Embandizo 31

Yakobo naruga omwa Labani

1Yakobo agya ahulira okwo batabani ba Labani balikugamba bati, “Yakobo atwete ebya tataichwe byona. Eitungalye lyona alihire omu bya tataichwe.” 2Ashuba abona okwo Labani atakimuleba na ngonzi nk'orwa mbere. 3Aho Omukama agambira Yakobo ati, “Garuka owanyu omu banyaruganda bawe, nanye ndakwemera.” 4Yakobo atumaho Raheli na Lea kwija omw'ishwa mbali obuhyobwe bwabaire buli, 5abagambira ati, “Nimbona okwo isheinywe atakindeba na ngonzi nk'okwo yagiraga orwa mbere. Kyonkai Ruhanga wa tata abaire nanyemera. 6Nimumanya okwo ntura ninkolera isheinywe n'amani gange gona, 7kyonkai yaikara angobeize, yahindura emperwa yange emirundi ikumi; nawe Ruhanga tiyamujubwire kunkora kubi. 8Kayagambire ati, ‘Eza kitondo nizo ziraba mperwa yawe,’ obuhyo bwona buzara kitondo. Kandi kayagambire ati, ‘Ez'obutondatondo nizo ziraba mperwa yawe,’ obuhyo bwona buzara ez'obutondatondo. 9Nikwo Ruhanga yayakire atyo isheinywe ebitunganwa akabintunga. 10Omu makiro ag'amahyo gemeramu, ngya ndota: Kunaga amaisho mbona okwo empaya ezakuubaga obuhyo zili z'obutondatondo, kitondo na mpura. 11Aho omu kiroto omwo omumalaika wa Ruhanga anyeta ati, ‘Yakobo,’ muhorora nti, ‘Kaboneke waitu!’ 12Angambira ati, ‘Naga amaisho obone! Empaya zona ezilikukuuba obuhyo z'obutondatondo, kitondo na mpura; aha rw'okuba mboine byona ebyo Labani alikukugira. 13Inye ndi Ruhanga wa Beteli mbali wasiigire enyomyo amajuta n'okundaganisa. Mbwenu imuka oruge omu nsi egi, oshube owanyu.’ ” 14Aho Raheli na Lea bahorora Yakobo bati, “Omwaitu titwinamu mugabo anga busika. 15Tataichwe yatuboine nk'abanyamahanga. Kuba akatuguza, mbwenu ali aha mpiya zatuguzire nalya. 16Eitunga lyona elyo Ruhanga amwakire lyaitu n'abaana baitu. Mbwenu aho kora kyona kyona ekyo Ruhanga akugambiire!”

17Aho Yakobo aimuka, akuubisa abaanabe na bakazibe aha ngamia. 18Akwata ebitunganwabye n'eitungalye lyona elyo yabaire ainalyo elyo yatungiire Padaniaramu, agaruka Kanaani owa Isaka ishe. 19Labani akaba agenzire kushara entaamaze obwoya, aho Raheli aiba baruhanga b'omwabo. 20Yakobo akaraba Labani Omuaramea omu magezi, tiyamugambiire kwo yabaire nahiga kwiruka. 21Airuka n'ebye byona, ashabuka Omwiga gwa Efurati agenda ayolekeire Amabanga ga Gileadi.

22Aha kiro kya kashatu orwo bagambire Labani okwo Yakobo airukire, 23ayema hamoi n'abanyarugandabe amubinga ebiro mushanju, amufundiza omw'ibanga lya Gileadi. 24Kyonkai omu kiro Ruhanga ahabukira Labani Omuaramea omu kiroto, amugambira ati, “Oramanya otakugambira Yakobo kigambo, kyaba kibi anga kirungi.”

25Aho Labani akwata Yakobo. Yakobo akaba ateire eihemalye omw'ibanga. Labani n'abanyarugandabe basisira omw'Ibanga lya Gileadi. 26Labani abaza Yakobo ati, “Okozireki, kundaba omu magezi mara okatwara bahara bange nk'endore z'endashana? 27Kubaki oirukire bwesheleke okandaba omu magezi otangambiire nkakutaishura n'ebyera, n'ebizina, n'engoma, n'enanga? 28Kubaki kutandinda nkanywegera baana bange nkabarazage? Aha okozire nk'omufera! 29Naba ninshobora kukukora kubi, kyonkai Ruhanga wa sho omu kiro yangambira ati, ‘Oramanya otakugambira Yakobo kigambo, kyaba kibi anga kirungi.’ 30Mbwenu wagenda aha rw'okuba okwatiirwe ab'omwanyu orushusho, kyonkai kubaki oibire baruhanga bange?” 31Yakobo amuhorora ati, “Ntinire, ntekeleize nti wakunyaka bahara bawe rwamani. 32Weena wena ow'orashanga na baruhanga bawe afe. Omu maisho g'abanyaruganda baitu, ozore ekili kyawe ekyo nyinakyo okitware.” Yakobo akaba atalikumanya kwo Raheli yabaire aibire baruhanga abo.

33Aho Labani ataha omw'ihema lya Yakobo n'omu lya Lea, n'omu ly'abazana bombili, kyonkai baruhanga abo tiyababoine. Aruga omu lya Lea ataha omu lya Raheli. 34Raheli akaba akwete baruhanga b'omwabo abataire omu matandiko g'engamia abashuntamire. Labani achukura omw'ihema lyona kyonkai tiyababoine. 35Raheli agambira ishe ati, “Mukama wange otatamwa kubona ntalikushobora kwimuka mu maisho gawe kuba ndi omu ntwaza y'abakazi.” Labani achukura kyonkai baruhanga b'ekaye tiyababoine.

36Nikwo Yakobo kukwatwa ekiniga akasinsimukira Labani. Amubaza ati, “Nshobize? Nfakaireki kumbinga onigaire otyo? 37Kawachukura omu bintu byange byona, washangamuki eky'omwawe? Okiteke aha omu maisho g'abanyaruganda bange n'abanyaruganda bawe baturamure. 38Emyaka egi makumi gabili ntwire na iwe, entaama zawe anga embuzi zawe tizikatorogaga, mara omu mahyo gawe tinkalyagamu mpaya. 39Eyatagatagurwaga ekikaaka tinagikuleteraga? Naiklizaga kuba n'inye nferwa. Buli eyakaibwaga omu kiro anga omushana wagintogaga. 40Nkaba ndi nti: Omushana nyitwa eilimbe, omu kiro nyitwa embeho, oturo tunguruka omu maisho. 41Emyaka egi yona makumi gabili ndi omwawe. Nkakukolera emyaka ikumi n'enai aha rwa bahara bawe bombili, n'emyaka mukaga aha rw'obuhyo bwawe, kandi okahindura emperwa yange emirundi ikumi. 42Ruhanga wa tata, Ruhanga wa Aburahamu, mara atinwa Isaka kayakuba atanyemera, mazima aha waba nombinga ngaro zishai. Ruhanga akabona obushasi bwange n'eikora lyange ly'amani, yakujuma omu kiro.”

43Aho Labani ahorora Yakobo ati, “Abaisiki ni bahara bange, n'abaana baana bange, amahyo mahyo gange, na byona eby'olikubona byange. Kyonkai kir'eki nakukoraki ahali bahara bange aba n'abaana babo abo bazaire? 44Mbwenu ija tukore endagano na iwe, ebe bujulizi ahali ichwe.”

45Yakobo akwata eibare alisimba nk'enyomyo. 46Agambira abanyaruganda ati, “Mushombokye amabare.” Bakwata amabare bagatuuma entuumiro bagiliiraho. 47Labani agyeta Yegarisahaduta, kyonkai Yakobo agyeta Galedi. 48Labani agamba ati, “Entuumiro egi kir'eki yaba bujulizi ahali inye na iwe.” Nikyo yagyeteire Galedi, 49n'enyomyo akagyeta Misipa aha rw'okuba akagamba ati, “Omukama abe niwe atulinda inye na iwe orwo turaba twarugangaineho. 50K'olita kubi bahara bange anga okashwera abakazi abandi kubongera ahali aba, n'orwo ndiba ntakigambiirwe muntu, oijuke okwo Ruhanga niwe mujulizi waitu inye na iwe.” 51Ashuba agambira Yakobo ati, “Leba, entumiro egi n'enyomyo ebyo nata omugati yaitu, 52byombili ebi bujulizi okwo ntalishabuka ntuumiro egi kwija wawe, na iwe okwo otalishabuka ntuumiro egi n'enyomyo egi kwija wange kunkora kubi. 53Ruhanga wa Aburahamu, Ruhanga wa Nahori: Ruhanga wa ishebo, niwe alituramura.” Aho Yakobo anahira omw'ibara lya Ruhanga atinwa Isaka ishe. 54Atamba ekitambo aha ibanga; mara araliza abanyaruganda aha kyakulya, bakilya bashuba barara aha ibanga elyo ekiro kyona. 55Bukeire Labani aimuka bwankya karai, anywegera abaijukuru n'abahara, abaha n'omugisha agaruka omuka.

Currently Selected:

Embandizo 31: RHAY01

Highlight

Copy