Embandizo 33
33
Yakobo nabuganganwa Esau
1Yakobo kugya kunaga amaisho abona Esau naija n'abashaija bikumi binai. Aho abeganisa abaanabe abateka ahali banyinabo abalimu Lea na Raheli n'abazana bombili. 2Abazana n'abaana babo abateka omu maisho, ahondezaho Lea n'abaanabe, Raheli na Yozefu abata aha nzindo ya bona. 3Wenene abarabaho abebembera, nabandama obuso nibukanga aha itaka emirundi mushanju kuhika orwo yagobire omurumuna.
4Kyonkai Esau airuka kumutangilira, amugwa omu kifuba amunywegera; bombili balira. 5Orwo Esau yanagire amaisho abona abakazi n'abaana, abaza ati, “Aba ab'oinabo ni bahai?” Yakobo amuhorora ati, “Bana abo Ruhanga yasingiire akatunga omwiru wawe.” 6Abazana n'abaana babo nabo baija babandama. 7Lea kwakwo n'abaanabe bagoba, nabo babandama. Ahanyuma Yozefu na Raheli nabo baija babandama. 8Esau abaza ati, “Obuhyo obu bwona obwo natanaganwa bwaki?” Yakobo ahorora ati, “Kuhiga mukama wange k'ansingira.” 9Kyonkai Esau agamba ati, “Murumuna wange, nyina ebilikummara, ebyawe oikare nabyo.” 10Yakobo agamba ati, “Chei, ninkutagiliza, onsingire otore ebigemuro ebi ebyo nakuha. Omu mazima okubonangana na iwe nikyo kimoi n'okubonangana na Ruhanga, mara leba wasinga wanyegeza kurungi. 11Ninkushaba otore ebigemuro byo nakuletera, aha rw'okuba Ruhanga akansingira, mara kandi nyina ebilikummara.” Aguma amutagiliize alemwa abitora.
12Aho Esau agamba ati, “Tugendelere n'orugendo rwaitu, inye ndakwebembera.” 13Kyonkai Yakobo amugambira ati, “Mukama wange, nomanya okwo nyina abaana bato, entaama n'ente zilikwonkya, kazakufunywa n'obwangu ekiro kimoi amahyo gona gakufa. 14Rugaba, yebembera omwiru wawe; nanye ndaija mpora mpora kuhonderana n'emigendere y'ebitunganwa ebinyebembeire, n'okwo emitambukire y'abaana eli, ndemwe nkugobe omuli Seiri rugaba.”
15Aho Esau agamba ati, “Abashaija abo nyinabo kangire abo nakusigiraho.” Ndi Yakobo ati, “Aliho bwetageki? Ekikuru rugaba wange, onsingire.” 16Kir'ekyo Esau akwata omuhanda agaruka Seiri. 17Kyonkai Yakobo agenda Sukoti, ayombekayo enju, n'ebitunganwa abyombekera ebiraro. Nikwo halinya kwetwa Sukoti.
18Yakobo akagoba kurungi omu kigo kya Shekemu omu nsi ya Kanaani. Orwo yabaire naruga Padaniaramu akasisira omu maisho gakyo. 19Agura akataka k'ebichweka kikumi by'efeza ahali batabani ba Hamori ishe Shekemu, niko yateireho eihemalye. 20Ayombekaho ealutare agyeta Eleloheisiraeli.
Currently Selected:
Embandizo 33: RHAY01
Highlight
Share
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
