Mwamulizo 13

U witemanuce wa Abulamu na Loti

1Abulamu yakawuya ku wulawa ku Misili, yakabita ku Negebu. Nayo yali yali hamonga no mugolece wakwe ne sawo yakwe yose, hamonga na Loti. 2Na mu vilo vivyo, Abulamu yali yagolipa muno. Yali yena mitugo, ne mapesa hamonga ne zizahabu. 3Nayo Abulamu yakajendelela no muhinzo wakwe ku wulawa ku Negebu sunga yakafika ku Beteli. Yakafika hanhu hono yali yalikomile lihema lyakwe halulongozi, haciligati ya Beteli na Ayi, 4hanhu hono yazenga i cikumbicilo. Nayo yakamuhemba u Muwaha Mulungu. 5Na Loti mono vyetyatya hamonga na Abulamu, nayo nhavivyo, yali yena zingholo ne zimitugo hamonga ne mahema. 6Ne liwalo lye zimitugo zawo, lyali yiwaha muno muno, sunga ne yisi yikawa si yikuwakwila ku wikala hamonga wose Abulamu na Loti. 7Ale baho, wukawa kwijela wugombane hagati ye wadimi wa Abulamu ne wadimi wa Loti. Na mu vilo vivyo, Wakanani ne Wapelizi, wo wali wekazi wa mu yisi yiyo.

8Holeka Abulamu yakamulonjela Loti yakatya, “Gwe mwanangu, si viswanu hawe na mazozo no wugombane hagati yetu, hamba hagati ye wadimi wako ne wadimi wangu, hambi ase nha cili ndugu. 9Alu wulanje ta, yisi yiyi yose yili ha mwande yako. Holeka yowa yili ciba, hono citemanuce. Hono agwe wusace kubita ku lubavu lo kucekulu, ane nane nobita ku lubavu lo kulume, na hono wuhagule kubita ku lubavu lo kulume, ane nobita ku lubavu lo kucekulu.” 10Nayo Loti yakenula i meso gakwe, yakayilanga nyika yose ya Yoludani, nayo yakayiwona vyono yina malenga menji hanhu hose gono gakwiliye. Nayo yinha kotya lilolo lyo Mulungu, na kotya yisi ya Misili ku lubavu lwa Sowali, lono Mulungu yali yakali nagongomeza imakaya ga Sodoma na Gomola. 11Holeka Loti yakawa kubita ku lubavu lwe cilima, nayo yakahagula lilolo lyose lya Yoludani, nawo ku wulawa lulo baho, wakawa kwitemanuka. 12Ninga mwene Abulamu yakasigala mu yisi ya Kanani. Mwene Loti yakekala haciligati ye makaya gono gali gali mwi'lolo, nayo yakahamizya lihema lyakwe ku Sodoma. 13Ale, i wanhu wa kuko ku Sodoma, wali wanhu wabi muno, kanyhi wali wahodanji wawaha hali Mulungu.

Abulamu yakuhamila ku Hebuloni

14Nayo Loti lono vyali vyakondya kwitemanuka na Abulamu, u Muwaha Mulungu yakamulonjela Abulamu yakatya, “Ale ta, winule meso gako ku wulawilila baho hono wimile, nagwe wulanje zimbavu zose, kusumuka, kutakama, kucilima na kumwezi. 15Yisi yiyino yose yono wukuyiwona, ane nokupela gwegwe hamonga no lulelo lwako, yiwe yisi yenyu ko ku cibitilila. 16No lulelo lwako nowanoza wawe wenji muno muno kotya muhangha we yinze. Nha vyono muhangha si wosuma kuwalwa, ale, nhavivyo no lulelo lwako nalo, si losumika ku wuwalwe! 17Holeka alu winuce wuyipilime pilime yisi yiyi yose, wuyilanje mu wima wayo no wugazi wayo, hambi nha nokupela gwegwe.” 18Hodu Abulamu yakawa kulikula lihema lyakwe, yakawa kubita kwikala behi ne miyaloni, i mibici ye minghola ya Mamule, yono yili mu Hebuloni, nako kuko, yakamuzenjela Muwaha Mulungu cikumbicilo.

Currently Selected:

Mwamulizo 13: LLKWW

Highlight

Copy