibali aha matwi. Ebyo byona Yakobo abisheleka aha mwaloni ogwabaire gwataine Shekemu. 5Orwo Yakobo n'abatabani babaire nibagenda, abantu b'omu bigo ebyabaire bibazingoire, batina, kityo tibababingire. 6Yakobo agoba Luzu niyo Beteli, omu nsi ya Kanaani, hamoi n'abantu bona abo yabaire ainabo, 7ayombekayo ealutare, mara honene aho aheta Elibeteli, aha rw'okuba niho Ruhanga yamubonekeire orwo alikwiruka omurumuna. 8Debora omulezi wa Rebeka afa, aziikwa aha mwaloni obugyaifo bwa Beteli. Nikyo omwaloni ogwo bagweteire Alonibakuti.

9Ruhanga ashuba abonekera Yakobo naruga Padaniaramu, amuha omugisha. 10Amugambira ati, “Eibara lyawe oba Yakobo; kyonkai mbwenu tokyetwa Yakobo, orayetwaga Isiraeli.” Kwema aho eibaralye ayetwa Isiraeli. 11Ashuba amugambira ati, “Ndi Rushobora byona, ozare abaana bangi, amahanga galitabuka ahali iwe, kandi oliba ishenkuru abakama. 12Ensi eyo nahaire Aburahamu na Isaka ndigikuha, ngihe na baijukuru bawe.” 13Mbali bafumoleire batyo, Ruhanga amusigaho atemba. 14Honene aho Yakobo asimbaho enyomyo y'eibare, agisheshera ekihongo ky'okunywa, agisheshaho n'amajuta. 15Mbali Ruhanga yafumoleire nawe Yakobo akaheta Beteli.

Okufa kwa Raheli

16Ahanyuma baruga Beteli, bagenda. Kababaire bakyali akatambi batakagobire Efurati, Raheli arumwa muno. 17Omu kurumwakwe okwo omuzaza amugambira ati, “Otatiina, aha rw'okuba noija kuzara omwana w'obwojo ondijo.” 18Raheli afa. Kayabaire nasangwa, omwana eibara amuruka Benoni, kyonkai ishe akamweta Benjamini. 19Nikwo Raheli yafire atyo, bamuziika aha muhanda gugya Efurati, niyo Betelehemu. 20Yakobo asimba enyomyo aha kiturokye; eba nyomyo y'ekituro kya Raheli, ekyaliho kuhika kir'eki. 21Isiraeli agendelera n'orugendo, agya atera eihema buseli bw'omunara gwa Ederi.

Abaana ba Yakobo

(1Ma 2:1-2)

22Orwo Isiraeli yabaire natura omu nsi elinya, Rubeni agya abyama na Bilia ensholeke ya ishe; mara Isiraeli akimanya.

Batabani ba Yakobo bakaba bali ikumi na babili. 23Abalikuzarwa ahali Lea ni Rubeni omuzigaijogwe, Simeoni, Levi, Yuda, Isakari na Zabuloni. 24Abalikuzarwa ahali Raheli ni Yozefu na Benjamini. 25Abalikuzarwa ahali Bilia omuzana wa Raheli ni Dani na Nafutali. 26Abalikuzarwa ahali Zilipa omuzana wa Lea ni Gadi na Asheri. Aba nibo batabani abo yazaliire Padaniaramu.

Okufa kwa Isaka

27Ahanyuma Yakobo ashanga Isaka ishe Mamure bwatana Kiriatiaraba, niyo Heburoni, mbali Aburahamu na Isaka babaire bafurukire. 28Aho Isaka akaba aina emyaka kikumi mwo kinana. 29Atahya, afa ali mugurusi engundu. Abatabani Esau na Yakobo bamuziika.

Currently Selected:

Embandizo 35: RHAY01

Highlight

Copy