Ebikorwa 12
12
Okugingiizibwa nikweyongera
1Omu makiro ago Omukama Herode agira Abakirisito abo yakwata mara abashasa muno. 2Yakobo murumuna Yohana amwisa embanda. 3Kayaboine okwo kyashemelera Abayahudi ayeyongera akwata na Petero. Ebyo bikabaho omu biro by'Omukate Ogutatumbisiibwe. 4Kayamazire kumukwata yamufunga, yamuteka omu mikono y'emitwe enai y'abaisherukare kumulinda agendeleire Pasika k'ehwamu kumwihyamu akamwoleka embaga. 5Nikwo Petero kufungwa atyo, kyonkai enteko emushabira muno ahali Ruhanga.
6Omu kiro orwo Herode alikuralira kumwihya omu kifungo, Petero ali omugati y'abaisherukare babili anagiire, bamukomesize empingo ibili, abalinzi abandi balinzire aha kihigi kya jela, 7omumalaika w'Omukama aija, omushana gujwa omu kayumba ka mabusi. Atera Petero omu rubaju amusisiimura namugambira ati, “Imuka bwangu.” Empingo zimutaishuka aha mikono zigwa ahansi. 8Omumalaika amugambira ati, “Jwara, mara otemu n'ebiratwa.” Agirakwo atyo. Omumalaika ashuba amugambira ati, “Yeshweke ebebo yawe ompondere.” 9Aturuka amuhondera, kyonkai eby'omumalaika yakozire tiyamanyire nka bilikwo, atekeleza ngu nabonekerwa. 10Kababaire bahingwireho abalinzi aba mbere n'aba kabili, bagobera ekihigi ky'ebyoma ekilikugya omu kigo. Kibekingulira kyonene kyonkai bashohora baraba omu mbarabara emoi. Honene aho honkai omumalaika amurugaho. 11Petero ayemanya agamba ati, “Mbwenu namanyage okwo Omukama yatuma omumalaikawe, yandokora omu mikono ya Herode n'omu byo Abayahudi baba nibashuubira.”
12Orwo yashobokeirwe ebyo kurungi akwata omuhanda agya omwa Maria nyina Yohana ayayetwaga eibara elindi Mariko, nimwo bangi babaire bateraniire nibashoma enshara. 13Petero akomakoma aha kihigi ky'aheru, omuzana eibaralye Roda agya kuleba n'ohai. 14Kayamanyire okwo eiraka lili lya Petero, ashemelerwa, nangu n'ekihigi tiyakikingwire, ashuba omunda airukire abagambira okwo Petero ayemeleire aha kihigi. 15Bamugambira bati, “Wararuka.” Kyonkai omuzana aikara akalilize okwo gali mazima. Bagamba bati, “Ni malaikawe!” 16Petero aikara nakomakoma. Kabakingwire ekihigi bakamubona batangara. 17Abatelera omukono kabesiza, Abashoborora okwo Omukama yamwihya jela. Ashuba abagambira ati, “Mumanyise Yakobo na barumuna baitu.” Ahanyuma aimukya agya ahandi. 18K'obwire bwakeire abaisherukare bafa bosha aha rw'okushoberwa okwo Petero abaire. 19Herode kayatumire kumweta akabura, abaza muno abalinzi ashuba aragira kubaita. Ahanyuma Herode wenene aruga Buyahudi agya Kaisaria, amarayo ebiro.
Okufa kwa Herode
20Omu biro ebyo Herode akaba atamirwe muno abantu ba Tiro na Sidoni. Bamwizira bemire hamoi kyonkai babanza baraba ahali Bulasito omusigire w'omukama, bamugwisiliza kuba ensi yabo yalebaga eihanga lya Herode kubashakira ekyakulya. 21Aha kiro ekyo yabaire aragire, Herode ayambara enyambarwaze, ashuntama aha nketo abagambira ekigambo. 22Abantu bagamba n'eiraka lihango bati, “Eli iraka lya ruhanga ti lya muntu!” 23Aho n'aho omumalaika w'Omukama amutera, kuba tiyahaire Ruhanga kitinwa. Aliibwa enzito afa. 24Ekigambo kya Ruhanga kigendelera kumanyika.
25Barinaba na Sauli kabamazire kugobesheleza ekyabaire kibatwete Yerusalemu barugayo, batwara na Yohana ayetwa Mariko.
Currently Selected:
Ebikorwa 12: RHAY01
Highlight
Share
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
