Embandizo 29

Yakobo nagoba omwa Labani

1Yakobo agendelera n'orugendorwe, agoba omu nsi y'abantu b'oburugaizoba. 2Kayagiire kunaga amaisho abona eiziba omw'ishwa, n'amahyo gashatu g'entaama zilibyamireho, nilyo zanywagaho amaizi. Aha munwa gw'eiziba elyo hakaba haliho eibare lihango. 3Orwo abashumba bamaraga kufunya amahyo gona bakagagobya aha iziba elyo, balihilingisa balihyaho. Kumara kwoshera entaama, bagarura elyo eibare aha munwa gw'eiziba.

4Yakobo abaza abashumba abo ati, “Barumuna bange, owanyu ni nkahai?” Bahorora bati, “Ichwe tuli ba Harani.” 5Ababaza ati, “Labani mutabani wa Nahori nimumumanya?” Bamugarukamu bati, “Nitumumanya.” 6Ababaza ati, “Agumire?” Bamushubamu bati, “Agumire, mara leba na Raheli omuhara naija n'entaama.” 7Abagambira ati, “Orwo likyali ihangwe, n'eizoba ly'okutahya ebitunganwa litakagobire, mwoshere entaama mushube mugende muzilise.” 8Kyonkai bonene bati, “Titwakushobora kuzoshera mwaha kuhika orwo amahyo gona garafunyirwa hamoi, tukahilingisa eibare kulihya aha munwa gw'eiziba; aho nirwo turazoshera.”

9Orwo yabaire akyafumora nabo, Raheli aija n'entaama za ishe kuba niwe yazilisaga. 10Aho Yakobo kayaboine Raheli muhara wa Labani nyinarumi, n'entaama za nyinarumi ezo, agenda ahilingisa eibare alihya aha munwa gw'eiziba, ayoshera obuhyo bwa Labani nyinarumi. 11Ashuba anywegera Raheli, mara atungika eiraka alira. 12Agambira Raheli okwo ali munyabuzare wa ishe, n'okwo ali mutabani wa Rebeka. Aho Raheli airuka agambira ishe.

13Labani orwo yahuliire amakuru ga Yakobo omwihwa, airuka agiire kumuchwekera, amugwa omu kifuba, amunywegera, amutahya omwe. Yakobo abarulira Labani ebyo byona. 14Labani amugambira ati, “Mazimakwo iwe oli w'orubunda rwange, oli mubili gwange.” Aikara nawe omwezi.

Okushwera kwa Yakobo

15Ahanyuma Labani abaza Yakobo ati, “Iwe oli munyabuzare wange, aha rw'ekyo onkolere bushai?” Ongambire emperwa nkushashure ntai? 16Labani akaba aina abahara babili, eibara ly'omukuru ni Lea n'ely'omuto ni Raheli. 17Lea akaba nahobeera aha maisho, kyonkai Raheli akaba ali murungi naligirwa. 18Yakobo akaba nagonza Raheli; nikwo kuhorora Labani ati, “Ndakukolera emyaka mushanju aha rwa muhara wawe omuto Raheli.” 19Labani ati, “Hakili kumuha iwe kushaga kumuha omushaija ondijo. Iroko twikare hamoi.” 20Yakobo akolera Raheli emyaka mushanju; mara aha rw'engonzi ezo yabaire amugondize, ekamubera oti biro bike.

21Ahanyuma Yakobo agambira Labani ati, “Ompe omukazi wange ndare nawe aha rw'okuba emyaka yange mushanju yahwa.” 22Aho Labani araliza abantu bona akora obugenyi. 23Kyonkai kabwabaire bwaigoro akwata omuhara Lea aba niwe amuletera. Yakobo arara nawe. 24Labani aha omuhara Lea omuzana Zilipa. 25Kabwakeire bwankya, leba ni Lea. Yakobo abaza Labani ati, “Kiki eki eky'onkoleire? Isi tinakukoleire aha rwa Raheli? Kubaki ongobeize?” 26Labani amuhorora ati, “Omu nsi yaitu nikizira kubanza kusiiga omuto otakasigiire mukuru. 27Ogobye ebiro mushanju eby'ogu, twije tukuhe ondijo, kyonkai si orankolera emyaka endijo mushanju.”

28Yakobo akora atyo, agobya ebiro mushanju ebya Lea; nikwo Labani kumusiigira Raheli. 29Raheli nawe amuha omuzana Bilia. 30Yakobo arara na Raheli, mara amugonza kushaga Lea; ashuba akolera Labani emyaka endijo mushanju.

Abaana ba Yakobo

31Omukama kayaboine okwo Lea yanobwa, amuha oruzaro, kandi Raheli oruzaro rubura. 32Lea atwara enda azara omwana w'obwojo, amuruka eibara Rubeni, nagamba ati, “Aha rw'okuba Omukama yabona obushasi bwange, rwona mbwenu ibanye arangonza.” 33Ashuba atwara enda azara omwana w'obwojo, nagamba ati, “Aha rw'okuba Omukama ahulire okwo ndikunobwa, yantunga omwana w'obwojo ogu.” Amuruka eibara Simeoni. 34Ashuba atwara enda azara omwana w'obwojo, nagamba ati, “Mbwenu eli ibanye arabera kimoi wange enshonga namuzalira abojo bashatu.” Nikwo kumweta eibara Levi. 35Ashuba atwara enda azara omwana w'obwojo, nagamba ati, “Eli ndasingiza Omukama.” Aha rw'ekyo amuruka eibara Yuda. Aho alekera kuzara.

Currently Selected:

Embandizo 29: RHAY01

Highlight

Copy