Ebikorwa 10

Petero na Koroneli

1Omuli Kaisaria hakaba halimu omushaija, eibaralye Koroneli, ali mukuru w'omutwe gw'abaisherukare ogwayetwaga Mutwe gwa Italia. 2Akaba ali muntu w'edini; hamoi n'ekaye batinaga Ruhanga. Yaikaraga nashoma enshara ahali Ruhanga buli kaanya, kandi yashumbushaga muno abanaku. 3Zikaba zili nk'esaa mwendai za bwamushana abonekerwa omumalaika wa Ruhanga amweteka bunyanungi, omumalaika ogwo aija namweta ati, “Koroneli!” 4Koroneli atangalira omumalaika n'obutini bungi muno agamba ati, “Hanga, mukama wange.” Omumalaika amugambira ati, “Ruhanga ashemeleirwe enshara zawe n'eshumbusho zawe ez'olikujunisa abanaku. 5Mbwenu ogire abo watuma Yopa, bakwetere Simoni, eibaralye elindi ni Petero. 6Naikara omwa Simoni omuhazi w'empu, enjuye eli aha mwaro.” 7Omumalaika kayamazire kumugambira ebyo akagenda, Koroneli ayeta abairube babili hamoi n'omwisherukare omoi omunyadini omuli balinya abamulindaga. 8Kayamazire kubabarulira byona ebyabaho abatuma Yopa.

9Bukeire nibagenda, kababaire baija hai n'ekigo, Petero atemba aha rushwi rw'enju kushoma enshara; zikaba zili saa nka mukaaga. 10Omw'izoba elyo arumwa enjara, agonza kugira ako yalya. Kababaire bakyamutekatekera ekyakulya, abonekerwa omu mwoyo. 11Abona eiguru likingukire, abona n'ekilikusongoka ahansi nikishusha eishuka lihango, oti haliho abakikwete amarosho gakyo okwo gali ganai. 12Kikaba kiinamu ebigunju bya buli ngeli nebyekurura, n'ebinyonyi. 13Ahulira n'eiraka liti, “Petero imuka, oite ebyo, olye.” 14Ndi Petero ati, “Chei waitu Mukama; inye ebya katozi anga ebihagaire tinkabilyaga.” 15Ashuba ahulira eiraka omurundi gwa kabili liti, “Ebyo Ruhanga yayeza noragirwa kutabyeta bya katozi.” 16Bikagendelera biti emirundi eshatu, aho honkai ekintu kishuba omw'iguru.

17Aho Petero ebyo yaboine omu kubonekerwakwe orwo byabaire nibimuburabuza, ayechura abashaija abo Koroneli yabaire atumire bali aheru. Bakaba babalize omwa Simoni. 18Beta nibabaza nka Simoni alikwetwa Petero nashura omwo. 19Orwo Simoni alikutekeleza ebyo yabonekerwa, Mwoyo amugambira ati, “Leba aliho abantu bashatu nibakuhiga. 20Osongoke ahansi mara otasindara, ogende nabo; enshonga nabatuma.” 21Petero asongoka agoba abantu abo abagambira ati, “N'inye owo mulikuhiiga; mwaletwaki?” 22Bamuhorora bati, “Koroneli omukuru w'abaisherukare, omuntu omurungi atina Ruhanga, mara asiimwa eihanga lyona ly'Abayahudi, aragiliirwe omumalaika mutakatifu kukutumaho kwija owa wenene, ahulire eby'oramugambira.” 23Aho Petero abanyegeza omwa wenene bararamu.

Bukeire aimuka agenda nabo. Abakirisito abandi nabo baruga nawe Yopa bamushagara. 24Bukeire bunu bagoba Kaisaria. Koroneli akaba abategeleize, yayesire abanyabuzarebe na banywanyibe. 25Ka Petero yabaire yagoba, Koroneli yabandama yamugwa omu maguru. 26Kyonkai Petero amwimukya nagamba ati, “Oimuke; kuba nanye ndi muntu.” 27Petero agenda nafumora nawe ataaha omu nju ashangamu abantu bangi baizire. 28Abagambira ati, “Inywe nainywe nimumanya okwo kilikuzira Omuyahudi kuba mutahi w'omunyamahanga weena weena nangu n'okumukyalira. Kyonkai inye Ruhanga anshurulire yangambira kutagaya muntu weena weena anga kumweta muhagare. 29Kityo orwo bantumire naija ntasindaire. Mbwenu nimbabaza ekyo munyeteire.”

30Koroneli agamba ati, “Ebiro binai ebihingwire, omw'izoba nk'eli, mbaire ndi omwange aha saa mwendai ninshoma enshara. Leba omuntu anyemeleire omu maisho ajwete ekijwaro nikimyansa. 31Angambira ati, ‘Koroneli, Ruhanga ahuliire enshara yawe, n'eshumbusho zawe yazisiima. 32Ogire abo watuma Yopa babaze Simoni alikwetwa Petero, nashura omwa Simoni omuhazi w'empu, bwatana aha nyanja.’ 33Nikwo kukutumaho aho n'aho, mara wasinga waija. Aha rw'ekyo ichwena tuli omu mabona ga Ruhanga kuhulira byona eby'Omukama akuhangiire.”

Ehotuba ya Petero

34Petero abanza kugamba ati, “Namanyira kimoi okwo Ruhanga atagira kigonzi. 35Akunda kaishe muntu weena omuli buli ihanga ayamutina mara akaba mugorogoki. 36Nimumanya okwo Ruhanga yagambire Isiraeli, akabarangira omu kanwa ka Yesu Kirisito Omukama wa bona amakuru garungi ag'emilembe. 37Nikyo kigambo ekyagambirwe omuli Buyahudi yona, kwema Galilaya orwo Yohana yabaire yarangire aha kubatiza okwo, 38Ruhanga yakozire Yesu owa Nazareti amajuta, akamuha Mwoyo Mutakatifu n'obushobora, okwo Yesu ogwo yagendaga nakora ebirungi natambira bona abo Sitani yabaire nashasa. Okukora ebyo Ruhanga akaba amwemiremu. 39Ichwe tuli bajulizi b'ebyo yakozire byona omuli Isiraeli n'omuli Yerusalemu. Bakamuhanika aha muti bamwita. 40Kyonkai Ruhanga akamuhimbura aha kiro kya kashatu mara yamuzora omu bantu. 41Tiyaboinwe bona shana ichwe abo Ruhanga yaronzire katuba bajulizi. Nichwe twaliire nawe tukanywa nawe orwo yahimbukire omu bafu. 42Yesu ogwo akatuhangira kurangira abantu n'okujulira okwo n'iwe Ruhanga yataireho kuramura abarora n'abafire. 43N'iwe abarangi bona balikujulira okwo buli omoi alimwesiga alibona omugaruliro gw'amafuge aha rw'obushobora bw'eibaralye.”

Abanyamahanga nibatungwa Mwoyo Mutakatifu

44Orwo Petero yabaire ali omu kugamba ebyo, Mwoyo Mutakatifu yasingira omuli bona ababaire nibahuliliza ekigambo ekyo. 45N'abaikiliiza abatahiriirwe ababaire baizire na Petero batangara kubona okwo Mwoyo Mutakatifu yasinga akasingira n'omu banyamahanga. 46Aha rw'okuba bakahulira nibagamba endimi zingi nibahaisiliza Ruhanga. Ahanyuma Petero abaza ati, 47“Aba abatungwa Mwoyo Mutakatifu nka ichwe haliho omuntu ayakubatanga kubatizibwa n'amaizi?” 48Aho abaragira kubatizibwa omw'ibara lya Yesu Kirisito. Ahanyuma bamushaba kuba akyaikaire nabo ebiro bike.

Currently Selected:

Ebikorwa 10: RHAY01

Highlight

Copy