Embandizo 30

1Raheli kayaboine atazalira Yakobo baana, ahagika omurumuna, agambira Yakobo ati, “Ompe abaana anga nfe.” 2Yakobo amunigalira, agamba ati, “Inye naba Ruhanga kukwima oruzaro?” 3Raheli amugambira ati, “Omuzana wange Bilia ngugu; orare nawe anzalire abaana.” 4Amumuha aba mukaziwe, arara nawe. 5Bilia atwara enda azalira Yakobo omwana w'obwojo. 6Raheli agamba ati, “Ruhanga yandamulira, yahulira n'eiraka lyange yantunga omwana w'obwojo.” Eibara amuruka Dani. 7Bilia ashuba atwara enda, azalira Yakobo omwana w'obwojo owa kabili. 8Raheli agamba ati, “Nfukaine na murumuna wange n'amani mara namusinga.” Aho aruka omwana eibara Nafutali.

9Lea kayaboine yalekera kuzara, akwata omuzanawe Zilipa amuha Yakobo aba mukaziwe. 10Zilipa azalira Yakobo omwana w'obwojo. 11Lea agamba ati, “Buberwa.” Eibara amuruka Gadi. 12Zilipa azalira Yakobo omwana w'obwojo wa kabili. 13Lea agamba ati, “Byera bitai! Abakazi baranyeta Byera.” Eibara amuruka Asheri.

14Omu makiro g'okugesha engano Rubeni agenda abona entongo omw'ishwa, aziletera nyina. Aho Raheli agambira Lea ati, “Ninkushaba ompeho entongo za mutabani wawe.” 15Kyonkai Lea amuhorora ati, “Iwe kunyaka ibanye? Mbwenu otware n'entongo z'omwana wange?” Raheli amugambira ati, “Ompe entongo za mutabani wawe, kir'eki Yakobo arare owawe.” 16Orwo bwaigoro Yakobo yarugire omw'ishwa, Lea ashohora kumuchwekera, amugambira ati, “Oije owange, nakukodi entongo za mutabani wange.” Aho kir'ekyo arara nawe. 17Ruhanga ahulira Lea, atwara enda azalira Yakobo omwana w'obwojo wa katanu. 18Lea agamba ati, “Ruhanga yantunga emperwa yange aha rw'okuba mpaire ibanye omuzana wange.” Omwana amuruka eibara Isakari. 19Lea atwara enda azalira Yakobo omwana w'obwojo owa mukaga. 20Aho agamba ati, “Ruhanga yantunga egabo nungi, mbwenu ibanye arankunira, enshonga namuzalira abaana b'abojo mukaga.” Nikwo kumuruka eibara Zabuloni. 21Ahanyuma azara omwisiki amuruka eibara Dina.

22Ruhanga aijuka Raheli, amuhulira, amuha oruzaro. 23Atwara enda azara omwana w'omwojo, agamba ati, “Ruhanga yanyihyaho enshoni.” 24Amuruka eibara Yozefu nagamba ati, “Omukama anyongere omwana w'obwojo ondijo.”

Labani na Yakobo nibagobezangana

25Raheli orwo yabaire yazaire Yozefu, Yakobo agambira Labani ati, “Ontaishure ngaruke owaitu. 26Ompe abakazi bange n'abaana bange abo ntura ninkolera ngende; aha rw'okuba na iwe nomanya omulimo ogwo ntura ninkukolera.” 27Kyonkai Labani ahorora ati, “Leka nkugambire ekigambo eki: Mbalize namanya okwo Omukama antungire omugisha aha rw'enshonga yawe. 28Gamba emperwa yawe ngikuhe.” 29Yakobo amugambira ati, “Iwe wenene nomanya okwo ntura ninkukolera, n'okwo ebitunganwa byawe bibaire ahali inye. 30Okaba oina bike ntakaizire, nawe mbwenu bikanyire byaba ekinje; mara Omukama akakuha omugisha mbali nahindukiraga hona hona. Kyonkai mbwenu ndamanya maki eka yange?” 31Amubaza ati, “Nkuheki?” Yakobo amuhorora ati, “Otampa kyona kyona; shana kawakunkolera oti: Nshube ndise obuhyo bwawe, mbulinde. 32Onjubure kir'eki mburabemu bwona, nshororemu buli kataama aka ibamba na kitondo n'akalikwiragura, mara n'omu mburabuzi nshororemu ibamba na kitondo. Ezab'ezo nizo ziraba mperwa yange. 33Aho obwesigwa bwange bulinjulira ahanyuma orwo olija kuleba emperwa yange. Buli emoi eliba etali ibamba na kitondo omu mbuzi anga etalikwiragura mu ntaama, k'elishangwa nanye eliba eli nyibano.” 34Labani agamba ati, “Kurungi! Bibe nk'okwo wagamba.” 35Kyonkai kir'ekyo Labani wenene ashororamu empaya za ibamba na kitondo n'emburabuzi zona ez'obutondatondo na kitondo, na buli emoi eyabaire eina eibara lilikwera, na buli kataama akabaire nikairagura azikwasa batabanibe; 36agya harai na Yakobo orugendo rw'ebiro bishatu. Obuhyo obwasigaireho Yakobo aba nibwo amulisiza.

37Yakobo akwata obuti bubisi bw'emilubuna, n'obw'emilozi, n'obw'emyaramoni; abushushuburamu enjuru zilikwera, ahalikwera haboneka. 38Obuti obwo yashushubwire abuteka omu maisho g'amahyo omu nyato z'amaizi mbali amahyo ganyweraga, kuba kagaijaga kunywa nirwo gayemaga. 39Aho gemya gemire omu maisho g'obuti obwo, nikwo kuzara ez'obutondatondo na kitondo na ibamba. 40Yakobo ashorora obutama, kandi amahyo agalebesa ez'obutondatondo n'ezilikwiragura zona omu buhyo bwa Labani. Amahyo age agata aha rubaju mara tiyagateranisize na ga Labani. 41Buli orwo ezina amani omu buhyo zayemyaga, abyamika obuti omu nyato z'amaizi omu maizi g'obuhyo gabone kwemeza omu buti obwo. 42Kyonkai ezitaina mani omu buhyo tiyaziteragamu buti; kityo ezitaina mani ziba za Labani, eziina amani za wenene Yakobo. 43Nikwo omushaija yatungire atyo akaganagana, akagira amahyo gahango, abairu n'abazana, engamia n'endogobe.

Currently Selected:

Embandizo 30: RHAY01

Highlight

Copy