Embandizo 32

Yakobo nayetekateka kwakilira Esau

1Yakobo orwo alikugendelera n'orugendorwe agya abuganganwa abamalaika ba Ruhanga. 2Orwo yababoine agamba ati, “Eli ihe lya Ruhanga.” Aha rw'ekyo omwanya ogwo agweta Mahanaimu.

3Yakobo asindika entumwa zimwebembera kugya ahali Esau omurumuna omu nsi ya Seiri niyo Edomu, 4nabaragira ati, “Esau mukama wange mumugambire muti, ‘Omwiru wawe Yakobo nagamba ati: Nkafurukira owa Labani naikarayo kuhika mwaha; 5nyina ente, endogobe, amahyo g'entaama, abairu n'abazana. Mbwenu nakutumaho mukama wange, onsingire.’ ”

6Entumwa zigaruka ahali Yakobo nizigamba ziti, “Owa murumuna wawe Esau tugobireyo, aliho naija n'abashaija bikumi binai kukuchwekera.” 7Aho Yakobo atina muno, ashoberwa. Abeganisa abantu abo yabaire ainabo, amahyo g'entaama n'ag'ente omu bibina bichweka; 8akaba atekeleize ati, “Ka Esau aragoba ekichweka kimoi akakisilikya, ekirasigaraho ekyo kirahunga.”

9Ashuba agamba ati, “Waitu Ruhanga wa tata Aburahamu, Ruhanga wa tata Isaka, waitu Mukama ayangambiire ati, ‘Oshube owanyu omu banyaruganda bawe ndikukolerage,’ 10tinsaniire kisha kyawe na bwesigwa bwona butyo ebyo ongilire inye omwiru wawe. Nkashabuka Yorudani n'enkoni yange yonkai, kyonkai mbwenu nyina ebichweka bibili ebi. 11Ninshaba bandokore omu mikono ya murumuna wange Esau, enshonga nimutina atakwija akatwita ichwena, baana na banyinabo. 12Kyonkai iwe ogambire oti, ‘Ndikukolerage mara nkuhe abaijukuru bangi nk'omushenye gw'enyanja ogutakubarwa aha rw'obungi bwagwo.’ ”

13Kir'ekyo arara aho, Omu byo yabaire ainabyo aihiramu Esau omurumuna eby'okumugemulira: 14Emburabuzi bikumi bibili n'empaya makumi gabili; emiagazi y'entaama bikumi bibili n'empaya makumi gabili, 15engamia zilikwonkya makumi gashatu n'enyana zazo, ente enshumba makumi ganai n'enumi ikumi, endogobe matako makumi gabili n'enumi ikumi. 16Ezo azikwasa abairube buli buhyo habwo, ashuba abagambira ati, “Munyebembere, mara omugati y'amahyo gombili, musigemu omwanya.” 17Aragira ayebembeire ati, “Ka Esau murumuna wange arakutanganwa akakubaza ati, ‘Oli w'ohai? Nogya nkahai? Isi ebitunganwa ebi eby'oyebembeize by'ohai?’ 18Aho ogambe oti, ‘By'omwiru wawe Yakobo, yabigemulira mukama wange Esau, na wenene atuli enyuma.’ ” 19Aragira atyo n'owa kabili, n'owa kashatu, na bona ababaire bahondeire amahyo ago, ati, “Orwo muratanganwa Esau mumugambire ebigambo byonene byonene ebyo. 20Mara mumugambire muti, ‘Omwiru wawe Yakobo atuli enyuma.’ ” Okugira atyo akaba natekeleza ati, “Nakumugwisiliza n'ebigemuro ebyebembeire, aho rundi mugoba angarulira.” 21Ebigemuro bimwebembera, kir'ekyo wenene arara omu rusisira.

Yakobo omuli Penieli

22Omu kiro kyonene ekyo, aimuka akwata bakazibe bombili n'abazanabe bombili n'abaanabe eikumi n'omoi, ashabuka ekyambu kya Yaboki. 23Abashabura omwiga, kwakwo na buli kimoi ekyo yabaire ainakyo, 24kyonkai wenene asigara wenkai enyuma. Aho aijwa omushaija afukana nawe kuhika obwire kukya. 25Omushaija ogwo kayaboine okwo atasinga Yakobo, amukwata omw'ihuru ly'ekibero. Orwo Yakobo alikufukana nawe, Yakobo wenene amyoka ekibero. 26Omushaija amugambira ati, “Ondeke ngende aha rw'okuba obwire bwakya.” Kyonkai Yakobo amugambira ati, “Tindikukuleka k'ogenda otampaire mugisha.” 27Ashuba amubaza ati, “Eibara lyawe oli ohai?” Ndi ogu ati, “Ndi Yakobo.” 28Aho omushaija ogwo ati, “Eibara lyawe tokyetwa Yakobo rundi; orayetwaga Isiraeli, wafukana na Ruhanga n'abantu wabasinga.” 29Yakobo amugambira ati, “Ninkushaba ongambire eibara lyawe.” Kyonkai wenene amubaza ati, “Kubaki nombaza eibara lyange?” Honene aho ashuba amuheraho omugisha. 30Nikwo Yakobo kuheta Penieli nagamba ati, “Aha rw'okuba mboine Ruhanga bubona kyonkai narora.”

31Eizoba likashabuka nahingura Penieli, nachumbagira aha rw'okuhutara ekibero. 32Aha rw'ekyo kuhika kir'eki Abaisiraeli tibalya kinywa kya itako eky'omw'ihuru ly'ekibero; enshonga omushaija akakwata Yakobo eihuru ly'ekibero aha kinywa ky'eitako.

Currently Selected:

Embandizo 32: RHAY01

Highlight

Copy