Mwamulizo 12
12
U lucemo lo Mulungu kuli Abulamu
1Ale, u Muwaha Mulungu yakamulonjela Abulamu yakatya, “Ale wuwuce mu yisi yako, wuyilece ne mhuga yako wose sunga ne kaya yo sogo, wubite sunga ku yisi yono nene nokulajila.” 2“Nane nokunoza wuwe yikungugo yiwaha muno muno, kanyhi nokulugutiza, nane nolinoza litagwa lyako limanyice muno, nagwe wuwe wumoti.”
3“Nayo mono kokulugutiza, nane nomulugutiza.
Nayo mono yakukulijita, nane nomulijita.
Ne zimhuga zose za kono'nze zolomotela muli gwegwe.”
4Hodu du, Abulamu yakawa kutuluka nha vyono Mulungu yamulajiliza, vikawa kubitana hamonga na Loti. Nayo Abulamu yali yaficile myaka makumi mupunghati na mihano lono yawucila ku Halani. 5Yakamusoleleza no mugolece wakwe Salayi, hamonga na Loti u mwana wo mwanakwawe Halani, hamonga ne sawo yawo yose yono wali wayisawa, wakawa wasoleleza hamonga ne wanhu wose wono wawatuga kuko ku Halani. Nawo wakatuluka wakubita ku Kanani.
Nawo wali weza kufika mu yisi ya Kanani. 6Mwene Abulamu yakakolela haciligati ye yisi, yakawa kubita sunga ko ku Shekemu, i hanhu hono helile, hanhu hono ho wuli no mubici wo munghola wa Mole. Na mu vilo vivyo, Wakanani wo wali wekaye mu yisi yiyo. 7Ale, u Muwaha Mulungu yakamulawila Abulamu yakamutya, “Nolupela lulelo lwako yisi yiyino.” Co caleka Abulamu yakumuzenjela cikumbicilo u Muwaha Mulungu mono yamulawila. 8Hanyuma Abulamu yakawa kutuluka, yakawa kubita mu matunda ga ku lubavu lwa kucilima ye Beteli. Nayo yakawa kulikoma lihema lyakwe kuko, haciligati. Likaya lye Beteli yakulilanga ku lubavu lwe mwezi, likaya lya Ayi nalyo, yakulilanga ku lubavu lwe cilima. Naho baho, Abulamu yakamuzenjela u Muwaha Mulungu cikumbicilo, yakamuhemba. 9Hanyuma Abulamu, yakajendelela no muhinzo wakwe du yalanjile ku lubavu lwa Negebu.
Abulamu ku Misili
10Na mu vilo vivyo, yikagwa nzala mbaha mu yisi ya Kanani. Ne nzala yiyo yikawa mbaha muno muno. Holeka yikawa yimunojeye Abulamu yabite ku Misili, yakekale kuko nha muhamizi. 11Nayo Abulamu lono yali yeza yali behi no kwinjila mu Misili, yakawa kumulonjela u mugolece wakwe Salayi yakutya, “Gwe mwendece, ane manyile vyono, agwe wuli mucekulu mono wina futa swanu muno muno ku wulangwe. 12Holeka Wamisili kolo wakukuwona, wotya, ‘Ayu mugolece wakwe.’ Hanyuma lu'ne wombulaga, ninga agwe si wokuwulaga yaye. 13Holeka nghukunena, agwe wuwatezaje vyono wuli lumbu lyangu, holeka ne zinghani zowa swanu kuli'ne, nane ho nosuma kuwa mumi ku soko yako.” 14Nayo Abulamu yali yeza kufika mu yisi ya Misili, wanya wusi wa kuko, wakamuwona Salayi vyono yo mucekulu muswanu muno muno. 15Nawo wawaha wa mu wutemi wa Falawo, wali weza kumuwona Salayi, hobaho wakawa kubita kumukumizya u mutemi Falawo zo wuswanu muno wa Salayi. Hodu, Salayi yakawa kutegulwa ku kaya ya Falawo. 16Ale, ku soko ya Salayi, i zinghani zikawa kumuwela swanu Abulamu. Nayo Abulamu yali yena hamonga ne zimitugo zakwe, zingholo, zing'ombe, hamonga ne zindogowe zakwe ne zingamiya zakwe, hamonga ne wetumami wakwe i walume na we cicekulu.
17Ninga u Muwaha Mulungu, yakamugumilila Falawo wugazwe wuwaha muno muno we matamwa, u mwene hamonga ne wanhu wa mu nyumba yakwe wose, ku soko ya Salayi u mugolece wa Abulamu. 18Holeka Falawo yakamucema Abulamu yakamuwuza yakatya, “Alo nghanici yiyi waco yono wunhendeye? Alu nhawule si wamanyiza vyono yuyu Salayi yo mugolece wako? 19Na socici wukalonga vyono Salayi lumbulyo, nagwe wukawa kunyambuza, nane nghawa kumusola, yawe mugolece wangu? Ale lu mugolece wako ayu aha. Holeka lu, wumusolaje mubitane nayo!” 20Hodu Falawo yakawa kuwalajiliza wanhu wakwe, wakawa kumusindiciza Abulamu, no mugolece wakwe, hamonga ne zisawo zakwe zose zono yali yena nazo.
Currently Selected:
Mwamulizo 12: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
