Ebikorwa 11

Petero namanyisa Enteko ya Yerusalemu amakuru

1Entumwa n'abakirisito ababaire bali Buyahudi bagya bahulira okwo Abanyamahanga nabo barangiirwe ekigambo kya Ruhanga. 2Kityo orwo Petero yagiire Yerusalemu, Abakirisito Abayahudi abagonzaga Abakirisito abanyamahanga kabatahirirwa, bamumoga bati, 3“Kubaki nogya omu batatahiriirwe nolya nabo?” 4Petero abanza kubashoboorora bunyanungi ati, 5“Mbaire ndi omu kigo kya Yopa ninshoma enshara. Aho mbundwa nshuba mbonekerwa, mbona ekilikusongoka nikishusha eishuka lihango, kikwetwe amarosho gakyo ganai nikiruga omw'iguru. 6Kankilebire kurungi nkyakyeteka mbona enyamaishwa n'ebikaaka n'ebyekurura n'ebinyonyi. 7Mpulira eiraka nilingambira liti, ‘Petero imuka, oite olye.’ 8Kyonkai ngamba nti, ‘Chei waitu Mukama, kuba ekya katozi anga ekihagaire tikikantahaga mu kanwa.’ 9Eiraka lyema omw'iguru omurundi gwa kabili limporora liti, ‘Ebyo Ruhanga ayelize noragirwa kutabyeta bya katozi.’ 10Ebyo bibaireho emirundi eshatu, byona bishuba omw'iguru. 11Omu kaanya ako konene abantu bashatu bagoba mbali tubaire tuli, barugire Kaisaria batumirwe ahali inye. 12Mwoyo angambira kugenda nabo, antanga kubashorora. Abakirisito barumuna baitu aba mukaaga banshagaire, tugya tutaha omwa Koroneli. 13Atugambira okwo omumalaika yabaire ayemeleire omwa wenene nagamba ati, ‘Ogire abo watuma Yopa bakwetere Simoni alikwetwa Petero. 14Arakugambira ekigambo ekirakurokora, iwe n'omutungo gwawe gwona.’ 15Orwo mbandize kugamba, Mwoyo Mutakatifu abasingiramu nk'okwo yasingiire omuli ichwe obubere. 16Aho nyijuka okwo Omukama yagambire ati, ‘Yohana omu kubatiza akakoza amaizi, kyonkai inywe omu kubatizibwa kwanyu mulibatizibwa Mwoyo Mutakatifu.’ 17Mbwenu ka Ruhanga araba yabahaire egabo emoi nk'eyo yahaire ichwe orwo twaikiliize Omukama Yesu Kirisito, inye nakubaire ohai kusimbalira Ruhanga?” 18Kabahuliire ebyo bayesiza. Basingiza Ruhanga bati, “Abanyamahanga nabo Ruhanga abatungire obushango bw'okwechuza amafu kababona oburora!”

Enteko ya Antiokia

19Abakirisito abairukiire orw'orushengo orwagwire aha rwa Sitefano bakagenda bagoba Fenisia na Sipuro na Antiokia nibaranga ekigambo omu Bayahudi bonkai. 20Kyonkai haliho abandi omuli bonene ababaire bali ba Sipuro na Kirene. Abo kabagobaire Antiokia barangira n'Abagiriki aha Mukama Yesu. 21Kandi Omukama akashangwa abemiremu, abantu bangi baikiliza bamwekwata. 22Amakuru ago gagoba omu nteko ya Yerusalemu, nikwo kutuma Barinaba kugya Antiokia. 23Kayagobaire akabona okwo Ruhanga yabahaire omugisha, ashemelerwa; abachumbiza kugumira kimoi kimoi aha Mukama. 24Barinaba yabaga muntu murungi, aijwire Mwoyo Mutakatifu, aina n'okwesiga kungi muno. Abantu bangi baolooza Omukama. 25Kityo akwata omuhanda agya Tariso kuhiiga Sauli. 26Kayamazire kumubona agaruka nawe Antiokia. Bakamara omwaka gwona n'enteko ya Antiokia, bayegesa abantu bangi; kandi omuli Antiokia omwo nimwo abegesibwa babandize kwetwa Bakirisito.

27Mbwenu omu biro ebyo abarangi baruga Yerusalemu baija Antiokia. 28Omoi wabo eibaralye Agabo abaasha omu bushobora bwa Mwoyo Mutakatifu okwo hakubaireho eifa lihango omu nsi zona. Bikaba bityo omu makiro ga Kalaudio. 29Abegesibwa bona bagira egabo, buli omoi okwo yabaire nashobora, kutwekera barumuna babo aba Buyahudi eshumbusho. 30Omu kubitweka babikwasaga Barinaba na Sauli baba nibo babitwalira abagurusi.

Currently Selected:

Ebikorwa 11: RHAY01

Highlight

Copy